airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommuniani piujuartitsineq tunaartarineqalissaaq

Avannaata Kommuniata maannamut takorluukkatut siunniussimasaa kommunip ineriartortinnissaanut pilersaarusiamit 2017-imeersumit tunngaveqartoq allanngortinneqartussanngorpoq, taamalu piujuartitsineq kommunimi pingaartitatut tunngavigineqartussanngussaaq. Tamanna kommunalbestyrelsimi tallimanngornermi oktobarip 18-iani aalajangiunneqarpoq.
22. oktober 2019

Taamaalilluni Naalagaaffiit Peqatigiit 2030/Kommunip ineriartortinnissaanut pilersaarusiaq kommunalbestyrelsimit 2020-ip naalernerani akuerineqarsinnaasunngorlugu piujuartitsinermut pilersaarusiamik suliaq aallartinneqarsinnaanngorpoq.

Iliuusissatut pilersaarusiap aallartinneqarnerani kommunip ineriartortinnissaani innuttaasut pingaaruteqarnerpaat ilagaat. Taamaammat Naalagaaffiit Peqatigiit 2030/Kommunip ineriartortinnissaanut pilersaarusiatut siunnersuut 2020-mi aasannginnerani suliarineqarsinnaaniassammat innuttaasut kommunip anguniagai pillugit 2020-ip qiteqqutinnginnerani oqaloqatigineqartassapput.

- Naalagaaffiit Peqatigiit 2030-mut piujuartitsisumik anguniagaat kommunimi pingaartitanik tunngaviulissammata siunissarput pissanganartuuvoq, takorluukkiarlu ingerlatsiviit sulineranni atuutsilersinneqalissaaq. Piujuartitsinermik pilersaarusiaq aqqutigalugu innuttaasut pisinnaatitaaffiisa illersorneqalernissaannut qulakkeerinnissinnaalissaagut oqartussaaqataanerannillu nukittorsaalluta. Taamaammallu innuttaasunik akuutitsinitsigut piginnittuulersitsinissarput pingaaruteqartorujussuuvoq, Palle Jerimiassen Avannaata Kommuniani borgmesteri oqarpoq.

Piujuartitsinermik suliniutilerisoq atorfinittoq

Borgmesteri Naalagaaffiit Peqatigiit piujuartitsisumik 2030-mut anguniagaat pillugit 2020-mi missingersuusiamut atatillugu suliniuteqalernissamut piginnaatinneqalermat suleqatigiissitamik suliassaqarfinnit tamanit inuttalerneqarsinnaasumik pilersitsisoqassaaq. Suleqatigiissitami paasititsiniaanissamut innuttaasullu akuutinneqarnissaat pillugit pilersaarusiorneq, Naalagaaffiit Peqatigiit 2030/Kommunip ineriartortinnissaanut pilersaarusiassamut siunnersuut aammalu Ilulissani mittarfittaassami allannguutaajumaartussat aallaavigalugit kommunip pilersaarusiaanik allanngortiterinissaq suliarineqassapput.

Sarah Zaken inuiaat inuiaqatigiikkaat piorsarsimassuseqatigiiaallu ataqatigiinnerat pillugu ilinniarsimasuusoq aammalu Avannaata Kommuniani piujuartitsisumik ineriartortitsinissami suliniutilerinermi ingerlatsisutut atorfinerlaajusoq suliaminik aallartitsillualereerpoq:

- Kommunip iliuusissatut pilersaarusiaani piujuartitsinerup qitiusutut aallunneqalernissaanik suliaqalernissara qilanaarisimavara, tassanilu ataqatigiissaarisutut piviusunngortitsiniaasutullu suliaqassaanga. Piffissaq ungasinnerusoq eqqarsaatigalugu takorluukkianik anguniagaqarfiuinnaanani najukkat aalajangersimasut aallaavigalugit anguniagaqarfiussaaq kommunimilu innuttaasunut pinngortitamullu pinnersumut iluaqutissatut ukiut qulit tulliuttut ingerlaneranni piviusunngortinneqartussaallutik. Taamaattumik pingaartumik kommunimi innuttaasunik, inuussutissarsiuteqartunik aammalu suliassaqarfinni immikkut ilisimasalinnik 2020-mi naapitsinissaq qilanaaraara, taamaasilluta sumiiffiit aallaavigalugit suliniutissanik aalajangersimasunik piujuartitsiffiusunillu malunnaatilinnik aallartitsisinnaaniassagatta. Ukiup tulliuttup ingerlanerani paasititsiniaallutalu susassaqartitsinissanut qaasaasarumaarpugut, kikkullu tamarmik peqataatinneqarnissaannut qaaqquneqarumaarput.

Piujuartitsineq pillugu Naalagaaffiit Peqatigiit 2030-mut anguniagaat 17-inik anguniagassartaqartoq 169-inillu immikkoortortaqarluni.

Allattoq: Káte Hansen, khan@avannaata.gl
Asseq: Toqqorsivimmit