Markus Jensen 2019-imi Avannaani Timersullammattut toqqagaasoq ippassaq tikillugu qilalugarniaqataasimavoq, namminerlu ataatsimik pisaqaqataasimavoq, uffa massa ilatik arlaleraartaqattaarsimasut.
Markus meeraallunili sungiusariarniarluni Saqqamiit Ilulissanut utimullu uteqattaartuarsimavoq. Siumut utimullu 200 kilometerit missaannik isorartutigaaq. Siumuinnaq imatigut angalaneq sila apeqqutaatillugu nalunaaquttap akunnerinik marlussunnik sivisussuseqartarpoq. Sungiusariarniassammat angutaata sapaatip akunneranut arlaleriarluni angallattariaqartarsimavaa. Markusilu inuusuttuaranngorami namminerlu angallatitaarami nunaqarfimmiit illoqarfimmut uteqattaarnerit ingerlatiinnarpai.
- Timersornerma tungaatigut eqqarsaatersorpiarneq ajorama timersullammattut toqqarneqarnera tupaallaatigilaarpara. Aamma angajoqqaama aapparmalu tapersersuiuarnerat pingaartumillu ukioq kingulleq angusimasakka eqqarsaatigaakka, Markus Jensen oqarpoq.
Aningaasarsiorneranut sunniuteqarpoq
Markus Jensenimik 2019-imi Avannaani Timersullammattut innersuussinermi timersoqatigiiffimmit Nagdlúnguaĸ-miit ilaatigut ima tunngavilersuuteqartoqarpoq:
- Piniarnermik aalisarnermillu inuusutissarsiortuulluni timersuummik qaffasissumik ingerlatsiniarneq imaannaanngilaq, pingaartumik nunaqarfinnguami najugaqarluni kilometererpassuillu umiatsimik angalaqqaarluni aatsaat sungiusarsinnaalluni. Taamaammat Markusip maligassiuinera annertooq, piumassusermik annertuumik takutitsisoq nersugassatut innersuupparput.
Timersullammattut toqqarneqartup piniartutut aalisartutullu inuussutissarsiummik timersuummillu aallussiniarnerup ilungersunarsinnaaneranik oqaaseqarneq isumaqataaffigaa.
- Timersorneq aallunniartillugu inuussutissarsiuteqarniarninnut akornutaasarpoq. Sungiusarninnummi piffissangaatsiaq atortariaqartarpara, taamalu piniariarsinnaanangalu aalisariarsinnaanngikkaangama isertitaqarniarnikkut annaasaqaatigisarpara, tamannalu ilaatigut ilungersunalaarsinnaasarpoq, Markus Jensen oqarpoq.
Saqqamilu nunaqqataasut Markusip angusaa pillugu persuarsiortunnguusimapput. Tamanna ukiut tamaasa katerisimaartarnermut atatillugu decembarip 28-ani pisimavoq.
- Katerisimaarnermi nalunaaqutaq arfinermiit qulingiluat tungaannut pisumi Saqqami innuttaasut 130-t misserluinnaaniittut affaasa missaanniittut peqataapput. Tassani Markus Jensenip timersullammattut Avannaata Kommunianit toqqarneqarsimanera nalunaarutigineqarpoq. Nereqatigiippugut assigiinngitsunik aliikkusersuinertalimmik, katerisimaarnerlu qummoroortarnermik naggaserneqarpoq, Susanne Nielsen Saqqami isumaginninnermi ikiortitut atorfeqartoq oqarpoq.
2019-imi timersullammattut toqqarneqartup angusarissaarsimanini sulerisimanerminut allattugaatimini uppernarsisinnaalereersimavaa. Futsalimik nunatsinni pissartanngorniunnermi Nagdlúnguaĸ-mi iligisartakkani ilagalugit sølvinnassimavoq, timersoqatigisartakkani taakku aamma ilagalugit 2019-imi nunatsinni pissartanngorniunnermi pissartanngoqataavoq, innuttaasut sms-ertinneqarnerat tunngavigalugu KNR-imit ”Ukiumi arsaatillammattut” toqqarneqarpoq ukiumilu tassani Nuummi futsalimik arsaannermi nalilersuisartunit pissartanngorniunnermi arsaateriallaqqinnerpaatut toqqarneqarluni.
Taamaammallu arsaattartutut piukkunnaateqalualersimasoq Kalaallit Arsaattartut Kattuffiannit aamma arajutsisimaneqarani nunarput sinnerlugu futsalertartuni 2017-imi ilaatinneqalerpoq.
Markus aappanilu Luuiisa Hansen marlunnik meeraqarput. Siunissanilu pillugu ima oqarpoq:
- Timersuutiga suli aallukkusuppara, pingaartumillu ukioq kingulleq angusimasakka annertusarusuppakka, aasarulu Nuummi Nordic Cupeqalerpat nunatsinni sungiusimasatsinni futsalimik arsaannissaq nunanit avannarlerneersunit peqataaffigineqartussaq qilanaareqaara.
Allattoq: Káte Hansen, khan@avannaata.gl
Assit: Susanne Nielsen
