Ilulissani coronamik tunillatsittoqarsimanera pillugu tusagassiortunik katersortitsinermi oqaatigineqartutuut coronamik tunillatsissimasut Munch Gruppenimeersunut attuumassuteqarput, taakkuuppullu Ilulissani nutaamik mittarfiliornissamik suliaqartussat. Kommunimi allattoqarfimmeersut arlallit – taakkununnga ilaallutik borgmesteri Palle Jerimiassen aamma pisortaaneq Nick Nielsen – Munch Gruppenimeersunik ullumi pingasunngornermi maajip 27-ani ataatsimeeqateqarput.
Sulisut Munch Gruppenimeersunik qanimut attaveqarsimasut avannani nunap immikkoortuani nakorsatut qullersaasup innersuussineratut angerlartinneqarallarput.
- Maleruaqquneqartut nalinginnaasut malillugut angerlarsimaffitsinniit suligallartussanngorpugut. Sulisut angerlartinneqartut napparsimmaveqarfimmiit arlaatigut iliorfigineqarnissartik siunnersorneqarnissartillu utaqqillugu annertunerusumik paasitinneqarnissartik utaqqivaat, Palle Jerimiassen Avannaata Kommuniani borgmesteri oqarpoq.
Nunatta Nakorsaaneqarfianit innersuussutaasut naapertorlugit upalungaarsimanissami pilersaarutit Avannaata Kommunianit maanna atuutilersinneqarput. Utoqqaat illuat avammut matuneqarallarluni pulaarfigineqarsinnaajunnaarallarpoq.
Angerlarsimaffimmi ikiorteqarnerup tungaatigut pisariaqarnerpaaginnaat maannamiit suliarineqalissapput. Tamatumani ilaatigut angerlarsimaffinni ikiortit pisariaqartitsinerpaat malillugit sullissigallartussanngorput.
- Coronap Ilulissanut tikiunnerani pingaartumik utoqqartagut navianartorsiorsinnaasutullu inissisimasut paarilluartariaqarpagut. Ilulissani innuttaasut kaammattorusuppakka tuniluuttoqannginnissaa anguniarlugu nunatsinni nakorsaanerup inassutaanik nalinginnaasunik malinneqqullugit. Nunatsinni innuttaasut siusinnerusukkut takutereerpaat tuniluuttoqarsinnaaneranik siaruatsaaliuineq iluaqutaasoq, taamatullu iliuuseqarneq maanna nangittussanngorparput, borgmesteri Palle Jerimiassen oqarpoq.
Nakorsaaneqarfimmit nalinginnaasumik maleruaqqusat uani atuarneqarsinnaapput: www.nun.gl