Umimmanniarneq

Umimmaap neqaa, amia, qiviui nassuilu pillugit umimmanniartoqartarpoq. Uumasoq miluumasoq naasortortuuvoq nalinginnaasumillu 200-300 kg missaanni oqimaatsigilersarluni. Umimmaat nalinginnaasumik Tunumi Kalaallillu Nunaata Avannaani uumasuupput, Ittoqqortoormiinit Ingefield Landimut.

Kalaallit Nunaata Kitaani Kap Athollimi, Siggummi, Naternami, Kangerlussuarmi, Ivittuuni aamma Nanortalimmi nuutanik umimmaqarfeqarpoq. Nuup eqqaani umimmaat namminneerlutik Kangerlussuarmiit kujammut ingerlaarnikuupput.

Kommunerisanni umimmanniarnermut kommunip ileqqoreqqusaanik peqaratarsinnaavoq. Umimmanniartinnak kommunip ileqqoreqqusaasa ilisimaarinissaanut pisussaaffeqarputit.

Umimmaat aallaasersorluni kiisalu pisissimik piniarneqarsinnaapput:
• Aallaasit inuussutissarsiutigalugu sunngiffimmilu piniartunut minnerpaamik 6,5 x 55 sulloqqortussuseqassapput (aqerloq 6,5 mm-inik diametereqassaaq).
• Aallaasit akiliisitsilluni aallaaniartartunut minnerpaamik 7,62 x 63 sulloqqortussuseqassapput (aqerloq 7,62 mm-inik diametereqassaaq).
• Kalaallit Nunaanni, Danmarkimi nunanilu allani assingusuni pisissimik piniarsinnaanermut misilitsinnermut angusisimaguit aatsaat pisissimik qarsunillu piniarsinnaavutit. Pisisseq Compound-iussaaq (katitigaalluni / nutaaliaq) umersinnaanermut aalajangersimasumik aaqqissuussimasoq nusutsisinnaaneralu minnerpaamik 60 pund-nik (28 kg) oqimaassuseqarluni. Qarsoq minnerpaamik 525 gram-nik (34 gram) oqimaassuseqassaaq. Qarsup nuua automatiskiusup atornissaa inerteqqutaavoq.

Angallatit/assartuutit atorneqarneri
Assartuutinik umimmanniarneq imaluunniit malersuineq inerteqqutaavoq aamma umimmanniarnermi qimmit nassaqqusaanatik.

Angallatit motoorillit atorneqarnissaannut kommunini ileqqoreqqusaliat malinneqassapput taakkulu piniariarfimmut aamma piniariarfimmiit assartuussineriinnarmut atoqqusaapput. Angallatinik motoorilinnik angalaniaruit, umimmaat uumasut qaninnerpaamik 500 meterinik ungasitsigissavatit.

Qimuttunik qimmeqarfinni angalallutit qimussersinnaavutit piffinni ukunani 44° W kitaani aamma 66° N avannaani.

Immikkut ittumik akuersissut
Inuussutissarsiutigalugu piniarnermut allagartaqaruit umimmannik ungoorinissamut immikkut ittumik akuersissummik qinnuteqarsinnaavutit. Immikkut ittumik akuersissummik qinnuteqarniaruit Aalisarnermut Piniarnermullu Naalakkersuisoqarfimmut allakkatigut qinnuteqassaatit. Immikkut ittumik akuersissummik qinnuteqaat makkunannga imaqassaaq:
• Peqataasussat allattorsimaffiat, kiisalu ungoorinissaq qaqugu sumilu pissanersoq pillugu paasissutissat
• Paasissutissiinermi ungoorineq snescooterit, ATV imaluunniit qulimiguulik atorlugu pissanersoq ilanngunneqassaaq

Malugiuk
Piniarnermi umimmammik uumasooruit piaarnerpaamik toqunnissaanut pisussaaffeqarputit. Umimmak uumasoorsimasaq nassaareqqinneqanngippat toqunneqaranilu tamanna Aalisarnermut Piniarnermullu Naalakkersuisoqarfimmut imaluunniit Piniarnermut nakkutilliisumut nalunaarutigissavat.

Umimmanniarusukkuit:

• Minnerpaamik 16-ileereersimassaatit.
• Atuuttumik piniarnermut allagartaqassaatit.
• Atuuttumik umimmanniarnissamut akuersissuqassaatit.

Piniarnermut allagartamik pissarsineq
Piniarnermut allagartamik qinnuteqarit imaluunniit allagartat nutarsaruk uani


Umimmannut akuersissummik pissarsineq
Umimmannut akuersissummik pissarsiniaruit najukkanni innuttaasunut sullissivimmut imaluunniit nunaqarfimmi kommunip allaffianut saaffiginnissaatit.

Umimmannut akuersissuteqarnikkut piniarfimmi aalajangersimasumi umimmannik pisaqarnissamut akuersissutaavoq. Akuersissummi takuneqarsinnaapput sumi umimmaallu qanoq amerlatigisut pisarisinnaagitit. Umimmannut akuersissut illit kisivit atortussaavat. Tamanna ima paasineqassaaq, allamut tuneqqusaanngilaq imaluunniit allamut tunniuteqqusaanngilaq. Umimmanniartillutit akuersissutip nassarnissaanut pisussaaffeqarputit.

Ukiaanerani umimmanniarnissamut umimmannut akuersissummik pissarsiniaruit piniarnermut allagartat kingusinnerpaamik 1. maj akilereersimassavat.

Umimmattatit nalunaarutigissavatit. Taamaaliornissamut periutsit marluupput:

• NemID-mik pigigukku, una toorlugu pisatit nittartakkatigut maana sullissivik.gl-ikkut nalunaarutigisinnaavatit.
  
  
• NemID-mik atuisuunngikkuit pisatit PINIARNEQ quppersagaq atorlugu ukiumut immersuiffissatigut nalunaarsorsinnaavatit, quppersagaq piniarnermut allagartamik tunisinninni ilanngullugu tunniunneqartarpoq nalunaarsukkallu uunga nassiunneqassapput fax-ikkut: (+299) 34 53 40, imaluunniit e-mail-ikkut: jagtbeviser@nanoq.gl.

Umimmattassat aalajangersarneqartarput agguataarneqartarlutillu imatut:

Piniarnermut Naalakkersuisup umimmattassat annertussusaat aamma tamanut tusarniaareernerup kingorna nuna tamakkerlugu agguaanerit aalajangertarpai.

Tamatuma kingorna najukkani KNAPP-t suleqatigalugit nunap immikkoortuini pisassiissutit kommuninit agguataarneqartarput.

Nunap immikkoortuini agguaassineq makitsinikkut imaluunniit qinnuteqarnikkut pisarpoq.

Ukiumi piniarfiusumi 2020-mi pisassiissutit aalajangerneqartut uani takuneqarsinnaapput

Piniarnermi nunat immikkoortut
Piniarnermi nunat immikkoortut qulingiluaapput:
• Kitaani tallimat (5).
• Qaanaap eqqaani marluk (2).
• Tunumi marluk (2).

Piniarnermi nunat immikkoortui uani takusinnaavatit: www.nunagis.gl

Piniarnermi piffissaliussat
Piniarnermi nunat immikkoortuini piffissaliussat piniarfiusinnaasut assigiinngitsuusinnaapput.

Nunanili immikkoortuni tamani atuuttoq tassaavoq, piniarnissamut aallartiffissaq aatsaat piaqqiorfiup kingorna pisassammat, nalinginnaasumik maajimi juunimilu aallartittartoq. Nuup aamma Nanortaliup eqqaanni umimmaat eqqissisimatitaapput.

Umimmanniarfiit 2020-imut atuuttut
Tiggaat tammajuitsussanik piniartitsinermut pisassiissutaasut aamma kulavaat norrallit norraat ilanngullugit piniaqqusaanngillat.

Aqutsiveqarfik Maniitsoq: Piniarfik 1-mi, 2-mi, 3-mi aamma 4-mi inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni.

Aqutsiveqarfik Sisimiut: Inuussutissarsiutigalugu aamma sunngiffimmi killilimmik umimmanniarneq 1. augustimi aallartissaaq 15. oktobari ilanngullugu ingerlassalluni umimmattassiissutillu 400-put.

Umimmaqarfik Naternaq: Inuussutissarsiutigalugu aamma sunngiffimmi umimmanniarneq 1. august-imi aallartissaaq 15. oktobari ilanngullugu ingerlassalluni umimmattassiissutillu 120-ullutik. Ussuit Nunaat, Ipiutaarsuup Nunaa aamma Eqalummiut Nunaat umimmaqarfimmut Naternamut ilanngunneqarnikuupput.

Aqutsiveqarfik Qaanaaq: Piniarfimmi Kap Atholl-imi inuussutissarsiutigalugu sunngiffimmilu umimmanniarnissamut umimmattassiissutit 40-put. Piniarfimmi Nuna Inglefield aamma Nuna Prudhoe-mi inuussutissarsiutigalugu sunngiffimmilu umimmanniarnissamut umimmattassiissutit allannguuteqaratik 60-iupput.

Aqutsiveqarfik Ivittuut: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. augusti ilanngullugu ingerlassalluni. Minnerpaaffiliinikkut kisitsineq maajimi 2020-mi ingerlanneqartoq tunngavigalugu umimmattassiissutit 22-upput taakkulu tamarmik 1-2-ukiullit. Angutivissat arfineq-pingasut aamma arnavissat 14-it.

Aqutsiveqarfik Sigguk: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni. Umimmattassiissutit allannguuteqaratik 150-iupput.

Aqutsiveqarfik Ittoqqortoormiit: Inuussutissarsiutigalugu aamma sunngiffimmi umimmanniarneq 1. augustimi aallartissaaq 15. oktobari ilanngullugu ingerlassalluni aammalu 10. novembarimiit 10. decembari ilanngullugu. Umimmattassiissutit allannguuteqaratik 115-iupput.

Umimmaat Ippatinut nunniussat (Nanortalik) Tasermiut qinnguani piniaqqusaanngillat.

Una tooruk Naalakkersuisut nittartagaatigut nalunaarut takuniarlugu.

• Tuttunniarneq
• Piniarnermik aalisarnermillu nakkutilliisut