airplanebooksbriefcase business cogs cross election entertainment fish house law lockmedicalpeopleselfservices socialtax

Timersortartut pissamaaqisut arsaattarfittaassaq aputaajaraat

N-48-mi timersortartut meeqqat, inuusuttut inersimasut aammalu tapersersortaasut arsaattarfittaassamik ivigaasalersuinissaq aallartinneqajaaqqullugu arsaattarfik sapaatip akunnerata naanerani aputaajarpaat.
28. april 2020

Meeqqat inersimasullu timersortartut tapersersortaallu 60-it missaanniittut aputaajaajartornissamik N-48-ip Facebookiani kajumissaarut naapertorlugu aputaajaaqataajartorlutik ornigussimapput. Ilaasortanut kajumissaarut ersarissimavoq: Timersortartutut sumi inissisimaneq apeqqutaatinnagu sulisoqassaaq. Taamaasillutillu kajumissutsiminnik nivakkiaqataasut eqimattanut agguarneqarsimapput, meeqqat, angajoqqaat utoqqasaallu arfininngornermi aputaajaapput, massa angutit, arnat inuusuttullu sapaammi aputaajaasimasut.

- Arsaattartut tapersersuisullu arsaattarfissap naammassinissaa assorsuaq qilanaaraat. Neriuutigaallu taamannak nivanneq arsaattarfiup siusinnerusukkut naammassineqarnissaanut iluaqutaajumaartoq, Lena Ravn Danielsen, N-48-mi siulittaasoq oqarpoq nangillunilu:

- Aputaajaasut aputaajaanertik allatut nukkassarnertut ingerlappaat aammalu nivanneq eqimattakkaatut nukittorsaqatigiinnertut atorlugu. Ilaasa sulinerminni 7-10 kilometerit atorsimallugit naatsorsorpaat, tamatumanilu trillebørit atorlugit aput assartorsimavaat.

Aputaajaasut suliartik naammassigamikku qasusimaqaat, nukkiorsimanermillu tasitsaaqqaarlutik avissaartuussimapput.

N-48-mi ilaasortat allatut nukkassarlutik siullermiilinngillat. Siornatigut aasalernerani sioqqanik aqqusinermi katersisarsimapput, eqqagassanik katersilutik aammalu ataasiaannaratik utoqqarnik utoqqaat illuanneersunik aneerussisarmapput.

Arsaattarfiup aputaajarneqarnera kommunimit piffissami kingullermi ingerlanneqarsimavoq. Arsaattarfittaassallu naammassineqarnissaanut sila apeqqutaaginnarpoq, kommunimili sulisut naatsorsuutigaat arsaattarfittaassap atoqqaarfissiortinneqarnissaa kingusinnerpaamik juunip naanerani ingerlanneqarsinnaajumaartoq.

Allattoq: Káte Hansen, khan@avannaata.gl
Assit: Nagdlúnguaq