airplanebooksbriefcase business cogs cross election entertainment fish house law lockmedicalpeopleselfservices socialtax

Inatsisinik ilisimasakinneq qimmiutillit qimmilerisullu akornanni aaqqiagiikkunnaarutaasarpoq

Avannaata Kommuniani qimmilerisutut sulineq tarnikkut oqimaassinnaasarpoq. Qimmiutillit ilaanni qimmilerinermut inatsisinik ilisimasakinneq qimmiutillit qimmilerisullu akornanni aaqqiagiikkunnaarnerannik kinguneqarsinnaasarpoq. Taamaammat Ilulissani qimmilerisutut ataqatigiissaarisoq Ilannguaq Hansen qimmiutillit qimmilerinermut inatsisinik ilisimasaqarnerulernissaannut kajumissaarivoq.
27. oktober 2020
Inatsisitigut kapoorisussaatitaanermi nalunaaqutsersuisussaatitaanermiluaningaasartuutit nunatta karsianit akilerneqartarput.
Pingaartumik inatsisini eqqartorneqartut pingasut aaqqiagiinnginnermik kinguneqarsinnaasarput, tassalu kapoorisussaatitaaneq, qimminik qaammatinik arfinilinnik utoqqaassuseqalereersimasunik pitussimatitsisussaatitaaneq ungalusamiititsisussaatitaanerlu aammalu kiisortunik qimmeqaqqusaannginneq.

Inatsisinik ilisimasakinneq
- Qimmilerisutut inatsisit tunngavigalugit suliatsinnik nakkutiginninnerput pissutigalugu allaat sulereernerup kingorna oqaatsinik sakkortusinnaasunik annissuiffigaluta saassutaritissinnaasarpugut, tamannalu tarnikkut oqimaassinnaasarpoq. Assersuutigalugu qimmiaraq qimmimit inersimasumit kimmarneqarluni toqunneqarmat qimmeq toqutsisimasoq toquttariaqarsimavarput. Piginnittoq tamatuma nalaani aallaqqavoq, tikikkamilu aqqusinermi naapillunga kamalluni saassutaraanga. Inatsimmi immikkoortumut innersuullugu nassuiaappara qimmit kiisortut inunnik saassussisut imaluunniit uumasunik allanik kimmaallutik toqutsisut ingerlaannaq toqunneqartussaatitaasut. Sooq taamatut iliortariaqarsimanerput paasigamiuk assut tupaallappoq, Ilannguq Hansen Ilulissani qimmilerisutut ataqatigiissaarisoq oqarpoq nangillunilu:

- Ilulissani qimmiutillit inatsisini peqqussutit inerteqqutillu eqqummaariffigaat, kommunilli avannaatungaaniinnerusut inatsimmi pisussaaffitik ilisimasaqarfiginnginneruaat. Allaat Uummannap kangerluani aammalu Qeqertarsuup tunuata ilaani qimmiutillit ataasiakkaat qimmitik nalunaaqutsersoqqunnginnermik atsiortitsiortorlutik Naalakkersuisuusimasumut apuussinikuupput, Ilannguaq Hansen oqarpoq.

Nalunaaqutsersuutit amitsukujuut kapuutit atorlugit qimminut nalunaaqutsersuutaasartut qimmit paasissutissartaannik, qasseriarlutik kapitissimanerannik aammalu kimit pigineqarnerannik paasissutissanik qarasaasiatigoortunik katersuiffiusarput.

Qimmit nakkutiginerlutat
- Qimmit inunngorneranniit ukiumi siullermi pingasoriarlutik kingornalu ukiut pingasukkaarlugit kapoorneqartussaatitaanerat qimmiutilinnut akeqanngilaq, kapoorinermimi nalunaaqutsersuinermilu aningaasartuutit nunatta karsianit akilerneqartarput, taamaammat qimmiutillit ilaasa qimmimik kapoorneqarnissaannut nalunaaqutsersorneqarnissaannullu akerliusartut inatsisit imarisaannik ilisimasaqannginnermik tunngaveqarsoraara, Ilannguaq Hansen oqarpoq.

Qimmit qimuttut aammalu qimmiuteqarneq qitsuuteqarnerlu pillugit Inatsisartut inatsisaat nr. 24 malillugu qimmit kapoorneqartussaatitaanerannik nalunaaqutsersorneqartussaatitaanerannillu malinnikkumannginneq pinngitsaaliilluni kapoorinermik, nalunaaqutsersuinermik nalunaarsuinermillu kinguneqartussaavoq, qimmiutilillu malartaasertuarsinnarluni inatsimmik malinnikkusunngiinnarpat qimmiutai inuttaata akiligaanik taarsiinertaqanngitsumillu toqunneqartussaatitaapput. Qimmit angalaannartut qaammatit arfinillit utoqqaassusillit taamatuttaaq toqunneqartussaatitaapput.

Avannaata Kommuniani qimminik nakkutilliisut qimminik qimuttunik 10.000-it missaanniittunik nakkutigisallit ilaatigut qimminik paarinerlutanik nalaataqartarput.

- Maani Ilulissani qimmit nakkutiginerlutat aamma nunatta tusaamanerlunneqalinnginnissaa pissutigalugu pingaartumik eqqumaffiginiartarpagut. Takornariarpassuaqartarpugummi assinik nunarsuup sinneranut siaruarterisinnaasartunik. Kinaaluunniit qimminik nakkutiginerlutanik takuguni inatsit malillugu uumasut nakorsaannut, politiinut imaluunniit kommunefogedinut nalunaartussaatitaavoq, taamatuttaaq uagut sulereernerup avataaniluunniit attavigineqarsinnaavugut, Ilannguaq Hansen oqarpoq.

Ilulissani qimmilerisut mobilnormu 54 42 40 atorlugu attavigineqarsinnaapput.

Allattoq assiliisorlu: Káte Hansen, khan@avannaata.gl

Qimuttut nalunaaqutsersuutinik amitsukujuunik kapuutit atorlugitnalunaaqutsersorneqartarput.