Sila nillikujukkaluartoq seqinnerlunili KJ Greenlandimi sanaartortut, Realdania By & Bygimit, kommunimit aammalu Namminersorlutik Oqartussanit sinniisuutitat Kangiani Illorsuup silataani nappaanersiorlutik ippassaq pingasunngornermi katerisimaarput.
- Uppik maanna missimalereerluni isikkani qaqqami maani maggusimatilerpai. Maanna meqqorissarsinnaalerpoq tamatsinnullu malugeqqusaalerluni.
- Illorsuup salliligartarsui sisaasut napparneqarsimalereerput igalaartarsuilu inissinneqareerlutik. Sanaartugaq matujartuaarneqarluni inissikkiartorpoq sananeqaatsimigullu kusanassutsi ersersikkiartuinnarlugu. Illorsuup sananeqaatai oqimaatsorujussuit peqqissaarussilluinnarnissamik piumasaqaatitallit maanna inissereerpasi. Tamatumani oqaannassaanga – torrallaavusi, Frants Frandsen Realdania By & Bygimi suliniutilerinermi aqutsisoq oqarpoq.
Frants Frandsen Realdaniap pisortaaneranit Jesper Nygårdimit aammalu Realdania By & Bygip pisortaaneranit Peter Cederfeldimit inuulluaqqussutit ilaatigut ima oqaasertallit apuuppai:
- Suliap inernera kusanarluinnartoq piffissap sivikitsuinnaap ingerlanerani naammassineqarsimavoq. ”Nivariarneq siulleq” qaammatit sisamat matuma siorna pivoq. Ullumili nappaanersiorsinnaanissatsinnut ukiut 15-it matuma siorna nunap matuma Nunarsuarmi Kingornussassatut UNESCO-mit 2004-mi toqqarneqarneraniit allartippoq.
- Sanaartortoqartillugu ukiut 15-it sivisuginarsinnaapput. Sanaartukkamiilli sumiiffik nuna manna pinngortitatigut oqaluttuarisaanikkullu ukiuni tusintilippassuarni utoqqaassuseqartoq qiviariarutsigu ukiut 15-it uisoreriarnerinnaavoq. Ilaatigullu tamakkuupput Kangiani Illorsuaq naammasseriarpat oqaluttuarisartagassagut.
Allattoq assiliisorlu: Káte Hansen, khan@avannaata.gl
