- Avannaata Kommuniani meeqqat inuusuttullu pitsaasunik toqqissisimanartunillu tunngavissinneqarnissaat politikkikkut suliniuteqarfigereerpagut, taamalu naartusut siusinaartumik iliuuseqarfigineqarnerisigut aammalu kommunimi suliaqartut aammalu ernisussiortut, meeraaqqerisut, meeqqeriviit atuarfiillu akornanni suleqatigiinnerisigut meeqqat inuusuttullu inuunerminni sapinngisamik pitsaasumik aallartissinnaanissaat qulakkeerniarsaraarput.
- Ilaquteriippassuaqarpoq ingerlalluartunik, kisianni aamma meeraqarpoq immikkut ikiorserneqartariaqartunik, tamatumanilu siusinaarluni iliuuseqarnissaq pingaaruteqarpoq. Taamaammat Naalakkersuisut misiligutitut suliniuteqarniarneranni Avannaata Kommuniata misileraaffittut atorneqarnissaa tulluutiinnarpoq. Neriuutigaarpullu Peqqissutsimut, Isumaginninnermut Inatsisinillu Atuutsitsinermut Naalakkersuisoq Martha Abelsen suleqatigilluarumaaripput nunatsinnilu kommuninut allanut iluaqutaajumaartussanik angusaqarumaartugut, Avannaata Kommuniani borgmesteri Palle Jerimiassen oqarpoq.
Suleqatigiinnissamik isumaqatigiissummi ilaatigut isumaqatigiissutigineqarpoq misiligutitut suliniuteqarnissaq Ilulissani, Ilimanami, Oqaatsuni, Qeqertami aamma Saqqami aallartinneqassasoq, misilittakkallu tamatuma kingorna kommunip sinnerani misileraalluni ingerlanneqarumaartut.
Nunatsinni meeqqat atugarissaarnerulernissaannut pitsaanerusumillu ineriartornissaannut misiligutitut suliniuteqarnissaq pillugu 2020-mi februaarip qulingani atsioqatigiissutigineqarpoq.
Isumaqatigiissut tamakkiisoq uani aaneqarsinnaavoq.
Allattoq: Káte Hansen, khan@avannaata.gl
Asseq: Namminersorlutik Oqartussat