airplanebooksbriefcase business cogs cross election entertainment fish house law lockmedicalpeopleselfservices socialtax

Annertunerusumik atoqqiineq, eqqakkanillu ikuallaasarneq annikinnerusoq

Avannaata Kommuniani, atoqqiinerusarnissaq taamaalillunilu eqqakkanik ikullaasarnerup annikinnerulernissaa sulissutigineqassasoq kissaatigineqarpoq.
14. august 2020

Borgmester Palle Jerimiassen-ip maluginiarsimavaa, Avannaata Kommuniata eqqakkanik passussisarnerup ajornartorsiutaanerata ataatsimut aaqqiiviginiarneqarnissaa peqataaffigerusunngikkaa tusatsiakkatut ingelaartinneqartoq. Tamannali ilumuunngilaq.

-Kissaatigaarput ataatsimut eqqakkanik ajornartorsiuteqarnerup ataasimut aaqqiivigineqarnissaa. Nuna tamakkerlugu tamanna ajornartorsiutaavoq, ataatsimut paasinninnermik kiisalu suleqatigiinnermik pisariaqartitsisoq, Palle Jerimiassen taama oqariartuuteqarpoq.

Aaqqiissut tamanut naammaginartoq

Avannaata Kommuniani isumaqartoqanngilaq, suleqatigiinnissami tamatumani paasinninneq annikippallaartoq. Kommunit avannarlersaanni unammillernartut, Kalaallit Nunanni kommuninit allanit allaanerupput annertunerullutillu. Tamaani nunaqarfiit amerlapput imminnullu ungasissumik inissisimasullutik, tamatumalu kingunerisariaqassavaa poortuivinnik inissiigallartarfinnillu amerlasuunik sanaartortoqartariaqarnissaa. Tamatumalu kingunerissavaa Avannaata kommunianut sanaartornermut aningaasartuutit annertoorujussuusariaqarnerannik, naak illuatungaanik kommunimut aningaasaliissutissanik suliniuteqartoqanngitsoq. Tamatuma saniatigut sulisussaaleqinerup kigunerisaanik, eqqakkanik passusisarnermi sulisussanik pissarsiniarnerup ajornkusoortunera ajornartorsiutaavoq.

-Inuiaqatigiinnut aningaasat isaatinneqartartut maanngaanniik annertupput; aalisarnermit, takornariaqarnermit sanaartornermiillu, aammalu tamatta ataatsimut karsitsinnut tamatta akileeqataasarpugut, kisiannili misigisimanarpoq killormut pissarsisinneqarneq ajorluta. Taamaammat Kommunalbestyrelse isumaqarpoq tamanna oqimaaqatigiissumik ingerlanerunngitsoq, taama Palle Jerimiassen oqariartuuteqarumavoq.

Nuummi Sisimiunilu ikuallaavissat, kiisalu ooliakumik ikullaaveeqqat pingasut sanaartorneqarnerannut aningaasartuutissat naatsersuutigineqarpoq 400 millioner koruunit missaanniissasut. Aningaasartuutissat taakku, kommuninit eqqakkanik passusisarnermi suliffeqarfimmik ESANI A/S-imik piginneqataasunit avinneqartussaapput. Tamatumalu saniatigut Avannaata kommunia illoqarfinni sisamani kiisalu nunaqarfinni 23-ni eqqakkanik passusisarnermi atortorissaarutinut atorneqartussanik sanaartornermi atugassanik immikkut aningaasartuuteqartussaassaaq, tamannalu naatsersuutigineqarpoq 125 mio. koruuninik naleqassasoq.

 

Ungasinnerusoq eqqarsaatigalugu aaqqiissutit

Avannaata Kommuniani isumaqartoqarpoq, pisariaqartoq ungasinnerusoq eqqarsaatigalugu eqqarsartoqartariaqarneranik, ikuallaaviit pitsaanerusut qulakkeernissaat kisiat aaqqiissutissatut isiginiaannarnagu. Atoqqiinermik kiisalu atortukunik allatut atoqqiisarnermik kingunilimmik aaqqiissutissarsiortoqassasoq kissaatigineqarpoq, ikuallaaginnartarneq inissiigallartarnerlu kisiisa aaqqiissutissatut isiginagit. Tamanna Naalakkersuisut eqqakkat passunneqartarnerat pillugu pilersaarutaata 2020-2031-p anguniagaanut ataqatigiimmat, tassanimi mingutitsinngitsumik piujuartitsinerlu aallaavigalugit ineriartortitsineq qitiuvoq.

-Nunarsuup sinnerani sapinngisamik plastikkimik atueqqittarnissaq sulissutigineqarpoq, taamaammat plastikkimik ikuallaaginnartarnerput pissusissamisuunngilaq. Plastikkimik atoqqiisarneq atortussiat eqqarsaatigalugit pisussataagaluarpoq annertooq aammalu kallerup inneranik pilersuinermi sipaarutissaq annertoorujuugaluarpoq plastikki atoqqinneqartartuugaluarpat, tamatigut plastikkiliortuaannarnermut naleqqiullugu, taama Palle Jerimiassen oqarpoq.

Piffissami matumani Ilulissani eqqaavissuaq pillugu nutaamik pilersaarusiornissaq sulissutigineqarpoq, massakkornit eqqakkat annertunerusumik immikkoortiterneqartarnissaat siunertarineqarluni, atoqqinneqarsinnaasut atoqqinneqartarnissaat ajornannginnerulersikkumallugu, aammalu taamaalilluni ikuallaasarnerup annikinnerulernissaa sapinngisamik pisinnaanngorlugu. Ungasinnerusoq eqqarsaatigalugu plastikkit, savimerngit, pappilissat atoqqinneqartalernissaat, kiisalu arrortinneqarsinnaasut arrortinneqarsinnaanngitsullu immikkoortiterneqarsinnaalernissaat anguniagaavoq.

 

 

Roma ulloq ataasiinnaq atorlugu napparneqanngilaq

Soorunalimi ileqqunik allannguineq ullormiit ullormut pinavianngilaq. Naatsersuutigineqarsinnaangilartaaq nunaqarfinni illoqarfinnitut atoqqiisarnerup annertutiginissaa. Nunaqarfinni ullumikkornit avatangiisit mianerinerullugit ikuallaarsaneq pingaartinneqarnerussaaq, tamatumani nutaaliaasunik ikuallaaveqarnikkut tamanna anguniarneqassalluni. Taamaattoq siunissami avatangiisinit attanneqarsinnaasumik passusisarnissaq sulissutigineqassasoq kissaatigineqarpoq.