airplanebooksbriefcase business cogs cross election entertainment fish house law lockmedicalpeopleselfservices socialtax

Illorsuit eqqaanni uuttortaanerit nutaat Naalakkersuisuniillu killiffiliineq ujartorneqarput

Avannaata Kommuniani borgmesteri kommunalbestyrelsimi ilaasortat kissaateqarnerat naapertorlugu, Karrat kangerluanni 2017-imi qaqqap sisoornerata kingorna Illorsuit inuerutitaasut ammaqqinneqarsinnaanerat pillugu Naalakkersuisunut saaffiginnissuteqarpoq.
26. august 2020
Illorsuit ammaqqinneqarsinnaanerat pillugu periarfissanik iliuuseqartoqarnissaanik kommunalbestyrelsimit kissaateqartoqarnera tunngavigalugu borgmesteri Palle Jerimiassen Naalakkersuisut siulittaasuannut allakkatigut saaffiginnissuteqarpoq.

Kommunalbestyrelsimit kissaatigineqarpoq Karrat kangerluanni qaqqaq sisoorfiusimasoq piaarnerpaamik nutaanik misissuiffigalugulu uuttortaaffigineqassasoq, inernerusulu innuttaasunut saqqummiunneqassasut. Kommunalbestyrelsimit aamma kissaatigineqarpoq, Illorsuit ammaqqinneqarnissaannut Naalakkersuisut misissuissasut kiisalu kissaatigineqarpoq qimarngunneqarsimasut sinniisaannik Karrat kangerluanni misissuinermi peqataatitaqartoqassasoq.

Kommunalbestyrelsimi oqaluuserineqarpoq
Illorsuit ammaqqinneqarsinnaanerat kommunalbestyrelsimi immikkut ittumik aggustip 20-ani ataatsimiittoqarnerani oqaluuserineqarpoq. Kommunalbestyrelsimi ilaasortaasut Jens Kristian Therkildsen Ikerasammeersoq aammalu Sakio Fleischer Uummannameersoq Illorsuit ammaqqinneqarsinnaanerat pillugu kommunalbestyrelsimi oqallittoqarnissaanik kissaateqartuupput. Aammattaaq “Peqatigiiffik Illorsuarmiut” suliaq taanna pillugu saaffiginnissuteqarsimapput.

- Karrat kangerluanni qaqqaq nakkaateriaannaq nakkaassimavoq, qaaqallu nutaamik misissuiffigineqarnissaa erininarsivoq. Illorsuit eqqaanni imaq qaleraleqarfissuuvoq, qaqqallu 2017-imi sisoornerani Illorsuit aseruaffiunngillat. Innuttaasut qimarngunneqarsimasut inooqataaffigisagut uterusuttuarnerat anngunneqartuarpoq. Illullu aserfallakkiartuinnarput aningaasanik malitseqartussamik, Karl Kristian Therkildsen saqqummiinermini oqarpoq.

Borgmesterip Palle Jerimiassenip kommunalbestyrelsimi ilaasortanut eqqaasitsissutigaa, paasissutissat kommunalbestyrelsimi isummerfigineqartussat innuttaasut assilisaannit takusaannillu tunngaveqaratik pisortaqarfinneersuussasut aammalu qaqqat sisoorfiusinnaasutut ernumanaatillit misissuivigineqarnerat ukiut marluk matuma siorna Namminersorlutik Oqartussat Naalagaaffiullu akornanni atsioqatigiinnerisigut aallartinneqartut ukioq manna avannaani nanginneqarniartut.

- Misissuinerugallarnerit ersersippaat qaqqaq nakkaateqqissagaluarpat malinnik meterinik arfineq-pingasunik portutigisunik pilersitsissasoq nalunaaquttallu akunneranut 250 km-isut sukkatigalutik minutit arfineq-marluk ingerlanerinnaanni Nuugaatsiamut apuutissasut aammalu inugisinnaasai tassaarsuaqarnissaanik kalerrinneqarnerminniit minutit marluinnaat qimaanissaminnut periarfissaqassasut aammalu Illorsuit inugisinnaasaat kalerrinneqarnerminniit minutit arfineq-marluk atorlugit qimaanissaminnut periarfissaqassasut, borgmesteri Palle Jerimiassen eqqaasitsivoq.

Borgmesterip Naalakkersuisunut allakkatigut saaffiginnissuteqarnera kommunalbestyrelsimi partiinit tamanit tapersersorneqarpoq.

Allattoq: Káte Hansen, khan@avannaata.gl
Asseq: Toqqorsivik



Kommunalbestyrelsimi ilaasortat kissaatigaat Illorsuit ammaqqinneqarsinnaanerat Naalakkersuisut misissussagaat.