Kommunalbestyrelse ukioq manna februaarip 19-iani siullermeerluni ataatsimiippoq. Oqaluuserisassaq ataasiinnaavoq: Avannaata Kommuniani ukiup 2019-ip sisamaraarterutaani aningaasaqarniarnikkut killiffik.
Kommunip 2019-imi ukiup naaanerani aningaasaatissaatut 58,6 millioner koruuninut missingersuusiarisimasaralui 71,4 millioner koruuninik inerneqarput, taamalu pitsanngoriaat 12 millioner koruuniulluni. Naafferaalluni akilersuinerit, soorlu isertitassat, akiligassat aamma aningaasartuutissat piffissani assigiinngitsuni naatsorsuusiorfigineqartartut suli naammassineqanngikkaluarput. Immikkulli ittumik pisoqariataanngimmat karsimiittuutit 71,4 millioner koruuniuinnarnissaat naatsorsuutigineqarpoq.
- Kommunip aningaasaqarnikkut nukittoriartornera pitsaavoq, maluginiarsimavaralu ingerlatsiviit ilassutitut aningaasaliissutinik qinnuteqarlutik ukiuni kingullerni ileqqorilersimasaat pisarunnaariartortoq. Taamaammat kommunip aningaasaqarniarnikkut ineriartornera kommunimi assigiinngitsutigut aningaasaliissuteqarluni suliniuteqalernissamut tunngaviliisussaq isumalluarfigaara, Bendt B. Kristiansen Inuit Ataqatigiit sinnerlugit kommunalbestyrelsimi ilaasortaasoq oqarpoq.
Qarsupiinnarneqarsoripput
Partiit tamarluinnarmik kommunip aningaasaqarniarnikkut inissisimanera iluarisimaarpaat. Taamaakkaluartorli kommunalbestyrelsimi ilaasortat Upernavimmeersut nunaqarfiineersullu sanaartugassatigut qarsupiinnarsorineqarlutik naammagittaalliuutinik anersaaruluuteqarput.
- Upernavimmi pigisaanilu sanaartugassatigut neriorsuutigineqarsimasunik aammaartumik qarsupiinnarneqassagutta tupinnassaaq. Isumaqarpunga sanaartugassatigut pisariaqartitsineq aallaavigalugu pingaarnersiuisoqartalertariaqartoq, taakkulu ataatsimiititaliani saqqummiunneqartalissasut, Regine Bidstrup Tasiusameersoq aammalu Inuit Ataqatigiit sinnerlugit kommunalbestyrelsimi ilaasortaasoq oqarpoq.
Kommunalbestyrelsimi ilaasortat tallimaasut Upernavimmeersut nunaqarfiineersullu Atassut, Siumut, Inuit Ataqatigiit aamma Partii Naleraq sinnerlugit ilaasortaasuusut kommunalbestyrelsip ataatsimiittarnerini sanaartugassat tungaasigut qarsupiinnarneqartarnitik arlaleriaqalutik naammagittaalliutigisarpaat.
Isorliunerusuni sanaartorniarneq ajornartorsiutaasoq
Borgmesteri Palle Jerimiassen kommunalbestyrelsip 2019-imi novembarip 26-ani ataatsimiinnerani kingumut nassuiaavoq, Upernavimmi nunaqarfiinilu sanaartornerit 25-30 millioner koruuninik nalillit ingerlanneqaleruttortut aammalu suliffeqarfiit assigiinngitsut 100 millioner koruunit missaasa nalinginut sanaartortut, sanaartugassanilli suliassinneqartartut sanasullu Avannaata Kommuniani ulapputeqarnertik pissutigalugu sulisussaarullutik suliassanik allanik tigusisinnaajunnaarsimanerat pissutigalugu sanaartugassanik allanik pilersaarutaareersunik aallartitsisinnaanngikkallartut. Nassuiaanini nangillugu oqaatigaa sanasut sanaartugassatigut neqerooruteqarnissaminnut 10 %-inik qularnaveeqqusiissutissanik piumasaqaatinut naammassinninnissaminnut ajornartorsiuteqartartut, aammalu Sulisitsisut naapertorlugit Ilulissaniinnaq assassorluni suliaqarsinnaasunik 200-nik amigaateqartoqartoq. Borgmesterip aamma ilassutigaa Upernavimmi nunaqarfiinilu sanaartornermi kvadratmeterimut akigititaq kommunip sinnerani akigititanut naleqqiullugu taama qaffasinnerutigitillugu sanaartugassanik suliassinneqartartut neqeroorutigisartagaat kommunimut akisuallaalertartut, soorlu assersuutigalugu utoqqaat illuannik sanaartornermi kvadratmeterimut 60.000 koruunit missaanik akeqartitsisoqarsimasoq.
Kommunalbestyrelsip kingullermik 2020-mi februaarip 19-iani ataatsimiinnerani Avannaata Kommuniani borgmesteri Palle Jerimiassen oqarpoq:
- Sanaartugassanik kissaatinut missingersuutit ataatsimiititaliani aammalu kommunalbestyrelsimi qaqinneqartareerput. Piviusorlu unaavoq; sanaartugassanik suliassinneqartartunik sanasunillu isorliunerusuni sanaartugassanik suugaluartunilluunniit neqeroortitsiniaasarneq ilungersunartuuvoq. Maannali Nuugaatsiarmiut Illorsuarmiullu ajunaarnersuaqarnerani eqqugaasimasut illuliuunneqarnerat naammassiartulermat sanaartugassanik suliassinneqartartut neqeruullattaallutik aallarteqqipput. Sanaartugassanillu suliassinneqartartut ilaat Upernavimmi sannavimmik pilersitsisinnaanermik eqqartuilersimavoq.
2020-mut sanaartornissamut missingersuusiarineqartut 94,2 millioner koruuniullutik 2018-imi naatsorsuutiniittunut 81,6 millioner koruuniusunut sanilliullugit qaffasinnerupput. 2019-imi sanaartugassaagaluit 2020-mi naammassineqartussanngortut 7,8 millioner koruuninik naleqarput, sanaartugassatut suliniutit ukiuni sisamani pituttorfigisat 29,6 millioner koruuninik naleqarput aammalu sanaartugassat Namminersorlutik Oqartussat aningaasaliiffigisaat 32,1 millioner koruuninik naleqarput. Suliniutit ilaatigut tassaapput Ilulissani inissiat 24-t, Upernavimmi Tasiusamilu kivittaatiliinissat aammalu Saattuni tulattarfimmi majuartarfiliinissaq kivittaatiliinissarlu, Ilulissani, Uummannami aammalu Ilimanami attakut aqqutaannik iluarsartuussinissaq, Uummannami Ukkuissanilu ulluunerani paaqqinnittarfiliornerit, atuarfinnik iluarsartuussinissat aammalu Upernavimmi nunagissaanissaq. Ilulissani, Upernavimmi aammalu Uummannami asfaltilerinermi atortussanik pisineq, Innaarsunni nutaamik atuarfiliornissaq aammalu Uummannami eqqagassalerinermi eqqakkanik tigooraavilionissaq ilanngukkaanni sanaartugassanut 94,2 millioner koruunit missingersuusiarineqarput.
Avannaata Kommuniani qaammatit pingasukkaarlugit missingersuusiortarnerit, taamalu missingersuutinik naatsorsuusiornermilu anguniakkanik pitsaanerusunik nakkutiilliisalernissaq ukiortaamiit atuutilersinneqarpoq.
Allattoq assiliisorlu: Káte Hansen, khan@avannaata.gl
