Bendt B. Kristiansen Inuit Ataqatigiit sinnerlugit Avannaata Kommuniani kommunalbestyrelsimi ilaasortaasoq inuussutissarsiornermut ingerlatsisutut atorfininnerminut atatillugu Aningaasaqarnermut Ataatsimiititaliami aammalu Inuussutissarsiornermut Ataatsimiititaliami ilaasortaajunnaassaaq, ataatsimiititaliani ilaasortaanissaa atorfigiligassaanut naapertuutinngimmat. Inuit Ataqatigiit ataatsimiititaliani sinniisussamik toqqaassapput, kingornalu kommunalbestyrelsemi eqqartorneqarluni.
Bendt B. Kristiansen bygningsteknikeritut ilinniarsimasoq 2003-miilli kommunini pingasuni sulisimavoq: Ilulissat Kommunerisimasaanni, Qaasuitsup Kommunerisimasaani aammalu 2019-miilli upernaakkut Avannaata Kommuniani Teknikkeqarnermut Ingerlatsivimmi sanaartortitsisuni atorfeqarsimavoq.
Bendt B. Kristiansen kommuniusimasuni nunaminertalerinermik aammalu aqutsisoqarfimmi ukiut ingerlaneranni atorfeqarsimavoq.
Allattoq assiliisorlu: Káte Hansen, khan@avannaata.gl