airplanebooksbriefcase business cogs cross election entertainment fish house law lockmedicalpeopleselfservices socialtax

NAKUUSA-mi inassuteqaatit borgmesterimut tunniunneqarput

NAKUUSA-mi Meeqqanut Isummersorfiini ilaasortat sisamat inassuteqaatinik Avannaata Kommuniani borgmesterimut ullumi tunniussipput. Borgmesterillu akissuteqarnermini oqaatigaa inassuteqaatit ilai kommunalbestyrelsimit piviusunngortinniarneqarnerat aallartereersoq.
20. november 2019
Monica Mathiesen NAKUUSA-p Meeqqanut Isummersorfianeersoq inassuteqaatinik borgmesterimut tunniussivoq.

Inassuteqaatinik tunniussineq ullumikkut Naalagaaffiit Peqatigiit Meeqqanut Aalajangersagaliaasa ukiunik 30-inngortorsiornerannut atatillugu pivoq. NAKUUSA-mi Meeqqanut Isummersorfiini Ilulissat sinnerlugu ilaasortat sisamat inassuteqaatit pillugit saqqummiusseriarlutik naqitanngorlugit borgmesterimut najuuttunullu allanut tunniussipput.

Meeqqat inassuteqaateqarnermikkut ilaatigut kissaatigaat atuarfiit tamarmik inunnik isumaginninnermik siunnersortinik atorfinitsitsissasut, meeqqat nunatsinni ajunnginnerpaamik peroriartornissaat oqallisigineqartariaqartoq, meeqqat pisinnaatitaaffii aammalu piujuartitsineq pillugu nunarsuaq tamakkerlugu anguniakkat pillugit atuarfinni ilinniarfeqarfinnilu suliniutinik aallussisoqassasoq, suliat meeqqanut tunngasut sukkanerusumik suliarineqartassasut, angajoqqaanik avittoqartillugu qitornaasut eqqugaasut angajoqqaanit angajoqqaatullu akisussaatitaasunit tusaaniarneqartalissasut aammalu isorliunerusuni internetitigut pitsaanerusunik attaveqalernissaq.

Meeqqanut kommunalbestyrelse
Avannaata Kommuniani borgmesterip Palle Jerimiassenip Meqqaanut Isummersorfinneersut qutsavigeriarlugit siullertut oqaatigaa, kommunalbestyrelsip ataatsimiinnermini kingullermi aalajangermagu Uummannami, Upernavimmi, Qaanaami aammalu nunaqarfimmi Kullorsuarmi atuarfinni inunnik siumaginninnermik siunnersortinik atorfinitsitsisoqassasoq, aalajangiinerlu tamanna isumaginninnermik siunnersortinik Ilulissani atuarfinni marluusuni atorfinitsitaqarluni misilittagaqarluarnermit aallaaveqartoq.

- Meeqqanut kommunalbestyreqalersinnaaneq pillugu kommunalbestyrelse ukioq manna aamma eqqartuisussaavoq. Aamma ilaqutariinnut illutaarnissaq, atuarfinnik pitsanngorsaanissaq aammalu meeqqanut ilaqutarinnullumi tunngasut susassaqarfiit akimorlugit suleqatigiissinnaanerit qulaajaavigalugit aallartereerpagut. Kommunalbestyrelsimi partiit tallimaasugut kommunimi meeqqat ilaqutariillu inuuniarnermi tunngaviusumik pitsaasunik atugaqassaqartinnissaat isumaqatigiissutigaarput, Palle Jerimiassen Avannaata Kommuniani borgmesteri oqarpoq.

Aalajangersakkanik tunniussineq NAKUUSA-mi Meeqqanut Isummersorfiisa ukiumoortumik Kangerlussuarmi novembarip aallaqqaataaniit pingajuat ilanngullugut ataatsimeersuartinneqareernerisa kingorna pivoq. Ataatsimeersuarnermi meeqqat 29-t peqataapput.

NAKUUSA-mi Meeqqanut Isummersorfiini ilaasortat Ilulissaneersuusut inassuteqaatitik pillugit Ilulissani innuttaasunut piorsarsimassutsip illorsuani Sermermiuni unnugu arfineq-marlunut oqallitsitsiniarput.

Naalagaaffiit Peqatigiit Meeqqanut Aalajangersagaliaasa ukiunik 30-inngortorsiorluni ullormi nunat siuttuisa meqqanut pisinnaatitaaffinnut pisussaaffeqarnitik uppernarsaqqippaat, ualimullu Katuami annertunerusumik sammisassaqartitsinermi Naalakkersuisut siulittaasuat Kim Kielsen aamma Kommuneqarfik Sermersuumi borgmesteri Charlotte Ludvigsen peqataassapput.

Allattoq: Káte Hansen, khan@avannaata.gl
Assit: Karen Filskov


Ilulissat NAKUUSA-p Meeqqanut Isummersorfiini sinniisuutai borgmesteri, illoqarfiup atuarfiini atuartut, atuarfimmi pisortat, politikerit aammalu kommunimi atorfilittat ilagalugit.