Avannaata Kommuniani inuiattut ullorsiorneq persursiorfiusussaavoq. Sermermiut Kulturikkut illorsuarmi pisussanik ataqatigiissaarisartut ullormi pisussanik soqutiginartunik pilersaarusiorsimapput, ilaatigut nipilersortartut erinarsortartullu tusaamasat aliikkusersuisorineqartassallutik.
Ulloq aallarnerlugu kommunip allaffeqarfissuata silataani erfalasumik amusisoqassaaq, tassanilu borgmesteri Palle Jerimiassen oqalugiaateqassaaq.
- Pisoq aamma erinarsoqatigiiffiullunilu ullaakkorsioqatigiiffiusussaq kommunip Facebookiatigut toqqaannartumik malinnaavigineqarsinnaassaaq. Ullup ingerlanerani pisut ilaat Facebookitigut malinnaavigineqarsinnaassapput, soorlu angoqqaanniutsitsilluta aallartitsigutta. Aamma Sermermiut tungaannut innuttaasut igaasariarneranni Facebookikkut toqqaannartumik malinnaatitsissaagut. Tamaanilu nipilersortartut Maalia & Juuna aammalu Josef aamma Nick aliikkusersuissapput, Katrine Noahsen Gundel, Sermermiut Kulturikkut illorsuarmi pisussanik ataqatigiissaarisoq oqarpoq.
Puisip neqaanik agguaasoqassaaq
Inuiattut ullorsiornissami pisussat Sermermiut Kulturikkut illorsuarmi pisussanik ataqatigiissaarisartut Ilulissanilu peqatigiiffiit akornanni pilersaarusioqatigiissutigineqarput. Angoqqaanniunnerit, naalagiarnerit, puisip neqaanik agguaanerit, kalattoornerit, arsaattartut arnat angutillu utoqqasaartaannik unamminerit pisussallu soqutiginartorpassuit Ilulissani innuttaasunit ussagarfigineqarsinnasut pillugit pilersaarut uani alakkarneqarsinnaavoq: Nationaldag kal
Aaqqissuussisut puisip neqaanik inuiattut ullorsiornermi agguaanneqartussamik pisisimapput, angoqqaanniunnermilu akissarsiassatut annerpaatut aallaat akissarsiarineqarsinnaavoq.
- Coronap tuniluuteratarsinnaanera pinngitsoorniarlugu nakorsaaneqarfimmit innersuussat pissutigalugit kulturikkut nersornaasiilernermi Sermermiut Kulturikkut illorsuani pisussamut isersinnaasut killeqartussaapput. Immikkut qaaqqusat isersinnaassapput innuttaasullu allat killilerlugit isertinneqarsinnaassapput, Katrine Noahsen Gundel oqarpoq nangillunilu:
- Innuttaasut akisussaassuseqarlutik nakorsaaneqarfimmit maleruaqqusat malillugit amerlasuunngorlutik katerinnaveersaartariaqarput, pingaartumillu inuit qanitarinngisatik sapinngisamik qanillinaveersaartariaqarpaat.
Ilulissani katersugaasivik inuiattut ullorsiornermi aamma ammassaaq, ilaatigut 1990-ikkunni erinarsortartunik videolianik silamilu qitittunik kalattoortunillu takutitsisoqassaaq. Katersugaasiviup pilersaarutai uani alakkakkit: Nationalddag_mus