airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommuniani Naalagaaffiit Peqatigiit Nunarsuarmi anguniagai

24. september 2019

Avannaata Kommuniani Naalagaaffiit Peqatigiit 2030-mut attanneqarsinnaasumik ineriartortitsineq pillugu sulisunit isumasioqatigiissitsinera ulluni 23. aamma 24. september ingerlanneqarpoq.

”Ukiakkut 2020-mi qanoq Avannaata Kommuniani ukiuni quliniit tyvenut ineriartortitsissanerluta kommunalbestyrelsip anguniagaraa”, borgmesteri Palle Jerimiassen oqarpoq.

Borgmesteri sulisunut sapaatip akunnerani matumani ataasinngornermi marlunngornermilu Naalagaaffiit Peqatigiit nunarsuaq tamakkerlugu anguniagaanik ilinniarniarlutik isumasioqatigiittussanut tikilluaqqusilluni oqalugiarpoq. Ullumikkut Avannaata Kommuniani kommunemut pilersaarut kommunip ineriartornissaa pillugu annikitsunik annertunerusunillu toqqartunik anguniagaqarpoq, kisianni aappaagu mittarfiup uiguneqarnissaanik aallartitsinissaq ima isumaqarpoq, kommuni inuiaqatigiinni ineriartornerup tungaatigut allannguutissanut piareersartariaqartoq. Taamaattumik suliaq maannagaaq aallarnisarneqarpoq.

Avannaata Kommuniata naammagisimaarlugu maluginiarpaa, ukiami matumani Naalakkersuisut Nunarsuarmi Anguniakkat aamma Kalaallit Nunaat pillugit nalunaarusiamik Inatsisartunut saqqummiussiniartut. Naalagaaffiit Peqatigiit attanneqarsinnaasumik ineriartortitsinermi 2030-mut anguniagaat nunat tamalaat akornanni inuiaqatigiit ataatsimoorlutik nunarsuaq tamakkerlugu innuttaasunik anguniagassatut siunniussimasaannut tikkuussipput. Ukiuni aggersuni suliassat Nunatsinni inatsisit naapertorlugit aalajangerarneqarsimasut taakku, anguniakkanik tikkuussisut kommunip atorniarpai.

Sulinerup immikkoortuani siullermi ukiaq manna kommunimut pilersaarummi anguniakkat Nunarsuarmi Anguniakkanut naleqqiullugit killiffiat suliarineqassaaq. Kommunalbestyrelsip 2020-mut missingersuutissatut siunnersuutip naggataarutaasumik suliarinerat atatillugu, kommunimi aningaasartuutissat Nunarsuarmi Anguniakkanut tunngassuteqartut sorliit attuumassuteqarnersut qanoq isikkoqarnersut misissussavaat.

”Paasissutissat kommunalbestyrelsimut ukiaq manna saqqummiunneqartussat ukiumi tulliuttumi innuttaasunik oqaloqateqarnissatsinnut tunngaviussapput. Innuttaasut kommuni tamakkerlugu Nunarsuarmik Anguniakkanik ilisimasaqarlualernissaat, uannut pingaaruteqarpoq, taamaasilluta ataatsimoorluta anguniakkat uatsinnut attuumassuteqarnersut ataatsimoorluta oqaloqatigiissutiginiassagatsigit. Tamanna tunngavigalugu anguniakkat naammassinissaannut qanillattornissarput suliarissavarput, tamatumanilu suli suliassaqarpugut aaqqitassatsinnik”, borgmesteri Palle Jerimiassen naggasiivoq.