Kommunip pilersaarutaanut tapiliussaq inaarutaasumik ulloq 07.06.2018-imi akuersissutigineqarpoq. Kommunip pilersaarutaanut tapiliussaq ulloq 14.06.2018-imi tamanut saqqummiunneqarpoq, ullormiillu tassanngaanniit kommunip pilersaarutaanut tapiliussaq inatsisitigut atuutilerluni.
Kommunip pilersaarutaanut tapiliussap siunertaa:
Atortulersuutit illuliornerillu angisuut pingaaruteqartullu, matumani umiarsualivik ilanngullugu, periarfissikkumallugit pingaarnertut aamma immikkut ittumik aalajangersakkanik aalajangersaaneq. Umiatsialiveqarfimmi umiatsiaaqqanut angallatinullu aamma containerinik usisaatinut pissutsit pitsanngorsaaffiginissaat umiarsualiviup qularnaassavai.
Qaanaami umiarsuliveqarfiup pilersinnissaanut pilersaarusiornermut tunngasut, kommunip pilersaarutaanut tapiliussap uuma atugassiissutigai. Umiarsualiviup inissisimaffia aamma sanaartorneqarnera, Namminersorlutik Oqartussani attaveqarnermut immikkoortortami inaarutaasumik aalajangiiffigineqassaaq. Inissisimaffissaanut sanaartorneqarnissaanullu tunngatillugu saaffiginnissutit tamakkerlutik uunga nassiunneqassapput:
Attaveqarnermut immikkoortortaq
Imaneq 1, Postboks 909
3900 Nuuk
Kommunip pilersaarutaanut tapiliussami, inissisimaffissaanut aamma sanaartornissap ilusilerneqarneranut tunngatillugu tusarniaanerup ingerlanerani tusarniaanermut akissutit tiguneqarsimasut, akuersinermik ilaqartillugit, ilisimatitsissutitut, attaveqarnermut immikkoortortamut ingerlateqqillugit nassiunneqarnikuupput.
Kommunip pilersaarutaanut tapiliussaq sapaatit akunnerini arfinilinni tamanut tusarniutigineqarnikuuvoq, tamatuma ingerlanerani innuttaasut, suliffeqarfiit il.il. akerliliissutinik, oqaaseqaatinik aamma allannguutissatut siunnersuutinik saqqummiussinissamut periarfissaqarnikuupput.