Isiginnaartut tamassi ukiortaami pilluaritsi, neriuppunga tamassi ukiumut nutaamut iserluarsimassasusi.
Meerartatta siunissaat qaamanerulersinniarlugu sulinerput suli nangeqqissavarput. Kommunitut allannguinermi aallartikkattali anguniakkatut pingaarnertut siunnerfipput suli ilungersorluta anguniarparput. Inuit pillugit aningaasalinerit siunissaq pillugu aningaasaliinerupput. Uninngaannartoqanngilaq ajunngitsup tungaanut ingerlavugut
Avannaata Kommuniani Meeqqat Atuarfiat tassaavoq inuiaqatigiit pisuussutaat pingaarutilik. Pingaartipparpullu meeqqat atuarfiat toqqissisimaffiullunilu ilikkangaqarfiussasoq.
Atuartut inooqataanikkut nukittorsarniarlugit inunnik isumaginninnermut siunnersortinik atorfinitsitsiniarneq Kommunalbestyrelsip akuerivaa. Taamaaliornikkut atuartut siusinaartumik sullinneqarnissaat qulakkeerumallutigu.
Meeqqat Atuarfianni angusatigut unammilligassaqarpugut. Unammilligassallu anguniarnerini. Meeqqat Atuarfiini tamani iPad-inik atuilersitsiniarluta ukiumut aningaasaliissutissat qulakkeerneqarput, tassuunakkullu atuartut suliaminnut soqutiginninnerat atuarfimmullu kajumissusaat qaffassassuarput.
Kingullerpaamik kommunalbestyrelsip ataatsimiinnerani Peroriartortsitsinermut Ilaqutareeqarnermullu Ingerlatsiviit missingersuutaareersut qaavatigut 10 millioner koruuninik aningaasaliiffigineqarput.
Meeqqat pisinnaatitaaffii tamatta ilungersorluta sulissutigivagut aamma nukinnik aningaasanillu atuiffigalugit, tamannalu sulineq qasukkarneqarnani ingerlanneqartuassooq.
Meeqqalli aamma eqqaamassavarput meeraammata, meeqqat pisinnaatitaaffii pillugit erseqqissaangutta aamma pinngitsoorata meeqqat pisussaaffii killissaallu eqqartortariaqarpagut. Meeraq naalanganngortinniarlugu sulisoqanngitsoq ersarissumik meeqqanut angajoqqaanullu aamma erseqqissarneqartuartariaqarpoq, asanninnermummi killiliisarneq ilaammat.
Meeqqat ikorfartorneqartussat ikiorneqarsinnaaneri killeqartorujussuussooq angajoqqaavi perorsaasuiluunniit tamakkerlugit ikorfartunngikkutsigit. Ajornartorsiutit suuneri qulaajarneqarput sulilu ingerlanneqarluni, aaqqiissutaasinnaasunik suliaqarnissatsinnut paasisat atorluassagatsigit.
Sanngiinnerusortagut meerartagullu pillugit sulinerput tamarmiulluta sulisuugutta qinikkatulluunniit inissisimagutta suli pingaarnertut suliassatut isingiuassavarput.
Utoqqartagut inuiaqatigiinnut akuutinneqarnerusariaqartut pingaaruteqartut ilagivaat, pissussutitami ilagivaat, ullumikkut meeqqat inuusuttullu qujanartumik amerliartoqqilerput utoqqarnik ilalersortarnerat, utoqqarnullu qiimassaataasaqaat, tamannalu utoqqartatsinnut akuutitsinerulernissamik suliaqartarneq ingerlanneqartuartariaqarpoq, pissuussutaanillu atuilluartarnikkut
Kommunimi sulisut toqqissisimanissaat suliaminnullu tunngatillugu pinginnaanngorsartuarnissaat kivitsinissaminnullu pitsaasumik sakkussaqartuarnissaat pingaarluinnarpoq. Taamaattumik ukiormanna sulisut pilersaarusiorluakkamik qaffassarneqarnissaannut inuttullu ineriartornissaannut pilersaarummik pilersitsinissarput piviusunngussaaq.
Sunali tamarmi oqitsuinnaanngilaq. Pingaartumik kommunitta allanngornera eqqarsaatigissagaanni pisortat taarseraannerat ajoraluartumik nalaattarsimavarput.
Pissutsit tamakku kommunitut allanngornitta suleriusissatsinnik tulluarnerpaamik ujartuinitsinni naleqqussarnitsinnilu aqqusaagassaasimapput avaqqunneqarsinnaanngitsut, ilinniarfiusullu, taamaakkaluartorli kommunalbestyrelsimi qinikkatut siunnerfeqaqatigiinnerput allanngorneq ajorpoq.
Partiimmi tallimaasut akornanni isumaqatigiittuaannanngikkaluarluta immitsinnut ataqqeqatigiittarneq tunngavitta pitsaanerpaartaraat. Taamatullu suleriuseqarsinnaaneq aamma ajunngilluinnartunik angusaqarfiulluartarpoq. Tamannalu innuttaasut qinigaattut suleriusitsinni tunngaviit pingaarnersaraat
Sulisut manna iluatsillugu qujaffigerusupakka, naak unammillernartumiikkaluarluta nukittullutik ingerlatsinnermi pisussaaffinni naammassinnittuarniartarmata
Innuttaasut ilaqutariillu Avannaata Kommuneqarfiani nukittuut pigivagut sanngiinnerusuttagut kivinneqarnissaanut peqataalluinnarmata aamma taakku qujaffigerusuppakka.
Kommunimi sulivugut innuttaasunik sullissisuuniaratta, anguniartuassagatsigu innuttaasut ajunnginnerpaamik sullinneqarnissaat.
Suliffeqarfiit kommunitsinniittut tamarmik sulisussaminnik aalajaatsunik suliaminnut tunniusimasunik ujartuipput. Suliffissaaleqisoqanngilaq kommunitsinni ataavartumik suliffeqarusuttut tamarmik suliffeqarput, tamanna kommuunitut nuannaarutigaarput. Sulisussaaleqinerli massakkut piusoq siuariartornissatsinnut unammillernartut annerpaartarivaat.
Kommunitsinni ineriartornermi piffissaq manna sukataaleruttornerup naleraa – mittarfittaarnissap qanilliartornera ilutigalugu inuussutissarsiutitigut aallarnisaasut nunatsinni najugaqavissut akuullualereernerat tanngassimaarutissaavoq.
Mittarfittaarnissaq pillugu kommunitta avannaaniittut inuussutissarsiornikkut suli qaffassaqqinnissaat, soorlu uani eqqarsaatigivara aalisarnikkut takornariaqarnikkullu aqqutissiuunneqassapput, taamatullu inooriaatsikkut siuarsaasoqarnissaa tunaartaralugu.
Kommunimi aqutsisutut nassuerutigisariaqarparput kommunitta iluani tamani ineriartorneq tamakkiisumik atuutinngimmat – pingaartumik avinngarusimanerusuni ineriartorneq arriippallaamik ingerlavoq – tamatumani sumiiffiit tikikkuminaannerunerat, taamalu sanaartornermi akit qaffasippallaarnerat, sanaartornermi allanik ulapputeqarneq, taamalu sanaartorniarnermi sulisussaaleqineq atuupput.
Naallu avinngarusimanerusuni sanaartornissamik kommunalbestyrelsimi aalajangiisoqartaraluartoq, pissutsit taakkartukkakka pissutigalugit ineriartortitsiniareq arriitsumik ingerlavoq.
Kommunerput nukittorsarusullugu ilungersorpugut.
Kommunitsinniit nunap aningaasarsiorneranut annertuumik tapertaanerput suli annertusarneqarpat nunatta sinnerata iluaqutigisussaavaa.
Maannamut Kommunip aningaasarsiornikkut ingerlanera ajunngitsumiippoq, siunisamili anguniagassagut pisussaaffiit unammillernartortallit tamaasa akissaqarfigissagutsigit innuttaasunnillu sullissinermi eqquinngitsumik Kommunip aningaasaqarnikkut aqutsinera patajaannerusariaqarpoq, tamannalu manna anguniarneqarpoq aningaasaqarnikkut aqutsinermi missingersuusiortarnermilu allanngortiterinikkut siammasinnerusumik tulleriiaarisarnermilu ukiunut arlalinnut siunnerfilimmik aqutseriaatsikkut.
Taamaattumik Nunatta avannaani aalisarfiulluartuni inuussutissarsiornermi pisariaqartinneqartut innuttaasullu pisariaqartitaat eqqarsaatigalugit Naalakkersuinikkut ingerlatsisut piorsaanissamut aningaasaleeqataasariaqarput.
Imeqarnikkut, atserinerikkut, meeqqeriveqarnikkut il.il. nunatta aningaasarissaarnerulernissaanut siumut aningaasaliinerussussat, ajoraluartumik Naalakkersuinikkut ingerlatsisunit eqqumaffigineqarnerat annikippallaaqaaq tamannalu allanngortikkusupparput suleqatigiinnikkut.
Angallannikkut pissutsit Ilulissat avannaani aasaangaluarpat ukiuungaluarpalluunniit ajorluinnartumik inissisimapput, ilungersunaqaaq tassuunakkut pissutsit nalunngikkaluarlugit aaqqiissutissaasinnaasunik Naalakkersuisut iliuuseqarneq ajormata.
Ukiuni aggersuni piumasaraarput nunatta aningaasarsiornikkut pilersuisui tamakkiisumik sumiikkarluaraanniluunnit eqqumaffigineqassasut.
Takornariaqarneq inuussutissarsiutitut annertusiartorpoq, sulilu pitsaanerusumik ineriartortittuarnissaa anguniarlugu takornariaqarnermut sullissivimmik pilersitsinissaq sulissutingaarput.
Takornariartaassuit umiarsuit tikittartut qujanaqaat taamaakkaluartoq apeqquserneqarsinnaavoq qanoq annertutigisumik aningaasarsiornikkut iluaqutaanersut.
Kivissinnassarput naapertorlugu ataavartumik tikittarnissaat anguniartariaqarparput, isumaqatigaakkalu Ilulissani takornariaqarnermut siunnersuisooqatigiit siunnersuuteqarmata ullormut umiarsuit tikittartut ataasiakkaartunngortinneqarnissaat amerlanerpaamillu ullormut 1000-nik ilaasoqartarnissaat siunnersuutigimmassuk.
Nunaqavissut oqaasiinnakkut peqataatinnerulernissaannik oqalunneq qimallugu pilersaarusiortoqassaaq nunaqavissut peqataatinnerulerneqarnissaannik pilersaarummik pilersitsinikkut.
Takornarissat kommunimut iluaqutaapput aammali aningaasartuuteqarfigaagut, eqqarsarnarpoq avatagiisitsinnik pisariaqartitaannullu atuinerat uagut kommunitut kisitta aningaasalersoratsigu. Takornarissat avatagiisimik atuinerminnut pisariaqartitaminnullu atuinerminnut akiliisalernissaat pisariaqarpoq soorlu Ilulissani Unescomut 2020 mi aallartittumik akiliisalernissaat sulissutingineqarluni aallartissasoq.
Aalisarneq inuussutissarsiutitta suli pingaarnersaraat aamma taamatut inissisimajuarnissaa qularnanngilaq. Aalisarnermut isumasioqatigiisitsinerup kingornatigut massakkut kommunitsinni qassusersorluni qaleralinniarnermut ileqqoreqqusassaq suliaraarput aalisartut tunisassiorfiillu qanimut suleqatigalugit. Annertuumik aalisakkerivinnik piorsaaneq sualummik Upernaviup eqqaani ingerlanneqarpoq.
Illuatungaanili umiatsiaararsortut uneqattaartumik aalisaqqittalernerat aaqqiivigineqartariaqarpoq.
Suliassaq tamanna aaqqiiviginiarlugu aalisarnermut attuumassuteqartut tamaasa oqaloqatigeqqittariaqarpagut, isumasioqatigiisitsineq imaluunniit allatut aaqqissuussinissaq pisariaqarpoq.
Aalisakkat kommunitta iluani pisarineqartartut naleqarnerulersillugit suliareqqiisarneq aqqutingalugu ingerlanneqarnerusariaqarput. Tunisassiorfiit kommunitsinniittut kivitsisinnaassusaat tamakkiisumik atorluarneqartariaqarput aalisakkanillu pilersorneqarnerat aporfilersuinani eqaannerusumik ingerlanneqartariaqarluni.
Aalisakkerivinni sulisut ilinniarfigisinnaasaannik amigaateqarneq aaqqiivigineqartariaqarpoq, nunatta pingaarnertut inuussuutigisaanut ilinniarfeqarnissaq pisariaqarluinnarmat, aalisakkerisarneq aalisakkerisullu nunatsinni pingaassusaat naqissusernerusariaqarparput.
Napparsimasut innarluutillillu atugaat pillugit massakkut qujanartumik napparsimaveqarfik qanimut suleqatigalugu pitsaanerusumik iliuuseqarfiginissaannut aqqutissiuussinniarluta isumaqatigiissuteqarpugut.
Napparsimaveqarfiup politiillu qanimut suleqatigiinnerisigut unammilligassat suunersut annertunerusumik ilisimasaqarfigilernerisigut sulinitsinni pitsaanerusunik sakkussaqarnissarput anguniarparput aamma angorusupparput, napparsimaveqarfiit politiit pitsaaliuisullu suleqatigilluta.
Ulluinnarni isumaginninnikkut unammilligassaqarneq suli nukippassuarnik atuiffigaarput. Ilungersorpugut ilorraap tungaanut nikeriarnissaq angorusullugu
Malunnaatilimmik nikeriartoqassappat innuttaasut sumiiffimminni suliniutinut pinginnittuulernissaat pisariaqarluinnarpoq.
Uagut pisortatut qanorluunniit iliuuseqartigigaluarutta innuttaasut namminneq akisussaaffimmik tingusinngippata pinginnittuulinngippatalu nikeriartitsinissaq ajornakusoortorujussuusoq paasereerparput.
Inuk allanngortissinnaanngilarput inunguna nammineerluni imminut kisimi allanngortitsisinnaasoq. Inuttut siunnerfeqarluni anguniaqartuarnissaq tamatsinnut pingaaruteqarpoq, tamannalu Kommuunitut aqqutissiueqataalluta anguniassavarput.
Qanorluunniit inuunerup atugassarititaani unammillertigigaluarpatigut ullut nuannersunngortinniarnissaat nukittuffiginissaalu nammineq suliassaraarput, qanortoq illit aamma taamaaliorina.
Inuit akornanni akuersaaqatigiinnissaq – inunnik immikkooruteqarsinnaasunilluunniit akuersaarinninnissaq – pissakilliortuuppata, immikkut upperisaqarpata, suiaaqatigiinnoorpata, arlaatigulluunniit unioqqutitsilaarsimappata ajattuinnginnissaq pisariaqarpoq – apeqqutaaginnarpoq inuiaqatigiinni maleruagassatsinnik inatsisitsinnillu unioqqutitsinaveersaarnissaq, taakkuummatami inuiaqatigiittut immitsinnut illersornissatsinnut pingaaruteqarnerpaat.
Avannaata Kommunia sinnerlugu ukiortaami tamannguassi pilluaritsi, siunissamilu ilaqutannguasilu pilluarnermik peqqinnermik kissaatingaarpassi, suleqatigeeqqinnissarsi qilanaaralugu inuulluarisi qujanarlu.