Ilulissani angerlarsimaffeqanngitsunut containerini unnuisarfissaq

Containerinik unnuisarfissaliassaq angerlarsimaffeqanngitsunut arfineq-pingasunut unnuiffiusinnaasoq 1,2 millioner koruuninik akeqarpoq, uiunissaanullu queqarfiusussamik allaffeqarfiusussamillu 1 million koruunit aamma aningaasaliissutaassapput.

- Ilulissani angerlarsimaffeqanngitsoqaaluppoq ukiukkut issileruttornerani Nuummut nuuttartunik, tassani angerlarsimaffeqanngitsut unnuisarfianni unnuinissamut periarfissaqarmat. Angerlarsimaffeqanngitsut nalinginnaasumik ilaquttaminni ikinngitiminniluunniit unnuiffissarsiortarput, allamilli periarfissaarukkaangamik inissiaqarfiit majuartarfeqarfiini imaluunniit silami tuperni unnuisariaqartarput. Unnuisarfimmik pisariaqartitsisoqarnera nassuerutigalugu containerinik unnuisarfissaliassanik pisinissaq aalajangiupparput, tassanilu angerlarsimaffeqanngitsut unnuinissaminnut periarfissaqassapput, Aviâja Madsen Ilaqutareeqarnermut Ingerlatsivimmi pisortaq oqarpoq.

Avannaata Kommunia angerlarsimaffeqanngitsunik nalunaarsugaateqanngilaq, innuttaasulli 78-it najugaqarfeqanngitsutut kommunip inunnut nalunaarsuiffiani ukioq manna januaarimi nalunaarsugaatigineqarput, ullumikkullu maajip qiteqqunnerani innuttaasut najugaqanngitsutut nalunaarsugaasut 65-iupput.

Containerinik unnuisarfiliassaq containerinik arfinilinnik katitigaasussaq 14 meterisut takissuseqarluni meterinik arfinilinnik silissuseqartussaq katiterneqareeriarpat qalialerneqarlunilu qisunnik iigalersorneqassaaq. Containerinik unnuisarfissaliassaq sisamanik initaqassaaq, marlunnik uffarfeqarluni aammalu iniutigisumik igaffeqassalluni.

Containerit umiarsuarmik assartorneqartut maajip 20-ani Ilulissanut tikissapput. Ingerlatsiviit arlaqartut aammalu Ilulissani najugaqarfimmi ataatsimiititaliaq containerinik unnuisarfiliassap sumiinnissaanik aalajangiinissamut akuutinneqarput, maannamuugallartorli sumiinnissaa suli aalajangiunneqanngilaq.

Kommune containerinik unnuisarfissanik pisinissamut 1,2 millioner koruuninik aallaqqaammut missingersuusiorsimagaluarpoq. 1 million koruunilli illup uiunissaanut atugassat inissialiassanut missingersuusianit nuunneqarnissaat kommunalbestyrelsip maajip aqqarnarni ataatsimiinnerani akuersissutigineqarput.

Containerinik unnuisarfissat pillugit titatakkat uani takukkit.

Allattoq: Káte Hansen, khan@avannaata.gl
Titartakkat: DC Supply