Borgmesteri, politikerit marluk aammalu atorfillit tallimat ulluni sisamani Qaanaami tikeraarsimareerlutik uteqqammerput. Tikeraarneq iluatsilluartutut pissarsiffiulluartutullu nalilerneqarpoq. Pingaartumillu innuttaasunik ataatsimiisitsinermut orniguttorpassuaqarneragut avataaniit tikeraarteqarnerup soqutigineqarluarneqarnera ersersinneqarpoq. Borgmesterillu tassani oqariartuutiginiakkani sapiiserluni apuuppaa.
- Avanersuarmiut ataqqinartorsuartut isigiuaannarpatsigit, ullumikkulli tusagassiuutit aqqutigalugit tusagaqaraangatta meeqqanik atornerluisarneq pillugu eqqartuisoqartarpoq. Annaassiniartutullusooq takkuttartussatut isigineqarnerput taamaatittariaqarpoq, taamaammat ataqqineqarnersi attatiinnarlugu pissutsinik aaqqiiniarnermi nammineq akisussaassuseqartariaqarpusi, borgmesteri Palle Jerimiassen innuttaasut ataatsimiinneranni oqarpoq.
Aamma najukkami ataatsimiititaaliami siulittaasup innuttaasut akisussaassuseqarneroqqullugit kajumissaarpai.
- Borgmesterip tikeraarnerani innuttaasut untritillit sinnerlugu innuttaasut ataatsimiisinneqarnerannut ornigupput. Assersuutigalugulu najukkami ataatsimiititaliap innuttaasunik ataatsimiisitsineranut kingullermut innuttaasut tallimat ornigupput. Taamaammat innuttaasut amerlanerusut innuttaasut ataatsimiisinneqarnerannut orniguttalersinnaasuuppata nuanneqqajaqaaq, aammalu illoqarfinnguatta Qaanaap takujuminarsarnissaanut tikikkuminarnissaanullu suleqatiginnilluarusukkatta, Mathæus U. Johansen Qaanaami najukkami ataatsimiititaliami siulittaasoq oqarpoq.
Tikeraarneq iluatsilluartoq
Avannaata Kommunianit tikeraat Qaanaamiinnerminni aamma utoqqaat illuannut, kommunip allaffianut, atuarfimmut aamma Majoriamut pulaarput aammalu aalisartut piniartullu peqatigiiffianeersunik kiisalu najukkami ataatsimiititaliameersunik ataatsimeeqateqarlutik. Borgmesterilu siunissamut isumalluarpoq.
- Avannaarsuani inuit akisussaassuseqarlutik allannguerusussuseqartut naapereerlugit isumalluarlunga angalaninnit utersimalerpunga, uagullu Avannaata Kommunianit tapersersuilluta siunissami suleriaqqinnissaanni tapersersorumaarpagut. Qaanaamiinnerput iluatsilluaqaaq aammalu inuttut pissarsiffigeqaarput, borgmesteri Palle Jerimiassen oqarpoq.
Aamma najukkami ataatsimiititaliami siulittaasoq isumalluarpoq.
- Ukiortaami innuttaasunik ataatsimiisitseqqinniarpugut, taamanikkornissaanullu innuttaasut qanoq akuunerulersisinnaanerlugit oqaluuserissavarput, neriuppungalu innuttaasut borgmesterip oqariartuutaa paasilluarlugu ataatsimiigiarrakkumaartut, Mathæus U. Johansen, najukkami ataatsimiititaliami siulittaasoq oqarpoq.
Allattoq: Káte Hansen, khan@avannaata.gl
Foto: Rigmor Villadsen
