Borgmesterip kommunip suliassanik suliarinnittarnera illersoraa

- Kommunimi sulianik suliarinnittarneq aqunneqannginnerarlugu kommunimut ilaatigut naveersissutigineqartarpoq ilaatigullu innuttaasut ataasiakkaat paasissutissartaannik mianernartunik nakkutiginninnginnerarlugu isornartorsiorneqartarpoq. Avannaata Kommuniani allaffissornikkut qulanaatsumik malinnittoqarnera innuttaasunut uppernarsarsinnaavara, tassami inuit ataasiakkaat paasissutissartaat allaffissornikkut qanoq isumagineqartarnissaat pillugu nunatsinni kommunini marluusuni aappaattut kommunimut Datatilsynimit akuersissutigineqarnikuuvoq, Palle Jerimiassen Avannaata Kommuniani borgmesteri oqarpoq nangillunilu:

- Kalaallit Nunaanni pisortaqarfiit kommunit ilanngullugit inuit ataasiakkaat paasissutissartaat mianernartut allaffissornikkut qanoq isumagineqartarnerat Danmarkimi Datatilsynimut nalunaartussaatitaapput. Kalaallit Nunaanni kommunit marluinnaat – Avannaata Kommunia aamma Kommuneqarfik Sermersooq – taamatut Datatilsynimut nalunaaruteqarsimasuupput. Nalunaaruteqarnikkut takutinneqarpoq sulianik isumaginnittarneq pingaartumillu inuit ataasiakkaat pillugit paasissutissat mianernartut kommunimi sulisunit qanoq isumagineqartarnersut.

Innuttaasut ataasiakkaat paasissutissartaasa illersorneqarnissaannik pisinnaatitaaffiit Datatilsynimik suleqateqalernikkut Avannaata Kommunianit qulakkeerneqarpoq. Allatut oqaatigalugu innuttaasut pisinnaatitaaffii paasissutissartaasalu illersorneqarnissaat kommunimit malinneqarput.

Sulisut pikkorissarput
- Inuit ataasiakkaat paasissutissartaat mianerisassat kommunimit isumagineqarnerat innuttaasunit tatigineqassaaq. Allaffissornikkut sulisorisavut pikkorissarlutik inuit ataasiakkaat paasissutissartaat pillugu inatsit ilinniarpaat aammalu innuttaasut paasissutissartaat qarasaasiatigoortut qulakkeerniarlugit iliuuseqarpugut.

- Suliassat isumagineqartarnerat ullutsinni pappialarsornikkut isumagineqartarpoq, tamannalu sulianik isumaginnittarnerni kigaallassaataasinnaasarpoq. Sulianilli allaffissornikkut ingerlatseriaatsit pitsanngorsartuarneqarnissaat kommunimit isumagineqartuarpoq. Assersuutigalugu suliat Avannaata Kommuniani qarasaasiatigut nalunaarsorneqartalerlutillu toqqortaatigineqartalissapput, tamannalu sulianik isumaginnittarnerup qulakkeerinnittarnerullu tungaatigut ingerlatsivinnut siuariaaterujussuussaaq. Kommunimilu naatsorsuutigaarput, suleriaaseq tamanna 2021-mi upernaap ingerlanerani naammassineqarumaartoq, borgmesteri Palle Jerimiassen unnersiorpoq.

Datatilsyni pisortaqarfiuvoq arlaannaannulluunniit attuumassuteqanngitsoq, paasissutissallu illersorneqarnissaat pillugu maleruagassanik malinninnissaq nakkutigisaraa. Taamaasilluni Datatilsyni Avannaata Kommunianik nakkutilliisuuvoq, soorluttaaq aamma Avannaaata Kommunia paasissutissat pillugit akisussaasutut inuit ataasiakkaat paasissutissartaasa qularnaatsumik isumagineqarnissaat pillugu unioqqutitsisoqarsimatillugu Datatilsynimut nalunaartussaatitaasoq.

Innuttaasut imminnut paasissutissat qularnaatsumik isumagineqarnissaat unioqqutinneqarsimappata aamma qisuariartussaatitaapput, tamatumalu kingorna Datatilsynimut naammagittaalliuummik apuussisinnaallutillu kommune eqqartuussivinni suliassanngortissinnaavaat.

Inuit ataasiakkaat paasissutissartaat pillugit inatsit Kalaallit Nunaanni 2016-imi decembarip 1-ani atuuttussanngortinneqarpoq.

Allattoq: Káte Hansen, khan@avannaata.gl
Asseq: Toqqorsivik