Arsaattarfittaassami sulineq aserorterisarnernit kinguarsarneqartoq

Meeqqat, inuusuttut allaallumi inersimasut arsaattarfittaassamiittartut arsaattarfissap maanna manissarneqareerlunilu ivigaasalersorneqartussap inaarsarniarneranut ajornartorsiortitsingaatsialersimapput.

- Arsaattarfittaassami atortussanik kingullertigut aserorterisarnerit pissutigalugit arsaattarfissami suliniarneq kinguarsarneqartualerpoq. Taamaammat aamma atortussanik nutaanik Danmarkimiit piniartariaqarsimavugut, qujanartumilli taakku umiarsuartigut juunip tallimaani tikissapput, Mogens Holmegård Mortensen, Teknikkeqarnermut Ingerlatsivimmi sanaartornermut pisortaq oqarpoq.

Kingullertigut ilaatigut puussiarsuit gumminik seqummalasunik imallit savimmik sissorneqarsimapput, tamannalu pissutigalugu saliisoqangaatsiartoqartariaqarmat arsaattarfissami sulineq kinguarsarneqarsimavoq.

- Arsaattarfiliassami sulinerup kinguarsarneqartuarnera ajuusaarnarpoq, taamaammallu innuttaasut kajumissaarusuppagut arsaattarfiliassap suliffeqarfiuneranik ataqqinnillutik tamaaniittaqqunagit. Arsaattarfissaq naammassiaarsinnaagutsigu innuttaasunit atorneqarsinnaaliaarnerussaaq, Mogen Holmegård Mogensen oqarpoq.

Sanaartortitsisartut arsaattarfissap kommunimut tunniunneqarnissaata tungaanut arsaattarfissamik akisussaasuusut aserorterisarnernik politiinut nalunaarutiginnereerput, politiillu inuit arsaattarfissami susassaqanngitsut eqqumaffiginerulerpaat.

Arsaattarfissami sulineq sapaatip akunnerani kingullermi aallarteqqinneqarpoq. Ivigaasanik tunniniaasartuni Nordisk Kunstgræs Importimi atorfilik arsaattarfissami ivigaasalersuinissamut ilitsesuiartorlunilu ivigaasalersueqataajartorluni Covid-19-imi maleruagassat tunuliaqutaralugit piaartumik Ilulissiartussanngorlugu akuerineqarsimavoq. Kommunimiillu naatsorsuutigineqarpoq arsaattarfissaq juunip 30-ani atoqqaarfissiortinneqarsinnaassasoq.

Allattoq assiliisorlu: Káte Hansen, khan@avanaata.gl