- Politiit sulinerminnut atatillugu inoqatinut soqqusaatsuliornerit allatigulluunniit kusanaatsuliornerit nalinginnaanerulersimanerat nunatsinni maluginiarsimavaat. Politiinit isumaqartoqarpoq kamammik ersersitsisarnerit taamaattut pingaartumik ikiaroornartunik atornerluisut akornanni pisartut, taakkuuppummi imigassamik aammalu aningaasanoornermik atornerluisut assiginagit atornerluisuunertik pillugu saaffiginninneq ajortut, tassami atornerluisuunertik takusinnaanagulu nassuerutigisinnaaneq ajoramikku. Politiit isumaqarputtaaq kamammik ersersitsisarnerit pingaartumik nualluutip coronap atugaanerani innuttaasunut tamanut atuuttussaatitaasunik maleruagassaqalernermut attuumassuteqartoq. Tamatumunnga atatillugu Allorfik-up ersarinnerulersinnissaa suleqataaffigerusupparput Rigmor Villadsen, Avannaata Kommuniani Peqqinneq Sunngiffik-milu ataqatigiissaarisoq oqarpoq.
Oqaloqatigiinnerit katsorsaanerlu
Allorfik Avannaa Ilulissaniittoq aammalu imigassamik, ikiaroornartumik aningaasanoornermillu atornerluisunut katsorsaaviusoq Avannaata Kommuniani innuttaasunut oqaloqatiginninnissamut katsorsaanissamullu neqerooruteqarpoq. Kikkulluunniit nalunaaqqaanngikkaluarlutik katsorsaaviliarlutik saaffiginnissinnaapput imaluunniit mobilnormumut +299 22 25 50-imut sianerlutik aammalu sms-itigut nalunaaruteqarlutik saaffiginnissuteqarsinnaapput. Allorfik oqarasuaatitigut, allakkatigut aammalu ornigulluni saaffiginninnikkut ulluni nalinginnaasuni ullaakkut qulingiluaniit ualikkut pingasut tungaannut saaffiginniffigineqarsinnaavoq.
Allorfik-mi katsorsaanissamik neqeroorut akeqanngitsuusoq sapaatit akunnerini 17-ini sapaatip akunneranut ataasiarluni tallimariarluniluunniit oqaloqatiginniffiusarpoq, tamatumalu kingorna aamma sapaatit akunnerinik 26-nik sivisussuseqarsinnaasumik oqaloqatigiinnernik aammalu eqimattakkaarluni tarnikkut eqqissisaqatigiinnermik neqorooruteqarpoq.
Katsorsaavik aamma aanngajaarniutinik atornerluisunut aningaasanoorajuttunulluunniit ilaqutaasunut oqaloqatigiinnernik ilinniartitsinernillu neqerooruteqarpoq.
Allorfik Avannaa arfinilinnik sulisoqarpoq, taakkunannga tallimat katsorsaasuullutik ataaserlu aqutsisuullunilu katsorsaasuulluni. Katsorsaasarfik aamma illoqarfinni allani katsorsaasinnaasunik angalasartoqarpoq.
Allorfiup katsorsaanissamik neqeroorutai uani atuakkit.
Aamma Naalakkersuisut pinaveersaartitsinermi isumaginninnermilu neqeroorutai uani alakkarsinnaavatit:
https://socialstyrelsen.nanoq.gl/Borger?sc_lang=kl-GL
Innuttaasut aamma najukkaminni palasimik oqaloqateqarsinnaapput.
Allattoq: Káte Hansen, khan@avanaata.gl