airplanebooksbriefcase business cogs cross election entertainment fish house law lockmedicalpeopleselfservices socialtax

Nunami eriagisami ukiukkut ingerlaarsinnaanermut immikkut akuersissuteqarneq

Avannaata Kommunia UNESCO-p nunarsuarmut kingornussassiaatigut Ilulissat aammalu Kangiata akornatigoortukkut ukiuunerani aqqutiliatigut motoorinik ingerlatilinnik ingerlaartoqarsinnaaneranut immikkut akuersissuteqarpoq.
24. januar 2020
Ukiuunerani aqqutissiatigut motoorilinnik ingerlaarfigineqarsinnaasoq titarnermik qorsummik nalunaaqutsigaavoq.

Kommune ingerlaarsinnaanermik arlalinnit qinnuteqarfigineqareersorlu immikkut akuersissuteqarneq pivoq. Taamaasilluni qamuteralaat atorlugit aalisakkanik assartuisinnaanermut, takornarianik angallassisinnaanermut innuttaasullu nalinginnaasumik ingerlaarsinnaanerannut periarfissiisoqarpoq.

- Ukiuunerani aqqutissiatigut ingerlaartoqarsinnaaneranut Avannaata Kommunianit periarfissiisinnaanerput nuannaarutigaarput. Pingaartumillu illoqarfimmi inuussutissarsiuteqarnermut aammalu tunisassiorfiit tunisassiassanik pilersorneqarnerannut pingaaruteqaqisumik aalisartut takornariaqarnermillu sullissisut aqqutissiatigut ingerlaarsinnaalernerat nuannaarutigaarput, Palle Jerimiassen, Avannaata Kommunia borgmesteri unnersiorpoq.

Ingerlaarsinnaanermut piumasaqaatit
Aqqutissiatigut immikkut akuersissuteqarnikkut ingerlaartoqarsinnaalerneq 2020-mi januaarip 23-aniit 2020-mi ukiuunerani atuutissaaq. Ingerlaarsinnaanerullu qaqugu unitsinneqarnissaa Avannaata Kommunianit nalunaarutiginerumaarpoq.

Qamuteralaat saniatigut qamussuarnik illiniliuutit aqqutissiami illiniliortussaasut aqqutissiami aamma atorneqarsinnaatitaapput. Aqqutiliap avataatigut ingerlaarneq inerteqqutaavoq, taamatuttaaq nunap naasuinik innarliisinnaasunik saarlilluni sangoriataapiloortoqaqqusaanngilaq.

Avatangiisinik innarliisumik ajutoortoqarpat mingutsitsinerup siaruaannissaa pinaveersaartinniarlugu iliuuseqartoqapallassaaq, sillimaniarnermilu piareersimasuutitat erngertumik kalerrinneqassapput. Aamma aqqutissiamik atuitilluni nunaannarmi atortunik eqqagassanilluunniit qimatsisoqaqqusaanngilaq.

Allattoq: Káte Hansen, khan@avannaata.gl
Nunap assinga: Teknikkeqarnermut Ingerlatsivik