airplanebooksbriefcase business cogs cross election entertainment fish house law lockmedicalpeopleselfservices socialtax

Kajumittut iffiukkanik Qaanaami agguaasut

Qaanaami meeqqat 50-it missaanniittut inersimasullu 20-t kisimiittut, pisinnaasakinnerusut aammalu utoqqaat angerlarsimaffimminniittut nuannaarutigeqisaannik kaageerarpassuarnik allanillu iffioqatigeeriarlutik aqquaapput.
18. december 2019
- Sapaassuit pingajuanni meeqqat inersimasullu Qaanaami kisimiittunut, pisinnaasakitsunut aammalu utoqqarnut angerlarsimaffimminniittunut agguaapput. Katillugit puussiaaqqat iffiukkanik imallit 53-it agguaanneqarput, pajugutinillu tigusisut tamarmik nuannaarnermik, tuppallernermik qujamasunnermillu oqariartuuteqarput, Qaanaami najukkami ataatsimiititaliami siulittaasoq Mathæus U. Johansen oqaluttuarpoq.

Innuttaasut-uku kajumissutsiminnik suliniuteqarniarlutik iffiorniarlutillu najukkami ataatsimiititaliamut 5.000 koruuninik qinnuteqartuusimasut. Aaqqissuisut qinnuteqaatiminni tunngavilersuisimapput iffioqatigiinnissaq nuannaaqatigiilluni ingerlanneqassasoq, kikkut tamarmik peqataasinnaassasut aammalu iffiukkat kisimiittunut, pisinnaasakinnerusunut kiisalu utoqqarnut angerlarsimaffimminniittunut agguaanneqassasut.

Qinnuteqaataat najukkami ataatsimiititaliamit tapersersorneqarpoq, tamatumalu kingorna meeqqat inersimasullu nuannisaqatigiillutik iffiortuatsianngorsimapput. Kajumissutsiminnillu iffioqatigiit ikioqatigiillutik iffiukkatik poortuuteriarlugit agguassimavaat.

Assit ataaniittut namminneq oqaluttuartut takukkit.

Allattut: Mathæus U. Johansen aamma Káte Hansen, khan@avannaata.gl
Assit: Mathæus U. Johansen