Timersortarfik kr. 4.0 mio. missaannik missingersuuteqarpoq ataatsimut isigalugu ima agguataarsimasunik:
- Akissarsiat 69%
- Ingerlatsinermut aningaasartuutit, imeq, kiassarneq, kallerup innera 12%
- Nioqqutissanik pisineq6%
- Atortussanik/pequtinik pisineq 7%
- Iluarsaassinermut aningaasartuutit 3%
- Attartortitsinermut isertitat 3%
Soorlu missingersuutini takuneqarsinnaasoq aningaasat tamangajammik akissarsianut atorneqartarput. Timersortarfik aamma qiviassagaanni takuneqarsinnaavoq illorsuaq tamarmi pequtai ilanngullugit aserfallatsaaliorneqartariaqartoq.
Tassungalu atatillugu Aningaasaqarnermut Ataatsimiititaliap decembarip qaammataagaa 2019-imi aalajangerpaa, fitness-tarfik Ilulissani timersortarfimmit ingerlanneqaannarnissaa. Taamaattumillu aamma fitness-tarfiup attartortinneqarsinnaanissaanut qinnuteqaat kommunip itigartitsissutigaa. Kommunip timersortarfimmi ineeqqat tamaasa oqartussaaffigerusuppai siunissami aaqqissuussassat annerusut pillugit, soorlu aalisarnermik saqqummersitsinerit imaluunniit ICC-mit aaqqissuussinernut atatillugu atorneqartarnissaat eqqarsaatigalugit.
Nunatsinni kommunit tamarmik annerusumik minnerusumilluunniit fitness-tarfimmik ingerlatsitsipput, tunngaviatigullu isumaqarpunga qujanartumik ulluinnarni peqqinnissaq inuunerinnissarlu siuarsarniarlugu innuttaasut sammisassaqartitaasut. Soorlu ullumikkut fitness-tarfimmi atortut qiviaqqissagutsigit amerlanerit ukiut qulit sinnerlugit pisoqaatigaat. Taamaattumik nungullarnikuuvallaarneri pillugit aserfallatsaaliornerinut aningaasarpassuit atorneqartarput. Siorna sulisut atortut putoorsimaneri pillugit allanik qallersorpaat. Annoraaminermit taarsersorneqarput, taakkuli atoreernerisa kingorna spritimik salinneqarsinnaanngillat. Maanna covid- 19 piutillugu pitsaanngilluinnarpoq. Taamaattumillu oqartoqarsinnaavoq atortut maskiinallu ajoqutillit imaluunniit aserfallatsaaliorneqarsinnaanngitsut atuisunut ulorianarlutillu pilliutaasinnaasut. Taamaattumik kommuni aamma uani pitsaassutsimik pisussaaffeqarpoq, ajutoornissat pinngitsoortinniarlugit eqqiluisaarnissamullu malittarisassat malinneqarnissaannut.
Kommunip ilisimavaa illoqarfimmi fitness-tarfeqartoq privatimik pigineqartumik taamaattumik qujanaannarpoq peqqinnarlunilu kommunip fitness-tarfiata avataatigut allamik fitness-tarfimmik qinigassaqarmat. Taamaattorli kommuni fitness-tarfimmik ingerlatsitsereersoq sammisassat assiginik privatimik piginnittoq neqerooruteqarluni aallartitsivoq. Kommunitut pisussaaffik malillugu, kommuni eqaarsaartarfimmik ingerlatsitsillunilu pilersitsisinnaavoq taanna innuttaasunut tamanut ammasuussappat.
Imatut privatimik ingerlatsisisup neqeroorutai toqqaannartumik unammillerniarnagit, kommuni nutaanik rabatsilersuinissaq tunuarsimaarfigaa aamma kommunip fitness-tarfiani allanik neqerooruteqarnissaq tunuarsimaarfigalugu, tassunga privatiusumut naammaginanngitsumik pilersitsisinnaasumik kinguneqannginnissaa pillugu. Taamaattumik privatiusoq qanorluunniit sammisassanik nutaanik pissaganartunillu neqerooruteqarsinnaavoq arlaatigut tassunga atatillugu kommunip akerlilersornavianngisaanit.
Taamaallaat ataatsikkut inuit isikkaneq-marluk fitness-tarfimmiissinnaapput covid-19 pissutaalluni. Ilimagaara aamma fitness-tarfimmi privatiusumi ataatsikkut isersimasinnaasut tamatuma missaanniinnissaat. Ilulissani innuttaasut 5.000 misserai, isumaqarpungalu inoqqortussutsitsinnut naleqqiullugu fitness-tarfiit naleqquttorujuusut.
Pissutsilli tamakku allannguutaasinnaanngillat kommunip fitness-tarfiani atortut aserfallatsiinnarnissaanut. Ullullu tamaasa halimi atuisut eqqarsaatigalugit piumasaqaataasariaqarpoq atortut pitsaasumik aserfallatsaaliortarneqarnissaat attatiinnarneqassasoq. Nunatta sinnerani allaanerunganngilaq soorlu kommunit allat fitness-tarfitik ingerlaavartumik imaluunniit akuttoqatigiissaartumik atortut aserfallatsaaliortaraat taarsertaraalluunniit.
Fitness-tarfimmi atortut taarserneqarnissaat aamma kommunalbestyrelsip isumaqatigiissutigaat. Taamaattumik tupigusuutigaara ilaasortat ilaat kingorna inuit attaveqatigiittarfia aqqutigalugu allatut isummersimanerat oqallississamanerallu. Naggataatigut naqissuserniarpara, uagut Avannaata Kommuniani piffimmi inuussutissarsiortut sakkortuumik tapersersornissaat ileqqorigatsigu. Soorunalimi tamanna ingerlatiinnassuarput, taamaalilluni innuttaasut tamarmik inuussutissarsiortullu kommunip ineriartorneranut peqataalluarniassammata.
In.in.
Palle