airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommunia illoqarfiit ineriartortinnissaannut ingerlatseqatigiiffiliulerpoq

16. september 2019

Avannaata Kommunia illoqarfiit ineriartortinnissaannut ingerlatseqatigiiffiliortussanngorpoq, inissianik, illuutinik aamma aningaasaliissutigisassatut suliniutinik ineriartortitsinissaq,sanaartornissaq, piginnittuunissaq ingerlataqarnissarlu suliarineqartussanngorlutik. Tamanna kommunalbestyrelsimi ilaasortatisumaqatigiillutik akuersissutigalugu septembarip arfineq-pingajuani ataatsimiinnerminni nalunaarutigaat. 

Ingerlatseqatigiimmik pilersitsinissamik nalunaaruteqartussaatitaanik naapertorlugu ingerlatseqatigiiffik Avannaata Development A/S taamaasilluni 2019-imi oktobarip aallaqqaataani pilersinneqassaaq. Ingerlatseqatigiiffik pilersinneqareerpat pisortaqarfiit suliffeqarfiillu namminersortut suleqatigiinnerisigut illoqarfinnik ineriartortitsinissamik pilersaarusiornerit piareersarneqalissapput.

- Avannaata Development A/S-ip pilersinneqarnissaa sivisuumik piareersaasiorneqarpoq, illoqarfinnillu ineriartortitsinissamik ingerlatseqatigiiffik kommunimi tamarmiusumi ineriartortitsinissaq siunertaralugu pilersinneqarpoq. Ingerlatseqatigiiffimmi pisortassamik ukioq manna novembarip qaammataani atorfinitsitsinissarput naatsorsuutigaarput, Palle Jerimiassen, Avannaata Kommuniani borgmesteri oqarpoq.

Avannaata Development A/S Avannaata Kommunianit tamakkiisumik pigineqartussaq aallaniutigalugu 5 millioner koruuninik aktiatigut piginneqataassutilinnik pilersinneqassaaq. Ingerlatsivillu pilersinneqareerpat suleqatigiissitagallartussamik pilersitsisoqarneratigut ingerlatseqatigiiffiup aningaasaqarnikkut inissisimanera nalilersorneqassaaq. Suleqatigiissitami Avannaata Kommunia, Elmann Advokatpartnerselskab aamma Deloitte sinniisuutitaqassapput. Elmann Advokatpartnerselskab taakkuupput kommune sinnerlugu ingerlatseqatigiiffiliornissamik siunnersuummik suliaqartuusut.

Suleqatigiissitaagallartussami ilaasortat ingerlatseqatigiiffiup qanoq aningaasalersorneqarnissaanik siunnersuuteqassapput. Siunissaq qaninnerusoq eqqarsaatigalugu ingerlatseqatigiiffiup Avannaata Kommuniata illuutaanik ingerlatsisuulersinnaanera nalilersorneqassaaq. Tamatumalu kingorna suleqatigiissitami Avannaata Kommuniata illoqarfinnik ineriartortitsinissamik pilersaarusiaanik piviusungortitsinissaq aningaasalersorneqarnissaalu siunnersuusiorfigineqassaaq.

Suleqatigiissitaagallartussap aallaqqaammut aningaasalersorneqarnera Avannaata Kommuniata aammalu illoqarfinnik ineriartortitsinissamik ingerlatseqatigiiffiup akornanni kiffartuussinissamik isumaqatigiissuteqarnikkut isumagineqassaaq. Ingerlatseqatigiiffiup Avannaata Kommuniata illoqarfinnik ineriartortitsinissaanik ikiuinissaa kiffartussinikkut isumaqatigiissusiornikkut qulakkeerneqassaaq.