Innuttaasut amerlasuut ivigaasanik arsaattarfittaassap tallimanngornermi juulip pingajuani atoqqaarfissiortinnissaanut ussagarsimapput. Peqqinneq Sunngiffillu illoqarfimmi pisussanik pilersaarusiorlutillu aaqqissuussisartut meeqqanut inersimasunullu naleqquttunik susassaqartitsinissaq pilersaarusiorsimavaat.
Borgmesterip Palle Jerimiassenip oqalugiaateqarnermi ilaatigut oqaatigaa, ivigaasanik arsaattarfiliaq ukiut sisamat matuma siorna aallartinneqarsimasoq. Arsaattarfiup nunataa marrarasaarmat sammivissaata pingasoriarlugu allanngortinneqartariaqarnera pissutigalugu arsaattarfik ukiumik ataatsimik kinguaattoorfiulluni naammassineqarpoq.
Arsaattarfiup ungaluneqarnissaa, isiginnaartarfilersuinissaq kiisalu biilinut unittarfiliornissaq pilersaarusiorneqarput. Borgmesterip aamma ilisimatitsissutigaa, Upernavimmi, Saattuni aamma Ikersammi ivigaasanik ukioq manna arsaattarfittaarnissaq kommunimit pilersaarusiorneqartoq. Borgmesterip oqalugiaataa tamakkiisoq uani atuarneqarsinnaavoq.
Atoqqaarfissiortitsinermi silami kaffillertoqarlunilu pølsenik siaasakkanik, kaaginik imeruersaatinillu tungusunnitsunik sassaalliisoqarpoq. Assit susoqarsimaneranik oqaluttuartut ataani alakkartikkit.
Allattoq assiliisorlu: Káte Hansen, khan@avannaata.gl
Innuttaasut isaannginnerini siaasaallutik ulapputtunnguupput.
Innuttaasut isernissaminnut qilanaarrapput.
Qaleq aappalaartoq qiorneqarniariartoq nukappiaqqat timersuutinik atikkersorsimasut qilanaartullu siulliullutik arsaattarfimmut appakaapput.
Qutsasertoq alutorineqarluavippoq.
Peqqinneq Sunngiffillu illoqarfimmi pisussanik pilersaarusiortartuusut atoqqaarfissiortitsinissami tikilluaqqusisuupput.
Borgmesteri Palle Jerimiassen oqalugiaateqarpoq.
Innuttaasut arsaattarfimmut appakaassimasut borgmesterip oqalugiaataanut tusarnaarput.
N-48-p siulittaasut Lena Ravn Davidsen oqalugiarpoq.
I-69-ip siulittaasua Bent Petersen oqalugiarpoq.
Siunissami arsaattartussatut isumalluutit soorunami arsaattartutut atikkersorsimallutik atoqqaarfissiortitsinermi najuupput.
Nukappissat marluk pullattagaq tingisoorluni aanngariartortoq qorsooqqimmi nalallutik isiginnaarujoorpaat.
Asiartuusiinnarrapput.
Katittussaq ikinngutaalu arsaattarfittaamut aamma aqqusaartuupput.
Unammilinnginneri I-69-ip arnartai kissasserput.
N-48-ullu arnartai arsaattarfiup affaata aappaani kissasserput.
Arsaattarfittaarlu atoqqaarfissiorneqarpoq…