Qulequtsiussaq paatsoorneqarsinnaalluinnarlunilu kukkusuuvoq

Akiligassaq tingugakku ingerlaannaq akilerpakka. Uani erseqqissaatigissuara akiligassaq uannut nassiunneqarsimavoq marsip sisamaani 2019, taava marsip arfineq-pingajuani 2019-imi akilerpara, akiligassami akiliiffissatut ulluliuneqartoq malillugu. Akiliisitsiniartarfimmik qunusaarneqanngisaannarnikuuvunga piffissarititaasup iluani akiliinikuungama. Sermitsiap taamatut allannera ilumuunngilluinnarpoq, Sermitsiaq pressenævnimut tunniutissavara eqqunngitsunik pasisaaraluni saqqummiinera pillugu.

Uani akiligassami allaqqasoq akiligassatut ulluliussaasoq akiliiffissaq ullunik 14-nik qaangeraanni akiliisitsiniartarfimmut ingerlatitsisinnaaneq akiligassani tamani allaqqasarpoq, uannut taanna tutsinniarneqarnera eqqunngitsumik saqqummiineruvoq.

Aap ajuusaarpunga taamatut billetsinik inniminniisoqarsimammat, ajortuliornissamik siunertaqanngisaannarnikuuvunga uani qulakkeerusuinnarnikuuara angalaqatigiinnissarput. Suliaq pillugu kommunit nakkutilliisoqarfiat aamma inatsisilerituut naliliisinneqarnikuupput, taakkualu uppernarsarpaat unioqqutitsisoqarsimanngitsoq. Aamma Aningaasaqarnermut ataatsimiititaliamut qaqinneqarnikuuvoq, taakkualu tusaatissatut tingunikuuaat aammalu kommunalbestyrelsimut ilisimatitsissutaassooq tulliani kommunalbestyrelsi ataatsimiilerpat. Kukkusoqarsimappat uanga akisussaaffigaara aamma tamanna ajuusaarutigaara.

San Fransisco eqqaaneqarmat tupingusuppunga, San Fransisco aqqusaarlugu ICC Barrow-mi Alaskami ataatsimeersuartoq peqataaffigiartornikuuara aamma utimut San Fransisco aqqusaarlugu, ICC Ilulissani 2022-mi ataatsimiinnissaa anguniarlugu angalanikuuvunga siunertarisarpullu pissarsiaralugu 2022 ICC Ilulissani ataatsimeersuartussanngorlugu.

Palle Jerimiassen, Avannaata Kommuniani borgmesteri