Illoqarfinni Uummannami, Upernavimmi, Qaanaami nunaqarfimmilu Kullorsuarmi tamani inunnik isumaginninnermi siunnersortimik ataatsimik atorfinitsitsisoqarnissaanik aningaasaqarnermut ataatsimiititaliamit inassutigineqartoq kommunalbestyrelsimi partiit tamarmik taperserpaat. Isumaginninnermi siunnersortit ataasiakkaat illoqarfigisamik nunaqarfii aamma suliassaqarfigissavaat.
Ilulissani atuarfinni inunnik isumaginninnermi siunnersortimik atorfeqartitsinermi pitsaasunik misilittagaqarneq aammalu ilinniartitsisut atuartitsinerup ilarujussuani atuartunik aqukkuminaatsunik oqaloqateqartarnerat isumaginninnermut siunnersortimik atorfinitsitsinissami tunngavilersuutigineqarput. Taamatuttaaq partiit oqaaseqartartuisa meeqqat illersuisuata Upernavimmut, Uummannamut Qaanaamullu angalasimanerani nalunaarusiai innersuussutigaat, taakkunanimi takuneqarsinnaavoq inunnik isumaginninnermik siunnersortimik atorfinitsitsinissaq pisariaqartinneqartorujussuusoq.
Atorfinitsitsinermi tunuliaqutaasoq
Inunnik isumaginninnermi siunnersortimik atorfinitsitsinissaq kommunalbestyrelsip siuliani septembarip arfineq-pingajuani ataatsimiinneranit aallaaveqarpoq, tassanimi aalajangerneqarpoq Ilulissat atuarfiini marluusuni isumaginninnermik siunnersortitut atorfik ataatsimik ilaneqassasoq, taamaasilluni atuarfiit tamarmik immikkut inunnik isumaginninnermi siunnersortimik atorfinitsitaqalerlutik. Isumaginninnermi siunnersortip atorfeqareersup atuarfinni marluusuni siunnersuisarneq isumagisarsimagaluarpaa. Kommunalbestyrelsip ataatsimiinnerani tassanissaaq aalajangerneqarpoq kommunip sinnerani atuarfinni inunnik isumaginninnermi siunnersortinik pisariaqartitsineq misissuivigineqassasoq.
Illoqarfinni nunaqarfimmilu pineqartuni inunnik isumaginninnermi siunnersortinik atorfinitsitsinissamik pisariaqartitsineq ilaatigut nunatsinni meeqqat pisinnaatitaaffii pillugit sullissiviup MIO-p aamma Avannaata Kommuniani Ilaqutareeqarnermut Ingerlatsiviup suleqatigiillutik misissuisimanerannit aammalu Peroriartortitsinermut Ingerlatsiviup misissuisimanerinit aallaaveqarpoq.
Meeqqat oqaaseqartartuata 2019-imi angalasimanerani nalunaarusiami ilaatigut allassimavoq Qaanaami isumaginninnerup tungaatigut ikiortarialinnik ikorfartortarialinnillu meeraqarlunilu ilaqutareeqartoq aammalu Uummannami, Upernavimmi nunaqarfiinilu tarnikkut isumaginninnikkullu ajornartorsiutilinnik meeraqarlunilu inuusuttoqartoq, ajornartorsiutitillu pillugit saaffissaaleqisartut.
Inunnik isumaginnermi siunnersortinik sisamanik atorfinitsitsinissamut aningaasartuutissat 2020-mi aammalu ukiut tulliini 2021-imii 2023-ip tungaanut missingersuusiornernut ilanngunneqarput.
Allattoq: Káte Hansen, khan@avannaata.gl
Asseq: Toqqorsivimmit