airplanebooksbriefcase business cogs cross election entertainment fish house law lockmedicalpeopleselfservices socialtax

Kalaallit Nunaata Meeqqanut Atuarfiata kivinneqarnera

28. maj 2018

2014-imi Qeqqata Kommunia Kommunelu Kujallermiut atuartui tamarmik qarasaasianik atugassinneqarput. Atortorissaarneq iluaqutsiullugu kissaataavoq atuartut ilikkartarnerat allanngortinniarneqassasoq. Ingerlanniakkap annertuumik periarfissippaa atortutigut minnerunngitsumillu ilinniartitseriaatsip iluani pitsaanngoriartitsinissaq. Kisiannili marlunnik iluarsiniagassanik takkuttoqarpoq: Qarasaasiat silaannakkut tigooraanerat assut arriippoq aammalu kommunit taakku marluk ajornartorsiutiminnik iluarsiiniarnerminni assut kisimiillutik. ”Nunatsinni Atuarfeqarfiit kivinneqarnissaat” piviusunngortinniakkap malitsiginiassavaa. Nunatsinni kommunet tamarmik maanna pilersinniakkamik ataatsimoorussaqalerput, tassanilu Ilinniartitsisunngorniarfik Namminersorlutillu Oqartussat qanimut suleqatigisariaqalerpaat. Maannakkorpiaq oqarasuarnikkut aqqutit immap naqqatigoortut ikkussuunneqarput Nunatta inuisa 92%-iisa iluaqutigilluarsinnaasaat.

Pilersaarutip ukiuni tulliuttuni tallimani ineritikkiartuaarneqartussap kingunerissavaa Nunatsinni Meeqqat Atuarfiini atuartut qarasaasianik agguaavigineqarnissaat, ilinniartitsisut aqutsisullu atueqataanissamut piginnaanngorsarluarnissaat atuarfiillu sulinerminni qarasaasiaqarnikkut kivinneqarnissaat. Pilersaarutip ajornarunnaarsinniassavaa atuarfiit ilarpassui avinngarusimasumiittut inukittullu pisariaqartimmassuk kivinneqarnissartik. Pilersaarutip tikkuartutullu ippaa ilikkartitseriaatsit assigiingitsut atuartunut iluaqutaasumik sunniuteqarnissaat. Pilersaarutip aamma ammaatissavaa ungasianit atuartitsisinnaanerup qarasaasiarsornikkut atorlualerneqarnissaa.

Nunatsinni kommunit pilersaarummik pilersitsisuupput; tamannalu Ilinniartitsisunnngorniarfik Namminersorlutillu Oqartussat suleqatigalugit pissaaq. Ilinniartitsisunngorniarfik Meeqqat Atuarfiattut qarasaasiaqarnerup tungaatigut kivinneqassaaq siunissamilu malinnaasumik pikkorissartitsisarnissamik pisussaaffilerneqassalluni. Namminersorlutik Oqartussat teknikkikkut atuartitsissusiornikkullu piorsaanermi tunuliaqutaassapput.

Nunap ataatsimoorussamik atuartitsinerup iluani taama annertutigisumik alloriarniarnera oqaluttuarisaanermi immikkuullarissutut taasariaqarpoq. Tassami nunap atuarfeqarfia ataatsikkut kivinniarneqarmat. Pilersaarut nunarsuarmioqataasunit soqutigineqarpoq, tassanimi meeqqanik atuartitsineq nunallu inoqqaavinik pingaartitsineq pineqarmata. Pilersaarummut soqutiginnittoqarlualereerpoq tassami UNICEF aammalu Uruguayimi Ceibal Foundation nalunaarmata pilersaarutip ingerlalernerani paasisanik malinnaatinneqarnissaminnik kissateqaramik. Ammattaarlu Forum for oprindelige folk(Nunat inoqqaavisa suleqatigiiffiat) Verdensbankilu (Aningaasaateqarfissuaq) soqutiginnittuupput. Qarasaasialiorfissuaq Apple soqutiginnipporooq aammalu tapersersuinissaminik nalunaaruteqarluni.

Pilersaarutip anguniassavaa Kalaallit Nunaanni Meeqqat Atuarfiini atuartut ukiut tallimat qaangiuppata angusamikkut qaffariarsimanissaat aammalu amerlanerit ilinniaqqiffinnut anguttalernissaat. Angusat taakku immikkut naliliisartunit nakkutigineqassapput siunnersuisooqatigiinnit tamaneersunit tapersiivigineqarlutik.

Taamaalilluni Nunatsinni Atuarfeqarfik siunissamut piareerpoq.

Sukumiinerusumik atuaruk:
Kalaallit Nunaata Meeqqanut Atuarfiata kivinneqarnera.pdf