Ukiormanna kommunalbestyrelsimut qinersisoqartussanngormat massakkut borgmesteritut oqalugiarnera kommunalbestyrelsi issiasoq sinnerlugu ukiortaami oqaluagiarneruvoq kingulleq.
Ukiut pingasut qaangiupput Avannaata kommunia pilersikkatsigu. Nukippassuit atornikuuagut kommunip nutaap aallartilluarnissaanut inissisiterilluta aamma nutaanik suleriusissanik suliaqarluta. Minnerunngitsumik aamma Nuugaatsiarmiut aamma Illorsuarmiut pitsaasumik sullinnissaat pillugit.
Ilaatigut suliat unammillernartarsimaqaat, tamakkiisumilli qiviaraanni kommunip avinneqarnera pitsaasorpassuarnik kinguneqarnikuuvoq.
Ataatsimoorluta angusagut tulluusimaarutigaakka.
Inuit oqartussaaqataanerat peqataatinnerallu pitsanngorsarsimavarput nunaqarfinni aqutsisut illoqarfinnilu ataatsimut ataatsimiititaliat pisussaaffilersorlugit pilersinnerisigut, qanimut oqartussaaqataaneq taamaasilluni nukittorsarneqarpoq.
Kommunimi sullisseriaatsit suleriaatsillu annertuumik allanngortiternerisigut innutaasunut sullissinerput nukittorsarneqarpoq.
Sanaartugassarpassuit aallartinneqarnikuupput ingerlallutillu, aamma aalisarnikkut kommunerput nunatsinni siuttuuvoq, innuttaasullu sulisinnaasut tamarmik suliffeqarlutik.
Ukioq 2020 pujunngisaannartussaavarput. Corona virus peqqutigalugu inuiappassuit eqqungaanikuupput.
Nunatsinni upalugaarsimanerup tungaatigut pitsaasumik sullissisoqarnerata kingunerisaanik qujanartumik nunatsinni toqqissisimanartumik illersorneqarsimavugut.
Sunniutai kommunitsinni aamma uagut malugivagut.
Inuussutissarsiuteqartut annertuumik malugivaat. Takornarissat qanganit ikinneralaat tikipput aamma aalisakkat akii apparlutik.
Pingaartumik Avannaata Kommuniata nunatsinni takornariartarfiit pingaarnersaattut inissisimanera eqqarsaatigalugu takornariartitsisartut, unnuisarfeqarfiit, neriniartarfiit millionilikkaanik annaasaqartiterput aammalu takornarianik isumalluuteqarluartartut sanaluttartut taamatuttaaq isertitassaraluaminnik annaasaqartitersimapput.
Unammillernartut tamakkua aqqusaaraluarlutigit kommunitut missingersuutigut nammaqatigiittumik sinneqartooruteqartumik naammassineqarput.
Nutaaliornissamut pikkorinnerulersimavugut, tassami aaqqiissutissanik nutaanik ujartuisariaqarsimagatta aamma allannguisariaqarsimagatta suleriaatsitsinnik corona peqqutigalugu.
Pitsaanerusumik suleqatigiilersimavugut aamma uatsinnut paarinerulluta. Tamannalu ajunngitsup tungaanut ingerlaneq nangeqqissavarput.
Ikioqatigiilluta nammaqatigiittumik ingerlatsinissaq anguniassavarput tassaavorlu tamanna Avannaata Kommuniata siunnerfia.
Kommunitut akisussaaffeqarpugut silaannaap allangoriartorneranut iliuuseqaqataassalluta, namminermi silaannaap allanngoriartornerata kingunerisai ullut tamaasa aqqusaartarpagut.
Kommunalbestyrelsimi pilersaaruterpassuarnik taakkartuerusunnaraluartoq pingaarnerit ilaannaat taakkartussuakka.
Taakkununnga ilaalluinnarpoq kommunip ineriartortinneqarnissaanut iliuusissatut pilersaarut ukioq naalersoq naammassineqartoq, tannalu ukiuni isikkaneq-marlunni atuuttussatut pilersaarusiaavoq.
Pilersaarut taanna Naalagaaffiit Peqatigiit nunarsuaq tamakkerlugu piujuartitsinissaq aallaavigalugu ineriartortitsinissaanik tunngaveqarpoq, taamalu takorluukkanik, pingaartitanik iliuusissatullu pilersaarusianik suliniutissanik nutaanik kommunitsinni aallartitsisinnaalissaagut.
Pilersaarut iluatsilluarniassammat kommunimi ingerlatsivinnni sulisut, innuttaasut suleqatillu avataaneersut akuutinneqarput. Siunissamilu innuttaasut, inuussutissarsiuteqartut, kajumissutsiminnik suliniuteqartartut oqartussaasullu allat suleqatigalugit ineriartortitsisoqassooq.
Pilersaarummi anguniakkatut qulequttat pingaarnersiorlugit saqqummiutissuakka.:
- Siunissaq ungasinnerusoq tunaartaralugu pilersaarusiorneq:
Siunissami pisariaqartinneqarumaartussat aallaavigalugit siunissaq ungasinnerusoq tunaartaralugu piujuartitsiffiusumik ineriartortitsineq.
- Nutaaliorneq:
Najukkani pisariaqartitanut akimmiffinnullu naleqqussakkanik aaqqiissutissanik nutaanik nassaarsiortassuugut.
- Pitsaassuseq:
Kommunimi sulinermi pitsaassuseq qaffasissoq ilisarnaataalerniassammat kiffartuussinerput sulisullu piginnaasaat qaffassassavagut.
- Akisussaassuseqarneq:
Akisussaassuseqarluta innuttaasut naatsorsuutigisaannik naammassinninniartassuugut.
Meeqqat atuarfiat ilinniagassanik ilikkagaqarnissaq pillugu toqqammavissiiginnassanngilaq, aammali meeqqat inuttut ineriartornerannut, inooqatigiinnermi piginnaasaannut, aammalu inuiaqatigiinni innuttaasutut sakkussaannik tunioraaviussaaq.
Atuarfiit qinngasaaruffiunngitsut pilersikkusuppagut.
Kommunalbestyrelsimi isumaqarpugut atuartut piffissamut eqquinissamik, pisussaaffinnut ataqqinninnissamut, inoqatiminnut ataqqinnittumik pissuseqarnissaannut, kiisalu inooqatigisaminnut isumaginninnernik tunngaviusumik paasinninnissamik ilinniagaqarnissaannut atuarfiit aamma akisussaaffimmik tigummisaqartut.
Meeqqat pisinnaatitaaffii kisiisa pinnagit aamma meeqqat pisussaaffinnik ilinniartinneqassapput.
Atuartut eqqartortillugit nuannaarutigalugu ilisimatitsissutigerusuppara, meeqqat inuusuttullu kommunitsinni suli oqartussaaqataanerulersinniarlugit Meeqqat Inuusuttullu kommunalbestyrelseqalernissaat kommunalbestyrelsimi ukioq naangajalersoq aalajangiukkatsigu. Taamaasiornitsigut meeqqat inuusuttullu oqariartuutaannik suli annertunerusumik kinguneqartitsisinnaalissaagut.
Avannaata Kommuniani pingaarnerpaatipparput innuttaasut atugarissaarnerat peqqissusaallu.
Innuttaasut kiffartuunnerisa pitsanngorsarnissaat sulissutigiuassavarput, aammalu innuttaasunut navianartulimmi inissisimaffeqartunut tapersersuinerit ilitsersuisarnerillu pillugit neqeroorutitsialannik peqarnissaq qularnaarniarparput. Innuttaasut timimikkut tarnimikkullu peqqissusaannik sullissineq siuarsarniarparput.
Innuttaasullu ikiorserneqarnissamik pisariaqartitsigaangata pisortat aaqqissuussiviata inuit nalingalugit isit nalaanni naapinnissaat anguniarparput, aammalu inummik tamarmiusumik taassumalu ilutigisaanik sulianik isumaginninnerup aallaaveqarnissaa qularnaarniarparput.
Pinaveersaarutitut suliat aqqutigalugit meeqqat angerlarsimaffiup avataanut inissitat amerlassusaat ikilisarniarpagut, tassani meeqqap isumalluutigisai angajoqqaavi ilaqutariillu tamarmiusut suli annertunerusumik sammissallutigit.
Ilaqutareeqarnermut ingerlatsivik nukittorsarniarparput, sanngiinnerusortatsinnik sullissinerput aallaqqaasiullugu nukittorsaavigineqassaaq.
Maannalu aqqutit nalinginnaasuunngitsut atorlugit iliuuseqartariaqaratta angalasartoqatigiit sulisunik ilaneqarnissaat piviusunngortikkusupparput sulisut arfinilinngortillugit.
Taamaasilluta sumiginnakkanik, isumaginninnikkut nalunaarutiginninnernik, kinguaassiuutitigut kannguttaatsuliorfiginninnernik allanillu suliassartallit aammalu meeqqanut illersuisoqarfimmit MIO-mit aammalu innarluutilinnut illersuisoqarfimmit Tilioq-mit uparuartuutigineqartarsimasut pitsaanerusumik kiffartuussiffigisinnaalissavagut.
Inuusuttut amerlanerusut sulisilernissaannut imaluunniit ilinnialernissaannut iliuuserisassat ersarissut suliarineqassapput.
Taamatut angusaqassagutta pisariaqarpoq sulisitsisunut qanimut suleqateqarnerit suli annertusarneqarnissaat aamma pisortat suliffiutaannut.
Inuussutissarsiortut kommunip aningaasaqarnikkut siuarsarneqarneranut tunngaviupput, taamaattumik pilersaarusiornitsigut inuussutissarsiuteqarnerup ingerlanneqarsinnaaneranut pitsaasunik sinaakkuteqarnissarput qularnaarinneqataanissarpullu pingaartuuvoq.
Oqartarpunga: aalisarneq ingerlalluaraangat kommunitta aningaasaqarniarnera ajunngitsumik ingerlasarpoq, tassami aalisartortatsinnut 500 millioner koruunit akiliutigineqartarput. Aalisartullu aningaasarsiaminnik atuinermikkut niuertarfinnik napatitseqataalluinnarput.
Sanaartorneruttaaq tungaatigut ingerlalluartoqaqaaq. Sanaartornerullu tungaatigut kommunitsinni ingerlalluartoqaraluartoq marlussunnik akimmiffeqartarpugut: Aasaanerani sanaartortoqartillugu sanaartornermi sulisussaaleqisoqartarpoq. Aamma Ilulissat avannarpasinnerusortaanni sanaartorneq ilungersunartorsiorfiujuarpoq, tassami Ilulissaniit avannarpariartortilluni sanaartortitsisinnaasunik neqeroortitsiniartarneq ilungersunarsiartortarpoq.
Taavanimi sanaartornerup ingerlallualernissaa kommunalbestyrelsimi ilaasortaasunit tamatsinnit neriuutit annersaasa ilagaat, tassami sanaartugassanut aningaasaliisaraluarluta sanaartortussaqanngimmat sanaartugassat kinguarsarneqartuarput.
Maannakkut eqqagassat tulluartumik isumagineqarneq ajorput, tamannalu avatangiisitsinnut, pinngortitamut, uumasunut innuttaasullu peqqissusaannut killup tungaanik kinguneqartitsivoq.
Eqqakkanik suliaqartarnitsinnut siuttuussaagut.
Ikuallaaveeqqat atorlugit atoqqiinerlu tunngavigalugit eqqaaverqarnerput pitsanngorsassavarput.
Eqqagassanik isiginninnerput allanngussavarput, annertunerusumik isumalluutaasutut eqqagassat isigineqalersillugit.
Innuttaasunut assut nuannaarutaasumik iluaqutaasumillu kommunimi kultureqarnermi sunngiffimmilu peqatigiiffiit pingaarutilittut inissisimaffeqarput. Peqatigiiffinnik piumassutsiminnillu suliaqartunik suleqatigiinninnerit nukittorsarniarpagut, taamaalillutik suliaqarnerminni siamasissumik neqerooruteqarnissamut pitsaasunik tunngaveqartuarlutillu toqqammavissaqartuassammata.
Pinngortitarput assissaqanngitsoq avannaanilu kalaallit kulturiat pissutigalugit Avannaata Kommunia tassaalersimavoq nunatsinni nunap immikkoortuini takornariaqarnikkut siuttuusoq, aamma tamanna attatiinnarniarlugu sulinerput ingerlateqqissavarput.
Taamatut siunnerfeqarnitsinni pinngortitarput sumiiffinnilu inuiaqatigiit akigalugit ingerlatsisoqannginnissa qulakkiigassaraarput.
Tikiffissaatitta ilisarnaatigissavaat takornariartitsineq piujuartitsisoq.
Akisussaassuseqarluni angalanerit, pinngortitap illersugaanera, aamma Avannaani inooqatigiinnermi kulturikkullu kinaassutsimik ataqqinnilluni misigisaqartarnissat takornariartitsisarnitsinni toqqammaviussapput.
Piffinni tamani, sanaartornikkut ineriartortitsineq suli ingerlaqqittariaqarpoq aalisarnikkut periarfissarititaasut tamakkiisumik atorluarneqassappata, tamannalu piviusunngortinneqarsinnaavoq talittarfeqarnikkut, ineqarnikkut meeqqeriveqarnikkullu annertuumik sanaartortitsinikkut.
Avannaani pisuussuterpassuit aningaasarpassuarnik nalillit atorluarusuppagut, aalisarnikkut tunisassiorfeqarnikkut takornariaqarnikkullu aningaasat pilersinneqartartut ineriartortitsinermut kommunitta iluani iluaqutaanerullutik aningaasalersuutaasariaqarput.
Upperilluinnarpara Avannaanut aningaasalersuineq tassaasoq nunatta sinneranut aningaasalersuinissaq pitsaanerpaaq.
Mittarfissap suliarineqarnera aallartereerpoq, oktober 2024-mi atulernissaanut suliassarpassuaqarpugut, imaassanngilarmi ammarneqarpat aatsaat ulapputilissasugut, naamik, sapiissuseqarluta ineriartortitsineq annertooq piviusunngortinniarlugu sulineq ingerlateqqissuarput, mittarfissaq ammarpat ingerlaannartumik kommunimut tamarmut nunatsinnullu iluanaarutigalugu iluaqutigilissagatsigu.
Inuusuttut immikkut saaffigerusuppassi, ilaseraassi ilaaniaritsi pisariaqartippatsigit. Suleqatiseraassi ingerlaqqinniarnitsinni ilissiuvormi siunissami akisussaaffimmik ingerlatitseqqittussat.
Ilissiuvormi kinguaariit nikinneranni inuiaqatigiit nalingiinnerusumik ineriartornissaannut aquummik tingusillusi allannguisussat, kikkunnullu tamanut assingiinnerusumik periarfissiisumik ilusilersuisussat.
Qaa sapinngilasi kivitseqataanissarsi pisariaqartipparput.
Avannaata kommuniata siunissaa isumallluarfigaara, innuttaasut eqeersimaartut siuarsaarusuttullu ilagalugit anguniakkat piviusunngortinneqarnissaat ataatsimoorluta suleqatigiissutigissuangut.
Avannaata Kommuniani innuttaasut, sulisut nunaqqativullumi tamassi kommunalbestyrelsi sinnerlugu ukiortaami pilluaritsi!