airplanebooksbriefcase business cogs cross election entertainment fish house law lockmedicalpeopleselfservices socialtax

Pinngortitaq uumasuilu

Qaasuitsup Kommuniani nunarujussuup pinngortitaq assigiinngiiaaqisoq inissaqartilluarpaa.

Silap pissusaa, nuna, uumasut naasullu avannaaniit kujammut kommuneqarfiup iluani nikeraqaat.

Kommuneqarfik tamarmi qaasuitsup killeqarfiata avannaaniippoq aasamilu seqineq kaaviinnarpoq ukiukkullu kaperlattarluni.

Avannaani Qaanaami aasaanerani ullut 117-nit seqineq kaaviinnartarpoq ullunilu 99-ni kaperlattarluni. Kommuneqarfimmi illoqarfiit kujasinnersaanni, Kangaatsiami ullut 25-it kaperlattarpoq.

Kaperlak isumaqarpoq seqineq killingusaamiit nuissaartoq. Kommuneqarfiullu kujasinnersaani imaanngilaq ulloq unnuarlu taartartoq, tassami ulluunerani qaamasarpoq naak seqineq nuinngikkaluartoq.

Issittumi silap pissusaata kinguneranik ukiut amerlanersaanni imaq sikusarpoq decemberimiit april-maj-imut. Piffissami tamatumani imaq sikutillugu kommuneqarfiup annersaani ukiarsuit ingerlasinnaajunnaartarput.

Silap pissusaa
Kommune avannaaniit kujammut 1.600 kilometerit sinnerlugit isorartutigaaq.

Isorartussutsimi tassani silap pissusai assigiinngitsut pingasuupput: Issittup avannarpasinnerusuani Nuussuup ilaani, Qeqertarsuarmi kiisalu Sigguup Nunaata avannaani: Julimi 5 grader sinnerlugu kiattanngilaq. Pinngortitaq taamaallaat paarnaqutaannalittut, qaqqani narsarsuit, apussinerit kiisalu inoqajuittunik nunataqarpoq orpigaraqarni.

Issittup kujasinnerusuani nunap timaa tassaavoq Qeqertarsuup tunuani sineriak Uummannallu eqqaa: Julimi kiak 5-10 akornnanniittarpoq. Nunap timaa panertuuvoq, narsarsuaqarluni kiisalu orpikkat naatsuullutik.

Issittup kujasinnerusuani sineriak tassaavoq Qeqertarsuup qertartaa, Ilulissat aamma Qasigiannguit eqqaat tamaani orpigaqarpoq, paarnaqutit, seersuit kiisalu naasut tamalaat.

Uumasut

Aalisakkat
Qaasuitsup kommuniata imartaani aalisakkat assigiinngitsut amerlaqaat, qalerallit, saarulliit suluppakkallu. Inuussutissarsiutitut aalisarneqarput qalerallit, kinguppaat, assigiarsuit uukkallu.

Miluumasut
imarmiut
Kalaallit Nunaata avannaani puisit assigiinngitsut tallimaapput, immikkoortunilu aarrit takussaapputtaaq. Afferit assigiinngitsut 15-iusuni 11-t kommuneqarfimmi takussaapput, tassunga ilaapput arfivik, qilaqukkallu qaqortat qernertallu.

Miluumasut nunamiittut
Kitaata avannaani sumiiffimmi tamarmi tarianniaq ukioq kaajallallugu uumasuuvoq soorlu aamma ukaleq taamaattoq. Amaroq, narlumukaaq ukaliatsiarlu kommuneqarfiup avannarpasinnersaani takussaapput. Tuttut kommuneqarfiup kujasinnerusuaniipput Nuussuaq avannamut tikillugu kiisalu Pituffiup eqqaani. Umimmannik tunumeersunik nunatta avannaanut nuussisoqarsimavoq. Ilulissat Kangerluata kujataani Ilimanallu eqqaani umimmaqarpoq.

Timmissat
Nunatta avannaani timmiarpassuaqarpoq. Pingaartumik aasaanerani timissat tamalaarpassuit avannaanut ingerlaartarput. Ilaatigut appat arlariit kommuneqarfimmi erniortarput malamullu siammarsimaqaaq. Kommuneqarfiup avannaarsuani kanngooqarpoq. Sumiiffiit ilaani aqisseqartaqaaq, taakkulu piniagaalluartarput.

Kalaallit Nunaanni pinngortitaq pillugu Pinngortitaleriffiup nittartagaa alakkarsinnaavat.