Pissutsit tamarmik ajunngikkaluarpata Kalaallit Nunaanni kikkut tamarmik sulinermikkut imminnut pilersorsinnaasussaagaluarput. Suliffeqanngikkuit najukkanni suliffissarsiuussisarfimmut saaffiginnissuteqassaatit. Matumani sulilernissannut qanoq periarfissarsiorluarsinnaanerit pillugu siunnersorneqarsinnaavutit.
Suliffeqareeruit allamilli suliffittaarusullutit, aamma suliffissarsiuussisarfimmut saaffiginnissuteqarsinnaavutit. Matumani suliffittaartussat allattorsimaffiannut allatsissinnaavutit, paasissutissat ilinnut tunngasut suliffissarsiuussisarfimmit pigineqalerniassammata, tassa ilittut piginnaasalimmik sulisitsisumik pissarsiortoqartillugu.
Kalaallit Nunaanni suliffeqarfinnut aalajangersimasunut qinnuteqaatit suliffissarsiuussisarfimmit allaffissornikkut suliarineqartarput. Suliffeqarfiit pineqartut tassaapput:
- Mittarfeqarfiit – Kalaallit Nunaanni Mittarfeqarfiit
- Greenland Contractors
- ISS
- Royal Arctic Line
- Aatsitassarsiorfiit
Suli.gl-ikkut suliffiit allattorsimaffianni CV-t ilanngutissavat suliffissarsiortutut nalunaarsorteqqaniaruit.
www.suli.gl
Suliffiit taakku arlaat suliffigissallugu soqutigigukku, qinnuteqarnissamut immersuiffissaq suliffissarsiuussisarfimmi pissarsiarisinnaavat. Qinnuteqarninni paasissutissatut ilanngutissavatit:
- Inuup normua ilinnut atuuttoq
- Atit
- Najugarisat
- Atuarsimaneq
- Ilinniagaqarneq
- Pikkorissarnerit
- Inuussutissarsiuteqarnermik misilittakkat aamma sulisitsisoqarsimagaanni taakkunannga oqaaseqaatit
- Inuttut atugarisat allat, assersuutigalugit ilaqutariinnikkut pissutsit, ineqarnikkut atugarisat peqqissutsikkullu atugarisat
- Pinerluuteqarsimannginnermut uppernarsaat
Inuttut nammineq qinnuteqaat ilanngukkukku qinnuteqarninnut iluaqutaasinnaavoq, piumasaqaataanngilarli.
Kommuneqarfik Sermersuup nittartagaani inuttut qinnuteqaat qanoq imaqassanersoq pillugu siunnersuutitsialaat takusinnaavatit.
Suliffeqarfinnut qinnuteqarnermi najoqqutassat assigiinngitsuupput taakkulu suliffissarsiuussisarfimmi annertunerusumik paasiniarsinnaavatit.
Suliffiit allat pillugit suliffissarsiuussisarfimmit ilitsersorneqarsinnaavutittaaq. Kalaallit Nunaat tamakkerlugu sulisussarsiornernut suliffissarsiuussisarfimmit siunnersuisoqartarpoq. Suliffiit arlaat pineqartut soqutigigukkit, qinnuteqaativit sumut qaqugulu nassiunnissaanut ilitsersorneqarsinnaavutit taavalu qinnuteqarninni suut ilanngutissaneritit pillugittaaq.