airplanebooksbriefcase business cogs cross election entertainment fish house law lockmedicalpeopleselfservices socialtax

Ilulissani eqqaaveqarfimmi ikuallarujussuartoqartoq

Ilulissani eqqaaveqarfik toqunartumik pujuliorfiusumik ullup qeqqanngitsiartoq ikuallalersimavoq. Qaartoortoqarsinnaanera ernumanartoqarmat innuttaasut palligutinnginnissaat inassutigineqarpoq. Aammattaaq pujoq illoqarfiup tungaanut ingerlaarmat matut igalaallu matoqqatinneqarnisaat inassutigineqarpoq.
20. maj 2020

- Tankeqarlunilu nappartaqarunarmat qaartoornernik pisoqartarpoq. Taamaammat biilinik angallatillit eqqaaveqarfimmut sangusariaata eqqaani uninngaqqusaanatillu palliguteqqusaanngillat. Maannakkut anorikippoq pujorlu illoqarfiup tungaanut ingerlarusaarpoq. Taamaammat pujoq illoqarfimmut annguppat innutaasut matunik igalaanillu matoqqatitsissapput, Jens Dahl, Avannaata Kommuniani upalungaarsimanermi ingerlatsisoq oqarpoq.

Upalungaarsimanermi ingerlatsisoq oqaluttuarpoq sulisut marluk eqqaaveqarfissuarmi nakkutilliisut ullup qeqqata siorna aqqarnup missaani eqqaaveqarfik qimaleramikku allanarsinnaasumik maluginiagaqarsimanngitsut, ikuallattoqarneranili pujoq ullup-qeqqata missaani takuneqarsimasoq.

- Ikuallannerup qanoq aallartissimasinnaanera ilisimaneqanngilaq, kisianni eqqakkat ikuallangaatsialersimammata inneq suli qaminneqarsinnaanngikkallarpoq. Taamaammat inneq maannamut aqunniarsariinnarsinnaavarput, upalunaarsimanermi ingerlatsisoq nassuiaavoq.

Eqqaaveqarfiup tungaanut sangusariap nalaani inunnik uninngasoqaqqusaananilu palliguteqqusaasoqanngikkaluartoq timmisartoqarfimmut utimullu biilinik ingerlaartoqarsinnaavoq.

Eqqaaveqarfimmi kingullermik ukiut pingasut matuma siorna ikuallatoqarpoq, taannalu piaaraluni ikuallatsitsinikkut pisimavoq.

Ilulissat eqqakkanik ikuallaaveqarpoq suli atuuttumik, eqqakkallu ikuallassinnaanngitsutut nalilikkat eqqaaveqarfissuarmut assartorlugit iginneqartarput. Eqqaavissuarlu maanna ikuallattoorfiuvoq.

Tekst: Káte Hansen, khan@avannaata.gl
Foto: Avannaata Kommunia