airplanebooksbriefcase business cogs cross election entertainment fish house law lockmedicalpeopleselfservices socialtax

Avannaata Kommuniani ineriartornissamut qaartitseqqaarneq

Avannaata Kommuniani takornariaqarneq inuussutissarsiutitigullu ineriartorneq ingerlalluarpoq. Ilulissani mittarfissuassap nunarsuup sinneranut ammaassisussap sanaartorneqarnerata aallartinneqarneragut kommunimi suli ineriartortoqalerumaarnissaa borgmesterip Palle Jerimiassenip ilimagaa.
29. januar 2020
Mittarfiup tallineqarnissaanut qaartitseqqarneq.

Ilulissani mittarfittaarsuassap sanaartorneqarnissaanut qaartitseqqaarneq Kalaallit Nunaannut pingaaruteqarluinnartussatut borgmesterip siulittuutigaa.

- Mittarfittaarsuaq 2023-mi atuutilerpat ineriartornerujussuaqalerumaarnissaa piareersimaffigisariaqarparput. Killiffik pingaarutilerujussuaq inuussutissarsiutinik nutaanik pilersitsiffiusussaq taamalu nunatsinni inuiaqatigiinnut iluaqusiiumaartussaq atuutilerumaarpoq, Palle Jerimiassen Avannaata Kommuniani borgmesteri oqarpoq.

Nunatsinni naatsorsueqqissaartarfiup kisitsisaatai nutaanerpaat 2017-imeersut naapertorlugit Kalaallit Nunaanni suliffeqarfiit amerlanerpaartaat 1.725-usut Qaasuitsup Kommunerisimasaani inissisimapput, Kommuneqarfik Sermersoorlu tullersortaalluni 1.464-inik suliffeqarfeqarpoq.

Ineriartorneq nunatsinniit siuttuuffigineqassaaq
Borgmesteri isumaqarpoq takornariaqarneq aamma ineriartorfiujumaartoq. Qeqertarsuup tunua takornarianit unnuiffiunerpaasarluni Kalaallit Nunaanni takornariaqarnermik inuussutissarsiuteqarnikkut siuarsimanerpaajoreerpoq, Ilulissallu Kalaallit Nunaanni siornatigut sulilu maannamut takornariaqarnerpaaffiuvoq.

Aningaasaliissuteqarsinnaasut nunatsinneersut Ilulissani ineriartortitsinissamik periarfissanik takunnereerlutik unnuisarfiliornernut aningaasaliissuteqartalereerput, aningaasaliissuteqarniartullu nunanit allaneersut Ilulissani aningaasaliisinnaanissamik periarfissarsiorlutik suli ullumimut saaffiginnissuteqartarput.

- Mittarfiup allilerneqarneragut inuussutissarsiornikkut ineriartornerup suli annertuseriarnissaa qularutissaanngilaq. Nunanit allaneersut ineriartornissami peqataarusullutik aningaasaliissuteqarniarlutik saaffiginnittarput, ilisimaarereertariaqarparpulli ineriartorneq avataaniit aqunneqassanngimmat. Ineriartornissaq uagut nammineq nunatsinniit siuttuuffigissavarput. Taamaattumik-una aamma illoqarfimmik ineriartortitsinissamik ingerlatseqatigiiffik pilersikkipput, taamaasiornitsigut najukkami inuussutissarsiutinik suliaqartut ineriartornermi akuutinneqarniassammata – Ilulissaniinnaanngitsoq aammali kommunip sinnerani. Taamaammat siunissaq pissangartoq qanilliartorparput, Palle Jerimiassen oqarpoq nangillunilu:

- Mittarfiup tallineqarneragut innuttaasut akikinnerusumik sivikinnerusumillu nunarsuup sinneranut angalasalissapput. Mittarfiulli naammassineqareernerata kingorna inuiaqatigiit aaqqissuussaanikkut allanngorujussuarnissaat pingaarnertut piareersimaffigisariaqarpaat.

Ilulissani mittarfittaassarsuup nunarsuup sinneranut ammaassisussap sanaartorneqarnera 2023-mi oktobarip 23-ani naammassineqassangatinneqarpoq.

Allattoq: Káte Hansen, khan@avannaata.gl
Assit: Karen H. Filskov, khf@avannaata.gl


Paalu Thomsen qulingiluanik ukiulik aamma Felix Larsen arfinilinnik ukiulik Naalakkersuisut siulittaasuat Kim Kielsen peqatigalugu qaartitseqqaarnermi toorsisuupput.
Naalakkersuisut siulittaasuat Kim Kielsen aamma Avannaata Kommuniani borgmesteri Palle Jerimiassen.