Toqukkut qimagunnerup kingorna kingusinnerpaamik ullut arfineq-pingasut qaangiunnerani (ulloq toqquviusoq ilanngullugu) ilisineq imaluunniit timimik ikuallaaneq nalinginnaasumik pissaaq.
Ilisineq ilagiinnit imaluunniit upperisarsioqatigiinnit ingerlanneqarsinnaavoq.
Ilagiit ilisinerat
Ilisinermi palasi peqataappat ilisineq ilagiit ilisinerattut taaneqartarpoq. Ilagiinnut ilaasortat taamaallaat ilagiit oqaluffianni ilagiinnit ilineqarnissamut pisinnaatitaapput, taamaalillunilu palasimit ilagiit sullinneqassallutik.
Toqukkut qimaguttoq ilagiinnit ilineqarnissaq kissaatigisimappagu, toqukkut qimaguttup najugaani ilagiit allaffiat attaveqarfigissavat. Palasi peqatigalugu ilisineq qaqugu qanorlu pissanersoq isumaqatigiissutigissavarsi. Oqaloqatigiinnerup nalaani tussiutit pingasut ilisinermi tussiutigineqarnissaat isumaqatigiissutigissavarsi. Toqukkut qimaguttup najugaani oqaluffiit arlaqarsimappata, ilisineq oqaluffimmit sorlermit pissanersoq aamma isumaqatigiissutigissavarsi.
Toqukkut qimaguttoq ilagiinnut ilaasortaanngippat, ilaqutaasulli oqaluffimmi oqaluussisoqarnissaa kissaatigippassuk, palasi ajoqiluunniit toqusut inaanni imaluunniit oqaluffimmi naatsumik oqaluussisinnaavoq.
Ilagiit allaffiannut saaffiginnikkuit toqukkut qimaguttup kuisinnermut, atiinut imaluunniit katinnermut uppernarsaataa nassassavat.
Ilagiit allaffiata isumagissavaa:
- Ilisinermi bus-inik angallassinissamik aaqqissuineq
- Ilisinissaq pillugu nalunaaruteqarneq
- Illerfimmik oqaluffimmiit iliveqarfimmut assartornera
- Iliveqarfimmi assaasussat
Upperisarsioqatigiit ilisinerat
Ilisinermi palasimik peqataasoqanngippat uppersarsioqatigiit ilisinerattut taaneqartarpoq. Kikkulluunniit – qanoq upperisaqarneq apeqqutaatinnagu – upperisarsioqatigiit ilisinerannik ilineqarnissamut pisinnaatitaapput, kisianni tamatumani palasimit ilagiinniit toqukkut qimaguttoq kiffartuunneqarsinnaanngilaq.
Upperisarsioqatigiit ilisineranni toqusut inai atorneqakkajuttarput imaluunniit allat ilisinerup ingerlanneqarneranut upperisarsiorfiunngitsut. Tamanna assersuutigalugu nammineerluni angerlarsimaffimmi, napparsimmavimmi qinusarfimmi, toqukkut qimaguttunut ikuallaaviup qinusarfiani imaluunniit katersortarfimmi ingerlanneqarsinnaavoq.
Upperisarsioqatigiit ilisinerat aaqqissuukkumagukku najukkami ilagiit allaffiat attaveqarfigissavat.
Toqukkut qimaguttoq upperisaqatigiinni allani ilaasortaappat, ilagiit kalaallinit allaasumi, assersuutigalugu frikirke-mi, ilisinerup aaqqissuunneqarnissaa pillugu tassani palasi attaveqarfigissavat.