airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommuniani sanaartugassat

20. december 2018

Avannaata Kommuniani Teknikki pillugu Ataatsimiititaliap 2019-imut sanaartugassatut suliniutit 82.0 mio. kr.-nik nalillit tulleriiaarsimavai. Tulleriiaakkat 29. novembarimi kommunalbestyrelsip ataatsimiinneranut akuerisassanngorlugit nassiunneqarsimapput. Kommunalbestyrelsip inassutaasut akuerai, sanaartugassatullu suliniutit 20-t missaat akuerineqarput.

Ilulissat
Namminersorlutik Oqartussanik suleqateqarluni kommune illunik nalinginnarmik iluaqutaasussanik 48-nik sanaartornermik ingerlassaqarpoq. Ukiormanna sanaartorfigissaanermik kommune isumaginnippoq. Aappaagumut illuliorneq aallartisarneqassaaq, sanaartornerlu ukiunik sisamanik sivisussuseqassalluni.

Ivigalersukkatut arsaannarfinngortussamut sanaartorfigissaaneq aallartilluareerpoq. Arsaattarfiup aasamut piareersimanissaa sanaartornermut immikkoortoqarfiup naatsorsuutigaa. Suliniutip naammassinissanut aningaasaliissutinik immikkoortitsisoqarpoq.

Ilulissani aqqusernit pingaarnerit ilaanni, Elisabeth Thomsenip Aqqutaani eqqakkat kuuffianni ukiorpassuarni ajornartorsiutit atugaasimapput. Ajornartorsiutit iluarsiiviginiarlugit suliniummut aningaasaliissutinik immikkoortitsisoqarpoq, taamaalillutik ruujoritoqqat taarserneqassapput.

Nutaamik skolehjemmiliortoqassaaq. Ilulissat eqqaani nunaqarfiit meerartaat Aasianni skolehjemmimiittarput. Skolehjemmi kommunimi allami inissisimaffeqarmat tamanna Avannaata Kommunianut aningaasartuutaavoq. Aamma Aasiaat Ilulissanit ungasinnerummat ilaqutariit meeqqallu atuartut imminnut qaninnerunissaminnik kissaateqarput. Taamaattumik skolehjemmimik nutaamik sanaartornissaq kommunalbestyrelsip aalajangiuppaa. Sanaartorneq ukiuni pingasuni ingerlanneqassaaq.

Sivisuumik angallateeqqaminnik iluarsaassisarnermut tunngatillugu atortorissaarutinik pitsaanerusunik aalisartut piniartullu kissaateqarsimapput. Taamaattumik angallatiminnik qaqitsissutissaminnik kranimik kissaateqarsimapput. Tamanna umiarsualivimmi qinngorlermi kranimut nutaamut aningaasaliissutinik immikkoortitsinermigut kommunalbestyrelsip akuerisimavaa.

Aqqusernit aserfallatsaalinissaat iluarsaannissaallu pisariaqarmat Ilulissani asfaltilersuisoqassaaq. Ukiut arfinillit qaangiupput aqqusernit kingullermik asfaltilersugaammata. Aggustimut asfaltilersuinissani ingerlatsinermut immikkoortoqarfiup naatsorsuutigaa.

Uummannaq
Uummannami paaqqinnittarfimmut tunngatillugu utaqqisuniittut amerlapput. Qarsutsineq pissutaalluni Nuugaatsiamit Illorsuarnillu innuttaasut Uummannamut nuutsinneqarnerisa kigornatigut utaqqisuni artukkiineq annertuseriaannarsimavoq. Taamaattumik nutaamik paaqqinnittarfiliornissamik kommunalbestyrelse aalajangiussisimavoq. Paaqqinnittarfik ukiut pingasut ingerlaneranni sanaartorneqassaaq.

Angallateeqqanik angallatinillu anginerusunik qaqitsinissamut piniartunit aalisartunillu atorneqarsinnaasumik krani nutaaq pisiarineqarpoq. Taanna aappaagumut ivertinneqassaaq, taamaalillutik atuisussat iluaqutigilersinnaassallugu.
Majoriaq iluarsaattariaqalerpoq, siunertamullu aningaasaliissutit immikkoortinneqarput.

Ukkusissanik kombi-husimik sanaartortoqarpoq. Tassaniipput illu sullissisrfik aamma paaqqinnittarfik. Nunaqarfimmi illu sullissivik nutaaq pisariaqartinneqarpoq, pigisaq assut aserfallassimammat. Illumi sullissivimmiipput errorsisarfik uffartarfillu, kiisalu katersortarfik mikinerusoq. Ukkusissat tassaavoq nunaqarfik aalisarluarfiusoq, taamaattumillu aalisarnermut tunngasumik amerlasuut suliffeqarput. Taamaattumik paaqqinnittarfik pisariaqartinneqarpoq, taamaalilluni inuutissarsiummut toqqammavigisassat pitsanngorsassammata. Ullumikkut ilaqutariit aalajangersimasumik suliffeqarniarnerat ajornakusoorsinnaasarpoq, angajoqqaani arlaat meeqqanik paarsisariaqartarmat.

Saattuni imartamut tummeqqiortoqassaaq, qeqertat eqqaanni immamik ungalusimaneqarneq pissutigalugu tulattarfiit puttasut atugariuminaammata. Aamma atortorissaarummik tassannga aalisartut piniartullu pisariaqartitsimmata kranimik nutaamik ivertitsisoqassaaq. Aalisartut ullumikkut angallateeqqatik iluarsaanniarunikkit imaluunniit aserfallatsaaliniarunikkit Uummanniartariaqartarput. Nunaqarfimmi kraneqalerpat pissutsit pitsaanerujussuit atugarilissavaat, Uummannamimi umiarsualivik assupilussuaq inissaaleqititsivoq.

Upernavik
Atuarfik iluarsaanneqaleruttorpoq, aappaagumullu suliaq nangissaaq.

Utoqqaat illuata allinissaanut aningaasaliissutit immikkoortinneqarput. Sanaartornerup aasamut aallartisarsinnaaniarlugu sanaartornermut immikkoortoqarfik iluarsiissummik nassaarniarluni ingerlatsivoq. Pilersaarut tassaavoq illup isaternissaa, inaanilu allissutaasoq sananeqassalluni. Isaterinermut suliniut ukiuunerata nalaani aallartisarneqassasoq naatsorsuutigineqarpoq. Aasamut toqqavissap sanaartugaanerata aallartisarsinnaanissaa sanaartornermut immikkoortoqarfiup naatsorsuutigaa. Utoqqaat illuanik allisaqarneq ukiunik pingasunik sivisussuseqassasoq naatsorsuutigineqarpoq.

Aamma Upernavimmi Tasiusamilu kraninik nutaanik ivertitsisoqassaaq.

Kullorsuarmi illut nutaat assut pisariaqartinneqarput, taamaattumillu aappaagumut illunik nutaanik sisamanik sanaartortoqassaaq.

Nuussuarmi illu sullissivik toqqaviata kiviartornera pissutigalugu annertuumik ajornartorsiorpoq. Taamaattumik ullumikkut illu atoruminaappoq, illumi tamarmi annertuunik quppaqartitermat. Illumik sullissivimmik nutaamik sanaartortoqassasoq kommunalbestyrelsip aalajangiussimavaa.

Inussiarnersumik inuulluaqqusillunga,

Palle Jerimiassen
Borgmesteri