Pisortat ikiorsiissutaannik pisartagaqalerumallutit qinnuteqarsinnaanerit kommunimiit kommunimut allanngorartarpoq. Nalinginnaasumik sulianik sullissisumut inniminniisussaavutit. Pisortat ikiorsiissutaat sorliit ujartorneritit apeqqutaalluni assersuutigalugu aamma makku suliarissavatit
- Qinnuteqaatitut immersuiffissap immersornera
- Siusinnerusukkut isertitarisimasavit uppernarsarnerat, assersuutigalugu akissarsiat allagartaat atorlugit
- Aningaasartuutivit uppernarsaataanik ilanngussissaatit, assersuutigalugu inimut akiligassaq, innaallagissamut akiligassaq, eqqaavilerinermut/anartarfilerinermut akiligassaq, meeqqanut paaqqinnittarfimmiisitsinermi akiligassaq, kiassarnermi akiligassaq
Pisortat ikiorsiissutaannik qinnuteqarninnut atatillugu pappiaqqat eqqortut nassarnissaat pingaaruteqarpoq. Tamatuma suliamik suliarinninneq oqilisaatissavaa aningaasallu annertussusaat eqqortoq pissarsiarinissaat qulakkiissallugu.
Pappiaqqat sorliit kommunimut nassassaneritit, illit imminut aamma ilaquttannut pilersuisinnaajunnaarninnut inuttut atukkat suut patsisaanerat apeqqutaassaaq.
- Avissimaguit, averusernermut uppernarsaatit nassassavatit
- Suliffissaaleqisuuguit suliffissaaleqinermilu ikiorsiissutinik pisartagaqarnissamut periarfissaqarnak, sooq suliffeqannginnersutit pillugu sulisitsisunnit allagaqaat nassassavat
- Napparsimaguit, nappaammut uppernarsaatitut nakorsap allagarsiussaa nassassavat
- Erninermut atatillugu sulinngiffeqalissaguit, erninissamut killiliussatut naatsorsuutigineqartoq pillugu uppernarsaat nassassavat
Qinnuteqarnialeruit pappiaqqat tamaasa piareersimatikkukkit, illit suliakkiissutivit suliarineqarnissaa sukkasuumik ingerlanneqassaaq.
Malugiuk
Naleqqussarsinnaanermut ajornartorsiuteqarnerit imaluunniit peqqinnginnerit patsisaalluni sulisinnaanak misigisimaguit, naak suliffissarsiortut akornanniinngikkaluartutit pisortat ikiorsiissutaannik piffissap ilaani pisartagaqarsinnaanersutit kommunalbestyrelse tamanna pillugu aalajangiisinnaavoq.
Pisortat ikiorsiissutaannik pisartagaqarnissamik qinnuteqaateqarnerit tamakkiisuusumik ilaannakuusumilluunniit itigartinneqarpat, qinnuteqaatit pillugu aalajangiinerup allaganngukkap, tunngavilersugaallunilu naammagittaalliornissamut ilitsersuummik ilaqartup pissarsiarinissaanut pisinnaatitaavutit.