airplanebooksbriefcase business cogs cross election entertainment fish house law lockmedicalpeopleselfservices socialtax

Ilulissat tassaapput tikiffissani ’number one’

22. juni 2018

’Mittarfilerngusaannermik’ tunngasoq Sermitsiami Sermersooq Business Councilip allaaserisaa atuarpara. Nuuk illoqarfittut pingaarnertut nunat tamalaanit tikittarfissatut mittarfeqarnissaata pingaaruteqassusia allaaserisami taakkartorneqarpoq, taamaalillunilu Kalaallit Nunaannut isaarianngussaaq, aamma takornariartitsinermut tunngatillugu. Kultureqarnermik ingerlatsiviit pissutigalugit Nuuk immikkut kajungernartutut tikiffissaanera, taakkumi takornariani soqutiginnitsitsimmata, Sermersooq Business Councilip erseqqissarpaa. Mittarfik Nuummiissappat nunamut tamarmut iluaqutaassasoq taakku tunngavissiissutigaat.

’Mittarfilerngusaannerpiaq’ akuleruffigerusuppallaanngilara, Kalaallit Airports’ip pilersaarutit aallaavigalugit suliaqarfigisai najoqqutarigakkit. Pilersaarutillu taakku annertuumik naalakkersuinikkut tapersersorneqartut isumaqarpunga. Taamaattumik isumassarsiat Naalakkersuisut, taamaalillutillu aamma Kalaallit Airports’ip suliaqarfigisaanik tapersersuinatik Sermersooq Business Councilip Nuuk pillugu salliutitsiniarsarinera naleqquttuusorinngilara. Isumassarsiammi tassaarpiarput Nuummi aamma Ilulissani nunat tamalaanit tikittarfissatut mittarfeqartussaanera, illoqarfiit taakku tamarmik namminneq immikkut ittunik isumalluuteqarfiullutik pingaarutilittut tikittarfissaammata.

Piviusuni Ilulissat tassaapput Kalaallit Nunaanni takornarianut tikiffissani ’number one’. Akunnittarfitsigut piginnaasaqarfiit tassaapput akunnittarfiit sisamat, guest house’t sisamat, katillugit siniffiit 700-t missaat. Ukiup ilaani pisoqarfiunerpaami akunnittarfitsigut piginnaasaqarfik siunissami ukiunut marlunnut tamakkiisumik inniminniffioreerpoq, ukiullu ilaani pisoqarfiunerpaap avataani tikeraat amerliartortut misigisaqarfigaagut. Takornariallu qimalaarlugit Ilulissat qaqutiguunngitsukkut nunat tamalaanit peqataaffigineqartutut ataatsimeersuarnerni qitiusarpoq, taakkunani pineqartarlutik silap pissusia, avatangiisit, nukissiuuteqarneq qorsuk, aamma nunarsuup kissakkiartuaarnera. Nunarsuarmit tamarmit naalakkersuisuusuni nuimanerpaat kangerlupput nunarsuarmi tamarmi tusaamasaq Kangia takusartarpaat. Ataatsimiinnerillu aamma ataatsimeersuarnerit tamakku nunat tamalaani ingerlatsisartutut tusagassiorfiit angisuut malinnaaffigiartortarpaat. Taamaalilluni nunarsuarmi tamarmi Ilulissat tamatigut annertuumik soqutigineqartuuvoq. Ilulissat atermigut ilisarnaatimigullu (brandimik) tusaamasaalereersimanera tassuunakkut paasiinnarsinnaavarput.

Ilulissani pigisarput tassaavoq nunarsuarmi kingornussassaq, nunarsuarmit tamarmit takornarianik naalakkersuinermillu ingerlassaqartunik aggersaasoq, tassaavorlu nunarsuarmi sumiiffinni allani nassaassaanngitsutut asseqanngitsutut tikiffissaq. Taassuma saniatigut Kalaallit Nunaatsinnik ilisarnaqutaasut qimmit qimuttut pigaavut, taakkulu arlalitsigut kultureqassutsitsinnut takussutissaapput. Taamatullu neqeroorutigisagut misigisassat tulleriiaartuarsinnaapput, qanittumit ungasissumillu takornariat orniguffigisaat. Allatut oqaatigalugu Ilulissat takornariat upataattut tikiffissaareernera imatut tiguinnagaanngilaq, assersuussassanullu naleqqiullugu Ilulissat tassaavoq Kalaallit Nunaanni takornarianut kajungernartuni salliunerpaaq.

Takornariat aningaasaqarnermi siuarsarnermik pilersitsipput, taamaattumillu maani nunami peqatigiilluta ilusilikkamik pinngoriartortitsinissarput pingaartuuvoq. Tassani suleqatigiittariaqarpugut, kimmaannatalu. Taamaattumik tamatta immitsinnik piginnaasatsinnillu paasinninnissarput pingaartuuvoq. Aamma niuffaffiup tusarniarnissaa, taassumalu akerlilerniassannginnera pingaartuupput.
Ineriartorluareersoq isiginngitsuusaarlugu nutaamik nassaarniarnissaq tamatigut iluaqutaaneq ajorpoq. Kiffaanngissuseqartutullu aningaasaqarnikkut nukittussutsit aqunniarsarissagutsigit tamanna aarlerinartorsiortitsisinnaavoq, tamakkumi nunatta aningaasaqarnerat tamakkiisumik sunniuteqarfigaat.

Takornariat Ilulissiarusupput, taamaattumillu allanngoriartorneq tamanna ingerlaannassappat toqqammavissat pitsaasut pilersissavagut. Allanngoriartorluarneq nunamut tamarmut iluaqutaasussamik naggataatigut aningaasaqarluarnermik isumaqarpiarpoq. Assersuutigalugu Nuuk tassaavoq illoqarfik ilinniarfissuaq, tamaanilu siunertamut aningaasarpassuit aningaasaliissutaapput. Kalaallit Nunaannilu sumiiffinnik allanik ilinniariarfissaqaraluartoq suliassaqarfimmi nunatta sinneranit Nuuk inissisimanera tapersersorparput. Tamatuma Nuuk iluaqutissippaa, aammali nuna tamaat isigalugu.

Taamatuttaaq takornariartitsinerup iluani allanngoriartorluareerneq tapersersussallugu kissaatigaarput, tamanna aamma tassaammat tigussaasutigut pissutsit inernerisaat, aammalu niuffaffiup piumasaqarnerullu inissitaatut ineriartuaarneq. Tapersersuineq tamanna aamma Sermersuup tungaanit pisariaqartipparput.

Atuuttooreersut sukateqqinnissaat pisariaqartipparput, taamaalilluta takornariat suli amerlanerit tikisissinnaassagatsigit. Taamaattumik Ilulissani mittarfiup allinera pingaaqaaq. Qularinngilaralu Kalaallit Nunaata sinneranut tamatuma iluaqutaanissaa, toqqammavik pioreersoq nukittoorlu tunngavigalugu ingerlatsisoqassammat.

Taamaattumik ’mittarfilerngusaanneq’ pisariaqartinngikkipput isumaqarpunga. Kalaallit Airportsinit pilersaarutit kikkut tamarmik tapersersortariaqarpaat.

Ikinngutinnersumik inuulluaqqusillunga

Palle Jerimiassen
Borgmesteri