Meeqqanut tapiissutit

Nalinginnaasumik paasissutissiineq 

Meeqqanut tapiissutit pisortat aningaasatigut ikiorsiissutigaat, angajoqqaat qitornaminnut pilersuinissaminnut atatillugu pissarsiarisinnaasaat.

Qitornaasut amerlaneruppata, meeqqamut ataatsimut meeqqanut tapiissutit qaffassapput.

Meeqqanut tapiissutit pissarsiarinissaannut qinnuteqaateqassanngilatit. Aamma kommunimut allamut nuukkaluaruilluunniit. Angajoqqaat meeqqanut tapiissutinik pissarsisinnaanermut pisinnaatitaasut, meeqqanut tapiissutinik pissarsitinneqartassapput.

Kalaallit Nunaannut nuukkuit kommunimut nuuffigisannut nalunaarsuiffinnut allatsissaatit. Aatsaat taamaasioreeruit meeqqanut tapiissutinik pissarsisalersinnaavutit.

Piumasaqaatit 

Meeqqanut tapiissutinik pissarsiniaraanni piumasaqaatit arlallit naammassineqaqqaartussaapput:
• Meeraq 18-it inorlugit ukioqassaaq
• Meeraq Kalaallit Nunaanni najugaqassaaq inuillu allattorsimaffianni nalunaarsorsimassalluni
• Meeraq danskisut innuttaassuseqassaaq
• Inuusuttoq katinnikuusimassanngilaq
• Meeraq inuusuttorluunniit pisortanit angerlarsimaffiup avataanut inissinneqarsimasuussanngilaq

Tapiissutit meeqqap qaammammi 18-inik ukioqalerfiani atorunnaassapput.

Akigititat 

Meeqqanut tapiissutit annerpaat ukiumut 8.477 kr.-iupput.

Angajoqqaat maannakkut isertitaat meeqqallu amerlassusaat tunngavigalugit kommunip meeqqanut tapiissutit naatsorsortarpai.

Maannakkut aningaasarsiat pillugit annertunerusumik uani paasisaqarnerugit

Annikilliartuaartitsisarneq: Illit aamma imaluunniit aapparisavit/inooqativit maannakkut isertitavit/ssi, killigititaq aalajangersimasoq qaangerpagu, meeqqanut tapiissutitut pissarsiarisinnaasassi nalinga appassaaq.

Meeqqanut tapiissutit aningaasarsianut killigititani tulliuttuni peerneqassapput:
• kr. 372.200 ilaqutariinnut ataatsimik meerartalinnut
• kr. 397.200 ilaqutariinnut marlunnik meerartalinnut
• kr. 422.200 ilaqutariinnut pingasunik meerartalinnut
• kr. 447.200 ilaqutariinnut sisamanik meerartalinnut
• kr. 472.200 ilaqutariinnut tallimanik meerartalinnut
• kr. 497.200 ilaqutariinnut arfinilinnik meerartalinnut

Meeqqanut tapiissutinik naatsorsuinermi, maannakkut isertitanik kiisalu qitornat amerlassusaannik naatsorsuinermut tunngavissanut malittarisassat tulliuttut atuupput:

1. Angajoqqaat najugaqatigiippata, taava marluullutik maannakkut ataatsimut isertitaat, kiisalu inoqutigiinni ataatsimut qitornaat tamarmik tunngavigineqassapput

2. Meeqqap angajoqqaami aappaa kisiat najugaqatigippagu, taava taassuma maannakkut isertitai tunngavigineqassapput. Angajoqqaaq taanna allamik inooqateqarpat, aamma inooqatigiinneq ukioq ataaseq sinnerlugu sivisussuseqarsimappat, inooqataasup isertitai kiisalu inooqataasup nammineq qitornai inoqutigiinnut ilanngunneqassapput. Inooqatigiit taakku katissimappata, piumasaqaataanngilaq ukioq ataaseq sinnerlugu katissimanissaat.
Inooqat ima paasineqassaaq, inuk angajoqqaap aapparmisut inooqataa

3. Meeraq angajoqqaamini immikkut assigiimmik sivisussusilimmik najugaqartarpat, inunnik nalunaarsuisarfimmi meeqqamut angajoqqaatut nalunaarsorneqarsimasup isertitai tunngavigalugit meeqqanut tapiissutit naatsorsorneqassapput. Takuuk immikkoortoq 2 aamma 4

4. Inooqatigiinnut katissimanngitsunut, siusinnerusukkut inooqatigisimasanit inoqutigiinni qitornaqartunut, aamma ukioq ataaseq inorlugu inooqatigiissimasunut, meeqqanut tapiissutit arlalinngorlugit avinneqassapput. Angajoqqaat immikkut tamarmik meeraannut tapiissutinik naatsorsuinermi, angajoqqaajusoq kisermaatut isigineqassaaq, taamaalillunilu angajoqqaajusup isertitai namminerlu qitornai kisimik naatsorsuinermi tunngavigineqassallutik.
Aappariilli taakku ataatsimut qitornaqarsimappata, ataatsimut qitornaannut meeqqanut tapiissutit naatsorsorneqassapput aningaasarsiaasa ataatsimoortinneri tunngavigalugit soorlu immikkoortoq 1-imi allaaserineqarsimasoq

Meeraq paaqqutarineqarpat imaluunniit skolehjemmimiippat meeqqanut tapiissutit naatsorsorneqarneranut paasissutissat ersarinnerusut pillugit kommunit saaffigisinnaavat.

Tapiissutit tunniunneqarneri 

Meeqqanut tapiissutit nammineq iliuuseqarani tunniunneqartarput. Tamanna pisarpoq, kommunit paasissutissat pigeriikkatik tunngavigalugit naatsorsuinerisa kinguneranik meeqqanik tapiissutinik tunniussisarmata.

Tamatigorluinnangajak kommunip aningaaserivimmi kontut ilisimareertarpaa, assersuutigalugu akissarsiannut konto atorneqartartoq, tassungalu meeqqanut tapiissutit ikineqartarput. Nalunartut pillugit kontutit pillugit paasissutissat kommuninnut tamatigut tunniuttakkit. Aningaaserivimmi kontoqarsimanngikkuit meeqqanut tapiissutit rekvisitioninngorlugit pisinnaavatit.

Meeqqanut tapiissutit qaammatit tamaasa tunniunneqartarput.

Allannguineq 

Taamaattoq pisussaavutit aningaasaqarnerit allannguuteqarsimappat, utoqqalinersiuteqalersimaguit imaluunniit piffissami sivisunerusumi napparsimalersimaguit, kommunimut paasissutissiissallutit.

Kommunerisannut immikkut ittoq 

Kommunerisannuinnaq aalajangersimasunik paasissutissaqarpoq.

Kommune toqqaruk.

Allaaserisat attuumassutillit

Avannaata Kommunia
Postbox 1023
3952 Ilulissat

Oqarasuaat: (+299) 70 18 00
Fax: (+299) 70 11 77
E-mail: avannaata@avannaata.gl
Nittartagaq: www.avannaata.gl