airplanebooksbriefcase business cogs cross election entertainment fish house law lockmedicalpeopleselfservices socialtax

Borgmesterip Ukkusissani innuttaasut naapippai

14. september 2019

Killitsisimanartumik naalagiartoqareermat Ukkusissani innuttaasut katersortarfimmi katerisimaartinneqarput, Avannaatalu Kommuniani borgmesterip Palle Jerimiassenip naatsumik oqaaseqarluni innuttaasunut misiginneqatiginninnini ersersippaa.

Naalagiartoqareermat innuttaasut katersortarfimmi kaffisoqatigiinnertalimmik naapisimaaqatigiisinneqarput.

Borgmesteri siusinnerusukkut tikimmat innuttaasut aqqusinermi unillutik borgmesterimik tikilluaqqusisarput, borgmesterilu misiginneqataanerminik ersersitsilluni. Katersortarfimmi borgmesterip isertut ataasiakkaarlugit assammillugit tikilluaqqusarpai. Inuit nipaatsumik oqaloqatigiipput nanertisimaneqarlunilu. Borgmesterilu nikueriarluni nipaanneq kipivaa.

- Kommunalbestyrelsi sinnerlugu nunaqqatigiinnut misiginneqataanera ersersikkusuppara. Neriuppugut alianaqisumik eqqorneqarnissinni tupaqqanersi aliasunnersilu qaangerluarumaarissi, borgmesteri Palle Jerimiassen oqarpoq, tamatumalu kingorna Ineqarnermut Attaveqaqatigiinnermullu Naalakkersuisup Karl Frederik Danielsenip misiginneqatiginnissutitut allakkiai apuuppai:

- Ukkusissani alianaqisumik pisoqarnerani ajunaartut ilaqutaannut nunaqqataannullu misiginneqataanerput Naalakkersuisut sinnerlugit matumuuna annguppara. Qanortoq inuunerup ingerlaqqinnissaani nukissamik pissaqartitaagisi.

Tamatuma kingorna Ilaqutareeqarnermut Ingerlatsivimmi pisortaagallartoq Bea Mølgaard Lennertip ilisimatitsilluni oqaatigaa innuttaasut sapaatip akunnerani aggersumi ikiueqqaarnerup tungaatigut qanoq ikiorserneqassanersut, taannalu novembarip qaammataani aamma ikiueqqinnermik malitseqarumaartoq.