Avannaata Kommuniani timersortartut angalanerinut, timersornermi atugassiat illup iluaniittut silamiittullu attartornerinut kiisalu sungiusaasut akissarsiassaannut tapiissuteqartoqartarpoq:
- Kalaallit Nunaanni pissartanngorniutivinnernut, Arctic Winter Games-inut, Island Games-inut, Inuit Pinnguaataannut kiisalu Nunarsuami pissartanngorniutivinnermut atatillugu timersortartut angalanerannut tapiissutit, billet-it akiisa 65 %-erisarpaat. Illoqarfinni nunaqarfinnilu timersornermik aaqqissuussinernut allanut atatillugu angallassinernut aningaasartuutit 25 %-iat timersoqatigiiffinnut tapiissutigineqarsinnaavoq
- Meeqqat inuusuttullu 15-it tikillugit ukiullit sunngiffimmi sammisaqartinneqarneranni ininik aamma silami atugassianik attartornermi tapiissutit 100 %-iusarput. Inunnut 15-it sinnerlugit ukiulinnut attartornermi tapiissutit 65 %-iusarput
- Meeqqanut inuusuttunullu 15-it tikillugit ukiulinnut sungiusaanermi akissarsiassanut tapiissutit ukiumut 5.000 kr.-iupput
Timersoqatigiiffiit amerlasuunik aningaasartuuteqarsinnaasarput, assersuutigalugu timersortarfiit attartornerinut aamma angalanernut. Timersoqatigiiffiit ilaasa aningaasartuutit taama ittut matussusernissaat ajornartorsiutigisinnaasarpaat, tassami isertittagaat nalinginnaasumik pingaarnertut ilaasortat akiliutaannit pigajummata. Kommunit timersorneq tapersersorumasarmassuk, timersoqatigiiffittut tapiiffigineqarnissamik kommunimut qinnuteqarsinnaavusi.
Kommunit timersornermut tapiissutaat tunniunneqarsinnaapput:
- Kalaallit Nunaanni pissartanngorniutivinnermi peqataanissamut atatillugu timersortartut angalanissaannut tapiissutitut
- Timersortarfiit attartornerinut qaammatikkaartumik tapiissutitut
- Ukiumoortumik sungiusaasunut tapiissutitut
Aningaasanik tunniussineq aamma aningaasaliineq
Kommunit ilaasa tapiissutit tunniuttarpaat aningaasartuutit ilissinnit suli akilerneqanngitsut.
Kommunini allani tapiissutit aningaasaliinertut tunniunneqartarput. Tamatuma kingunerisaanik aningaasartuutit nammineerlusi matussusertussaavasi, aamma aatsaat kommune tapiissutinik tunniussisarpoq siunertamut aningaasat atorsimagisi uppernarsisinnaagaangassiuk.
Malugiuk
Tapiissutinik qanoq ilillusi qinnuteqarsinnaanerlusi allaaserisat attuumassutillit ataanni annertunerusumik atuarsinnaavasi.