airplanebooksbriefcase business cogs cross election entertainment fish house law lockmedicalpeopleselfservices socialtax

Angalareernerup kingorna mattusimasariaqarallarneq artornartoq

Aka Grønvold Avannaata Kommuniani Ilinniarnermut Ingerlatsivimmi pisortaasoq sulinerminut atatillugu Danmarkimut angalareernermi kingorna coronap tuniluunnera pissutigalugu ulluni 14-ini angerlarsimalluni mattusimasussanngortitaavoq. Corona pissutigalugu aalajangersagaqalermat ilaqutaasa timmisartoqarfiliarlutik niuffiorsinnaannginnamikku timmisartoqarfiup tungaanut biilinut unittarfiliarlutik tikilluaqqusiartorput. Aka mattusimajartorluni biiliminik sanioqqukkami qanillisinnaanatik imminnut isigiinnartariaqarsimapput, kingornalu avissaarlutik. Aka biilerluni aallarami ilaquttani biilimiittut nikallungalluni aalateriffigiinnartariaqarsimavai.
2. april 2020
Akap angerlarsimaffimmi mattusimagallarnissaa ittuanit aalajangerneqarpoq. Tamanna pivoq coronamik tuniluunneq Danmarkimi aallarteruttortoq aalajangersakkallu ullormiit ullormut sukateriffigineqaleruttortut. Taamatullu aamma nunatsinni pisoqarpoq. Taamani nunatsinni coronap tuniluunneranut atatillugu taaguut ataasiinnaq, tassalu ”angerlarsimaffimmi mattusimaneq” kisimi ilisimaneqarpoq.

Aka ilisimatinneqarpoq angalanerminit uteruni suliffimminut suliartoqqusaajunnaarallassasoq angerlarsimaffimmilu ulluni 14-ini mattusimagallartariaqartoq. Kommune utaqqiisaasumik iniuteqanngimmat Aka ilaquttanilu aalajangerput apparisaa ernerallu arfineq-pingasunik ukiulik Akap angajoqqaavini najugaqarallassasut, taamaasilluni Aka angerlarsimaffimmini mattusimagallarniassammat. Tamanna Akamut ilaqutaanullu nutaajuvoq, aallaqqaataanilu illakusuutigiinnartarpaat. Kingornali paasivaat taama ajornanngitsiginngitsoq.

Maqaasinerujussuaq
- Ilaquttanit avissaaqqasariaqarneq ilungersunaqaaq. Pingaartumik sapaatip akunnera siulleq ajornerpaavoq, immitsinnullu maqaaseqaagut. Naak qanittuaraalluta najugaqaraluarluta immitsinnut najorsinnaanngilagut. Piffissap ilaani aapparma sapilerlugu oqarpoq naammagiinnarsinnaajunnaarnerarlugu angerlalerlutillu. Oqaloqatigiissutigeriaratsiguli mattusimagallarnissannik peqquneqarnera malittariaqarlutigu isumaqatigiissutigaarput. Atuarfinnut pisortatut atorfeqarnera pissutigalugu akisussaaffeqarnera ilisimaarilluinnarpara, taamaammallu mattusimagallarnissamik peqquneqarnera malinniarlugu aalajangersimallunga. Panipput GU-rnerminiit angerlartariaqalersoq taamaasinerani tikippoq. Sulininnut atatillugu ulluni 14-ini angalaqqammerpunga, sulilu ulluni 14-ini ilaquttannit avissaaqqanissaq oqimaaqaaq. Naak Facetimetigut allatigullu immitsinnut ullut tamakkiallugit attaveqatigiittaraluarluta immitsinnut maqaasiuaannarpugut, Aka eqqaamasalikkersaarpoq.

Aka sulinerminut atatillugu angalanermini imminut mattusimalereerpoq.

- Danmarkimiinnera avaanngunaqaaq. Sapaatip akunnerani kingullermi hotelimi inigisanni mattusimaniarlunga aalajangerpunga, metro-t ikiffigerusukkunnaarpakka, nerisassakka ininnut aggiutsittalerpakka hotelittalu silataani pisuttualaaginnartalerlunga. Ullaakkut unnuisarfiup neriniartarfianut ullaakkorsioriartoraangama unnuisarfimmi najugaqartuusugut immikkoortitaarluta issiasarpugut. Quersortoqartorlu isersimasut tamatta quersortup tungaanut qiviakaasarpugut. Taamanili aalajangersakkanik nammineq malitassannik aalajangersagaliorpunga. Elevatori atorusukkunnaarlugu majuartarfiit atortalerpakka, assakka asakulavakka aammalu inuit sapinngisamik nigorsimanialerlugit, Aka oqaluttuarpoq.

Aka sulinerminut atatillugu angalagami atuarfimmi pisortat allat pingasut angalaqatigai, taakkulu aamma imminnut mattusimalerniarlutik aalajangerput. Nunatsinni atuarfiit EU-mut suleqatigiinnissamik isumaqatigiissutaat 200 millioner koruunit angullugit aningaasartalik EU-meersunik ataatsimeeqatigiissutigiartorlugu Bruxellesiliartussaasimagaluarput. Bruxellesili matuneqarmat angalanissaraluat taamaatiinnarneqarpoq. Taarsiullugu ataatsimiinneq nunatta Danmarkimi sinniisoqarfianit Skypikkut ingerlanneqassasoq aalajangiunneqarpoq. Sunilu tamani matooraanerit pissutigalugit ataatsimiinnissaagaluaq aamma piviusunngortinneqanngitsoorpoq. Ataatsimiinnissarlu qaqugumuussagaluarnersoq kinguartinneqarallarpoq.

Peqqissutsikkut navianartorsiorsoraaq
Aka unnuisarfimmi mattusimagallarnermini avaanngusukujukkaluarluni toqqissisimakannertutut misigaaq, aatsaallu nunatsinnut uternialerami peqqissutsimigut navianartorsiortutut misigilerpoq. Timmisartoqarfiliarnialerami tuniluussuuttoq pissutigalugu taxarusunnani pisuinnarniarluni aalajangerpoq. Illoqarfiup qeqqa inuillu nigorsimaleriaramigit aatsaat timmisartoqarfiliarniarluni metronut ikivoq.

- Tunillatsissimasinnaaninnik malussanngilanga. Siusinnerusukkut paasissutissiissutigineqartoq eqqarsaatigaara, tassalu coronamik tunillatsissimagaanni ullut marluk missaanni tunillaasoqarsinnaanngilaq, ersiutillu siulliit aatsaat sapaatip akunnerata siulliup ingerlareernerani takkuttartut. Tunillatsissimanermut arlaannik ersiutaasinnaasunik malussarnissara utaqqigaluarpara, tamannalu ernumanarpoq. Tuppallersaatigiinnarparali peqqikkama. Danmarkimut aallarnialerama ilaquttakka oqarfigaakka tunillatsissagaluaruma taava mattusimasariaqassallunga qaangiukkumaartorlu. Taamani tunillatsissimasut Danmarkimi pingasuinnaapput, nunatsinnullu uternialernitsinni amerleriapilooreersimapput.

- Timmisartoqarfiliarneq nunatsinnullu angalaneq toqqissisimananngilluinnarpoq. Inuit uiartingaatsiarlunga ingerlasarput. Timmisartumi sanilima sanilerinera toqqissimanngissutigigaa malugisinnaavara. Soorlu quiasaarniartuusaarluni oqarpoq tungaanut anersaartussanngitsunga aammalu qiviartassanngikkiga. Eqqarsaannarpunga taamatut oqarnini ilumoorukkaa, uangalu piumasaa ataqqillugu taamaaliorfigissanngikkiga, Aka oqarpoq.

Imminnut isigiinnartariaqarput
Aka sulinerminut atatillugu angalakkajuttuuvoq, taamaammallu aallariartoraangami ilaqutai aterfiorneq ajorput tikikkaangallu niuffiorneq ajorlutik. Angerlarsimaffimminili mattusimalernissaa pissutigalugu ilaqutai timmisartoqarfiup tungaanut biilit unittarfiannukarlutik tikilluaqqusiartorput.

- Siusinnerusukkulli isumaqatigiippugut coronaqarneranik aalajangersakkat pissutigalugit timmisartoqarfiliassanngitsut. Biilit unittarfiannut apuukkama ilaquttakkalu immitsinnut qanillisinnaanngilagut, immitsinnullu ungasianiit isigiinnartariaqarpugut. Misigisaq assut eqqumiippoq, ilami nalunartoqaqigami. Aammami aapparma ilaqutaani ernumanarsorsiorsinnaasunik ilaqaratta, taamaattumillu mianersornerusariaqarluta. Allaanngilaq uanga navianartuusunga. Mattusimajartorniarlugu biilinik aallalerama ilaquttakka biilimiittut allatut iliorsinnaannginnama aalateriffigiinnartariaqarpakka, Aka oqaluttuarpoq.

Aka angerlarsimaffimmini mattusimaleqqaarami qanoq inissisimanini facebookikkut nassuiaatigaa, paasilluarneqarporlu. Tamatuma kingorna sulilluni ulappuserpoq. Avannaata Kommuniani atuarfinnut qullersaasutut atuarfiit upalungaarsimanissamut pilersaarusiuuttariaqarpai, ilutigalugulu atuarfiit matuneqarallarnissaannut pilersaarusiamik allattariaqarpoq kiisalu atuarfiit matoqqanissaanni atuartitsissutissanik pilersaarusiorluni allaaserinnittariaqarluni. Tamatuma saniatigut naalakkersuisoqarfinneersunik, nammineq ingerlatsivimmineersunik aammalu kommunineersunik ataatsimeeqateqaqattaarpoq. Sulinermigut coronamut eqqarsaateqarnini ingalassimaarsinnaavai. Ulluunerani ataatsimiinnerit ingerlattarpai, unnukkullu allaaserisaqartarluni. Nalunaaqutarani sulinini iluarisimaarlugu ulapporinnaraa. Taavali sapaatip akunnera qaangiutiinnartoq sulerusussusaa appariartorpoq.

- Naak suli suliassaqaraluaqalunga sulerusussusera appariartuinnarpoq. Tamanna kisimiippallaarnermik peqquteqarunarpoq. Kiserliortutut misigilerpunga sulerusussuseerukkiartuinnarlungalu. Pisortarisara sianertarpoq paasiniarlugulu suliakka sumut killinnersut. Ilungersorlunga suliniarsarigaluarpunga, kisianni suliakka aatsaat suliartoreernermi kingorna naammassivakka, Aka oqaluttuarpoq.

Aka isumaqarpoq angerlarsimaffimmi mattusimaniaraanni mattusimanissarlu ilungersunarsissanngippat suliaqarnissaq pingaarutilerujussuusoq. Angerlarsimaffimmi mattusimasariaqarnermit aniguineq pillugu oqarpoq:

- Ilaquttakka angerlarmata iluarusunnaqaaq aamma nuannisartaqaagut, kisianni nakorsaaneqarfimmit naalakkersuisuniillu mianersoqqussutitut aalajangersakkat pissutigalugit suli eqqitaarsinnaanatalu immitsinnut qanillivallaarsinnaanngilagut. Taamaakkaluartorli najoqqileratta iluaqaaq. Aamma suliartoqqissinnaaleruni iluaqaaq.

Aka coronamik tunillatsissimasinnaanerminut misissugasssamik peersivigineqanngisaannarpoq.

Allattoq: Káte Hansen, khan@avannaata.gl
Asseq: Aka Grønvold

Avannaata Kommuniani atuarfinnut pisortaq Aka Grønvold Danmarkimi unnuisarfiup silataani pisuttatsiarnermi ilaanni.