airplanebooksbriefcase business cogs cross election entertainment fish house law lockmedicalpeopleselfservices socialtax

Nick Nielsen pisortaanertut atorfinitsinneqartoq

Kommunalbestyrelsimi ilaasortat isumaqatigiissut immikkut ittumik ullumikkut ataatsimiinnerminni Nick Nielsenip Avannaata Kommuniani pisortaanertut atorfinitsinneqarnissaa aalajangiuppaat.
30. januar 2020

Nick Nielsen 2019-imi novembarip aallartilaarneraniilli Avannaata Kommuniani pisortaanertut atorfeqarallartinneqarsimasoq 2020-mi februaarip aallaqqaataani pisortaanertut atorfinissaaq.

- Kommunimi sulinitsinni Nickimik tatigisaqaqateqarsimavunga, maannalu pisortaanertut atorfinitsinneqarneragut suli immitsinnut qaninnerulertussaavugut. Kommunimi sulisutta toqqissisimasumik avatangiiseqarlutik ineriartornissaat anguniagaraarput. Ilisimavaralu Nicki aamma taamatut eqqarsaateqartoq. Taamaammat kommunalbestyrelsip pisortaanertaatsinnik atorfinitsitsinera nuannaarutigaara, Palle Jerimiassen Avannaata Kommuniani borgmesteri unnersiorpoq.

Nick Nielsen civilingeniøritut ilinniagaqarsimasoq nunatsinni politikkimik aallussaqarsimavoq ukiorlu ataaseq affarlu Ilinniartitaanermut, Kultureqarnermut Naligiissitaanermullu Naalakkersuisuusimalluni. Tamatuma kingorna Kommuneqarfik Sermersuumi avatangiisilerinermi ingeniøritut ukiuni marlunni sulivoq, ukiuni pingasuni Qaasuitsup Kommunerisimasaani teknikkeqarnermut pisortatut sulisimalluni, atorfimmilu tassaniiginnarluni ukiuni kingullerni marlunni Avannaata Kommuniani sulilluni.

- Kommunalbestyrelsip uannik tatiginnilluni atorfinitsitsinera nuannaarutigaara. Avannaamiuuvunga kommunitsinnilu ineriartorneq sunniuteqaqataaffigerusuppara. Pisortaaninngornikkut annertuumik akisussaaffeqalerpunga. Kommunerput ineriartupiloorpoq siunissamilu suliassanik pissanganartorpassuarnik suliassaqarnissatsinni kommunimi sulisut 1.700-uusut suleqatigalugit suleriaqqinnissaq qilanaaraara, Nick Nielsen, Avannaata Kommuniani pisortaaninngorlaaq oqarpoq.

Pisortaanertut atorfininniarlutik qinnuteqartut aqqaniliupput.


Nick Nielsen pisortaanertut 2020-mi februaarip aallaqqaataani atorfinissaaq. Uani borgmester Palle Jerimiassen nikorfaqatigaa.