airplanebooksbriefcase business cogs cross election entertainment fish house law lockmedicalpeopleselfservices socialtax

Kommunalbestyrelsimi ilaasortat nutaat

13. juni 2018

Kommunalbestyrelsip ataatsimiinnerani ulloq 12. juni 2018-imi, Avannaata Kommuniani kommunalbestyrelsiani ilaasortat marluk ivertinneqarput aamma borgmesterip tullia siulleq toqqarneqarluni.

Pualuna Kivioq (A) aamma Edvard Geisler (PN) Avannaata Kommuniata kommunalbestyrelsiani nutaatut ilaasortanngorput, tassa Aqqalu Jerimiassen (A) aamma Anthon Frederiksen (PN) Naalakkersuisunut ilaasortanngornermik kingorna Avannaata Kommuniata kommunalbestyrelsianit sulinngiffeqarmata.

Aqqalu Jerimiassenip kommunalbestyrelsimit sulinngiffeqarnerata kingorna Ane Lone Bagger borgmesterip tulliatut suillertut toqqarneqarpoq. Kommunit aqunneqarnerat pillugu Inatsisartut inatsisaat nr. 29, 17. november 2017-imeersumi § 7, imm. 3 naapertorlugu borgmesterip tulliatut siullertut Ane Lone Bagger kommunalbestyrelsip ataatsimiinnerani ulloq 12. juni 2018-imi toqqarneqarpoq. "Borgmesteri imaluunniit borgmesterip tullia akuerineqarluni atorfimminiit tunuarpat, toquppat imaluunniit kommunalbestyrelsimit tunuarpat nutaamik qinersineqassaaq malittarisassat § 6-imiittut naapertorlugit, kommunalbestyrelsip piffissami qinigaaffiata sinnerani atuuttussamik.”

Kommunalbestyrelsimi ilaasortanngortut nutaat tikilluaqquagut aamma borgmesterip tulliatut siullertut toqqarneqartoq pilluaqquarput.