Suliffissaaleqisutut nalunaarsorneqarneq

Pissutsit tamarmik ajunngikkaluarpata Kalaallit Nunaanni kikkut tamarmik sulinermikkut imminnut pilersorsinnaasussaagaluarput. Taamaattorli kikkut tamarmik suliffeqanngillat imaluunniit suliffissarsisinnaanngillat. Taamaanneranullu patsisaasut assigiinngitsorpassuusinnaapput. Ilaatigut assersuutigalugu makkuninnga patsiseqarsinnaavoq:

• Ilinniakkamik naammassinneqqammerputit
• Soraarsitaavutit
• Suliffimmi ajoqusersimavutit, ajoqusersimanerillu pissutigalugu tamakkiisumik sulisinnaanak
• Soraarsimavutit
• Ukiup qanoq ilinerani aalajangersimasumik sulisarputit
• Suliffissaaleqigallarputit, assersuutigalugu nioqqutissianik amigaateqartoqarnera imaluunniit tunisassiornerup unitsinneqarnera pissutigalugu

Illit arlaannik pissuteqartumik suliffeqanngikkuit, piaarnerpaamik suliffissaaleqisutut nalunaarsorneqarsimanissat isumagissavat.

Nalunaarsorneqarneq
Najukkanni suliffissarsiuussisarfimmut imaluunniit nunaqarfigisanni nunaqarfiup allaffianut nalunaarsortikkiartussaatit.

Suliffissaaleqisutut nalunaarsorneqarsimallutit pisinnaatitaaffeqassaatit, assersuutigalugu:

• Siunnersorneqarnissamut ilitsersuunneqarnissamullu
• Illit ataasiakkaatut iliuusissatut pilersaarutip suliarineqarnissaanut
• Pisortanit aningaasatigut ikiorserneqarnissamik

Suliffissaaleqisutut ullormi suliffissaaleqiffiusumit siullermit nalunaarsorneqarsinnaavutit. Illillu sapinngisamik piaartumik nalunaarsorneqarsimanissat soqutigisarissavat, tamatumani kingumoortumik atuutilersumik pisortat aningaasatigut ikiorsiisinnaanngimat.

Suliffissarsiuussisarfimmi sullissisut nipangiussimasussaatitaapput. Tamanna ima paasineqassaaq, suulluunniit eqqartukkasi allanut ingerlateqqinneqarnavianngillat.

Nassatassatit
Suliffissaaleqisutut nalunaarsorneqarumallutit suliffissarsiuussisarfimmut saaffiginneqqaaruit uppernarsassavat suliffeqarnak. Nassassavatit:

• Suliunnaarninnut uppernarsaat
• Qaammatini kingullerni pingasuni imaluunniit sapaatit-akunnerini kingullerni 13-ini aningaasarsiarisimasat allagartaat
• Ilinniagaqarsimanermut uppernarsaat
• Pikkorissarsimanermut uppernarsaatit
• Akileraarutinut allagartaq
• Kontonormu

Saaffiginnikkuit paasissutissiissutigissavat:

• Inuup normua ilinnut atuuttoq
• Najugarisat
• Oqarasuaativit angallattakkap imaluunniit oqarasuaativit normua
• Inuussutissarsiutitigut sunik misilittagaqarnerlutit
• Inuttut atugarisat allat, assersuutigalugit ilaqutariinnikkut pissutsit, ineqarnikkut atugarisat peqqissutsikkullu atugarisat

Suliffissarsiuussisarfiup paasissutissat atussavai illit pillutit iliuusissanut pilersaarusiornissamut aammalu nalilersinnaajumallugu suliffeqanngikkallarnermi ikiorsiissutinik pisartagaqarsinnaanersutit kiisalu taakkuninnga pisartagaqarsinnaaguit qanoq annertutigisunik pisartagaqassanersutit.

Malugiuk
Suliffeerunnerit nammineq pisuussutigisimagukku imaluunniit nammineq soraarniuteqarsimaguit suliffeqanngikkallarnermi ikiorsiissutinik pisartagaqarsinnaanngilatit. Taamaakkaluartoq suliffissaarussimasutut nalunaarsorneqarsimassaatit suliffissaaleqisutut pisinnaatitaaffiit allat pissarsiarisinnaajumallugit.

• Suliffissaaleqisunik sulilersitsineq
• Suliffissamut innersuunneqarneq
• Suliffissarsiorneq
• Nuttarnerulersitsinissamut ikiorsiissutit
• Piginnaanngorsaqqinneq aamma ilinniagaqarneq
• Pisinnaatitaaffiit pisussaaffiillu