airplanebooksbriefcase business cogs cross election entertainment fish house law lockmedicalpeopleselfservices socialtax

Akisussaaffiit aalajangiisinnaassutsillu Avannaata Kommuniani illoqarfinnut uterteqqillugit

15. juni 2018

Avannaata Kommuniani borgmesteritut nuannaarutigaara tulluussimaarutigalugulu matumuuna nalunaarutigisinnaagakku, kommunalbestyrelsip isumaqatigiilluinnarluni katersuuffigisinnaammagu akisussaaffiit aalajangiisinnaasutsillu kommunitsinni illoqarfinnut uterterarneqarlutik pisinnaanngornerat.

 

Qulaani pineqartoq pillugu kommunalbestyrelsip aalajangernera nunarsuatsinni kommunit annersaata tullianni  Avannaata Kommuniani innuttaasut kiffartuunneqarnerannut pingaaru-tilerujussuuvoq.

 

Allaffissornikkut suliassat qitiusumiit suliarineqartarnerat innuttaasunit iluarineqarsimanngilaq, taamaattumillu erseqqissumik kissaatigisimallugu innuttaasunik sullissinermut tunngassuteqartut najukkaminni suliarineqartarnissaat pisariaqartoq, qitiusumit allaffeqarfissuarmii isumagineqarani.

 

Innuttaasut kissaataat kommunalbestyrelsimit tusaaniarneqarsimavoq taamaattummilu aalajangiunneqarluni suliassat nammineq najugarisami suliarineqartalissasut kiisalu sulisut nammineq najukkaminni annertunerusumik akisussaaffilersorneqassasut kiisalu aalajangiisinnaassuseqarnerulissasut.

 

Tamatuma kingunerisaanik pikkorissarnerit pisinnaasanillu qaffassaanerit sumiiffigisani ingerlanneqalissapput, taamaaliornikkut sulisut siunissami suliassaminnut piareersarluarneqassallutik, suliassammi pineqartut maannakkut Ilulissani qitiusumiit isumagineqartaraluarput, allannguisoqassaarli.

 

Akisussaaffiit aalajangiisinnaassutsillu sumiiffigisanut uterterartinneqarneranni suliat sukkanerusumik aalajangiiffigineqartalissapput, innuttaasut iluaqutaasumik.

 

Qaasuitsup Kommunerisimasaani periusitoqqat atorunnaarsinneqassapput, kommunitsinnilu nutaami suleriutsit nutaat piviusunngortinnissaannut qilanaarpugut, periutsit nutaat nassatarissavaat allaffissornikkut nutartereqqinneq.

 

Ikinngutinnersumik inuulluaqqusillunga

Palle Jerimiassen
Borgmesteri