Kangiani illorsuaq pillugu innuttaasunut ataatsimiisitsineq

Kangiani illorsuup sanaartorneqarnera ingerlarsorpoq pilersaarutillu malinneqassappata illorsuup sanaartorneqarnera aappaagu naammassineqassaaq. Taamaammat innuttaasut Kangiani illorsuaq pillugu sisamanngorpat septembarip 3-ani piorsarsimassutsikkut illorsuarmi Sermermiuni ataatsimiisinneqarniarput.

- Sanaartortitsisut uagullu kommunimiit pingaartipparput, innuttaasut Kangiani illorsuarmut takornariaqarnermi qitiulerumaartussamut piginnittutut misiginissaat. Taamaammat illorsuup sanaartorneqarnera pillugu killiffimmik innuttaasut paasisaqarluarnissaat aammalu illorsuup sumut atorneqarnissaa pillugu ilisimatinneqarnissaat pingaartipparput, Avannaata Kommunia borgmesteri Palle Jerimiassen ataatsimiisitsinissami ilaatigut tikilluaqqusilluni oqaaseqartussaq oqarpoq.

Sanaartorneq sapiiserfiusoq
Piorsarsimassutsikkut illorsuarmi Sermermiuni sisamanngorpat septembarip pingajuani innuttaasunik ataatsimiisitsinermi nal. 19.00 saqqummiisut marluujumaarput. Illussanik titartaasartoq aamma Kangiani illorsuaq pillugu suliniummik Realdania By & Byg sinnerlugu aqutsisuusoq Frants Frandsen Kangiani illorsuarmik sanaartorneq pillugu saqqummiissaaq aammalu Pauline Knudsen, Greenland Visitor Centerimi aqutsisoq Kangiani illorsuarmi saqqummersitsisarnissaq aammalu ingerlanneqarnissaa pillugit saqqummiissaaq.

- Qaasuitsoqarfiup avannaani sanaartoraanni piffissaq sanaartorfiusinnaasoq sivikitsillugu silalu peqqarniitsillugu qularnaatsumik qularnartoqartarlunilu nalorninartoqartarpoq. Kangiani illorsualiorneq suliniutaavoq pilersaarusiornerup tungaatigut aammalu sanaartukkap sannaata ilutsimigut qipioraarnera silatimigullu najungasortarasaarnera eqqarsaatigalugu sapiisernarfiullunilu sunnguatigut tamatigut peqqissaarfiusoq. Naak akimmiffissarpassuaqaraluartoq sanaartorneq pilersaarutit malillugit ingerlavoq maannalu naammassiartuaarneqarluni 2021-mi aasaanerani naammassineqartussatut naatsorsuutigineqarpoq, Frants Frandsen Kangiani illorsualiornermi sanaartortitsisunit Realdania By & Byg-imeersoq oqarpoq.

Saqqummeereernerit kingorna innuttaasut apeqqarissaarfigineqarsinnaasunut apeqqarissaarnissaminnut periarfissaqassapput ukuusunut: Avannaata Kommuniani borgmesteri Palle Jerimiassen, Realdania By & Byg sinnerlugu illussanik titartaasartoq suliniummilu aqutsisoq Frants Frandsen, Greenland Visitor Centerimi aqutsisoq Pauline Knudsen, KJ Greenlandimi pisortaaneq Karl Jensen kiisalu Rambøllimi ingeniøriusoq Jørn Abelsen-Hansen.

Innuttaasunik piorsarsimassutsikkut ataatsimiisitsinermi kaffeqarlunilu teeqarlunilu imeqarlunilu kaageeraqassaaq.

Unnummi pilersaarutaasut uani alakkakkit.

Allattoq: Káte Hansen, khan@avannaata.gl
Asseq: Toqqorsivik