Uummannami katersugaasivik sullinernik nassaarfiummat matugallarneqarpoq

Katersugaasivik sullinernik nassaarfioreersorlu aammalu Nunatta Katersugaasivianik isumasioqateqartoqareersorlu juunip 17-iani matugallarneqarpoq. Assit nassiunneqarsimasut aallaavigalugit Nunatta Katersugaasivianit aalajangerneqarpoq sullerngit nassaarineqarsimasut tassaasut klanner-it amerikameersuusut.

- Umimmaap niaqua kiversimasoq kamisallu natermiittut nassaarfiginerpaavagut. Qujanartumilli katersaatit saqqummersitsiviit iluiniittut nassaarfiginngilagut, kisianni umimmaap niaqua sullerngit quperluinik peqarpallaaqimmat igiinnartariaqarsimavarput. Arnaaraq Lange Uummannami pinaveersaartitsisoq aammalu katersugaasivimmi paarlattaagallartutut sulisoq oqarpoq nangillunilu:

- Sullinernik nassaagut annertoorujussuunngillat, tassami sullerngit, quperlut quperlullu paniinnarnikut ataasiakkaaginnaat maannamut katersugaatini nassaaraagut. Kalaallisuut arfineq-marluk, angutit atisaat marluk, Qilakitsormiut atisaasa assilineqarneri marluk aammalu Qilakitsormiut atisaat ataaseq kiisalu oqorsaatit ataasiakkaat sullinernik nassaarfigaagut.

Containerini qerititsivinniitinneqarput
Katersugaasivimmi sulisut sullerngit nungusarniarlugit katersugaatinik containerini qerititsivinniititsillutik aallartissimalereerput. Nunatta Katersugaasiviata saniatigut Danmarkimi aanaveersaasartunit aammalu Aasiaat katersuagaasiviani sulisunit sullinernik taamaattunik nalaataqarnermi misilittagallinnit siunnersorneqarsinnaasimapput.

- Siunnersorneqarnerput iluaqutaaqaaq, paasitinneqarpugullu sullerngit klanner-it amerikameersut pineqartut amernik saassussisartut aammalu saanerni qisunnilu manniliortartut, taamaammallu sullerngit quperluisalu toqorarnissaat qulakkeerumallugu katersugaatit sivikinnerpaamik sapaatip akunnerani ataatsimi qerititsivimmiitissavagut. Katersugaatit qerititsivimmiitilinnginnerini støvsugeqqaariarlugit puussianut plastikiusunut issorartussaavagut aammalu sullerngit nungusarluarnissaat qulakkeerniarlugu qerititsivimmiitereernerisa kingorna qaammat ataaseq affarlu katersugaasivimmut eqqunneqaqqusaanatik. Taamaammat qerititsivimmiititsisarnerput septembarip aallaqqaataata tungaanut ingerlakkallassavarput. Tamatuma saniatigut sullinernik quperluinillu katersugaasivimmut eqqussinaveersaartussaavugut, aammattaaq katersugaasivimmi suna tamaat angullugu eqqiaatitsisusaalluta, Arnaaraq Lange oqarpoq.

Sullerngit klanner-it amerikameersut Amerikap avannaaneersuupput kingusinnerukkut Europamut siaruaassimasut maannalu aamma nunatsinnut siaruaassimasut. Sullineq taanna pingaartumik katersugaasivinni katersugaatinik innarliisarpoq, ilaatigut sullinernik katersugaatinik, uumasunik kiviukkanik, naasunik aammalu naasut kigutaannik aseruisinnaallutik. Sullerngit klanner-it allat aamma angerlarsimaffinnut siaruaassimapput, ilaatigullu perlukunik, sullinernik toqungasunik, nutsanik, nakkalanernik aammalu timmiaaqqat nerisassaannik naqqup quppaani assigisaannilu nerisaqartuupput. Sullerngit klanner-it qillut (uumasut toqusimasut) tikkinut ussagartarput.

Allattoq: Káte Hansen, khan@avannaata.gl
Assit: Uummannap katersugaasivia