Borgmesteri malittaalu corona sissuerfigalugu angalalersut

Uummannami, Upernavimmi Qaanaamilu siusinnerusukkut ataatsimisitsinissaraluit aggustip qaammataani ingerlanneqartussaagaluit coronamik tuniluuttoqaratarsinnaanera annikinnerpaamiitinniarlugu taamaatiinnarneqarpoq. Taarsiullugulu corona sissuerfigalugu ataatsimiinnerit Ilulissani, Uummannami Upernavimmilu sapaatip akunnerata tulliani pisussanngorput, ataatsimiinnernullu assingusoq Qaanaami oktobarimi pisussanngorlugu pilersaarutigineqarpoq.

- Naalakkersuisut Covid-19-imut maleruaqqusaat atuuttut pissutigalugit iIlloqarfinni innuttaasunik ataatsimiisitsinianngilagut, taamaattorli innuttaasut ataasiakkaat arlaatigut apuussaqarusuttut borgmesterimik, partiit sinniisaannik imaluunniit atorfilittanik ataasiakkaanik oqaloqateqarnissaannut periarfissinniarpagut. Oqaloqateqarnissamulli periarfissaq Ilulissani innuttaasunut periarfissaassanngilaq, innuttaasummi ataasiakkaat sisamanngornerit tamaasa nal. 10.00-imiit 12.00-ip tungaanut borgmesterimik oqaloqateqarnissamut periarfissaqareermata, Avannaata Kommuniani borgmesteri Palle Jerimiassen oqarpoq.

Tamatumunnga atatillugu borgmesteri ilisimatitsivoq, politikerisut atorfilittatullu Ilulissaniit angalaqataasussat tamarmik coronaviruseqarnersut ippassaq sisamanngornermi septembarip sisamaani misissortissimasut, inernerilu pillugit sisamanngornermi septembarip qulingani Ilulissaniit allannginnermi ilisimatitsissutigineqarumaartut.

Angalanissami siunertaavoq, najukkami ataatsimiititaliat siulittaasuinik, nunaqarfinni aqutsisut siulittaasuinik aammalu najukkani kommunalbestyrelsimut qinikkat kommunip pilersaarutaasa killiffiinik aningaasaqarnernermillu ilisimatitsinissaq. Borgmesteri malittaalu nunaqarfinnut ataasiakkaanut angalanatik nunaqarfinni aqutsisuni siulittaasut paasititsiniaalluni ataatsimiinnissani peqataajartorlutik illoqarfinnukaassapput.

Ataatsimiinnerit nal. 9.00-imiit 15.00-ip tungaanut ingerlasussat ima pilersaarusiorneqarput:
- Ilulissat, ataasinngorneq septembarip 7-at, piorsarsimassutsikkut illorsuarmi Sermermiuni
- Uummannaq, sisamanngorneq septembarip 10-at, timersortarfimmi
- Upernavik, arfininngorneq septembarip 12-iat, katersortarfimmi.

Uummannami Upernavimmilu innuttaasut ataasiakkaarlutik oqaloqateqarnissamut ulluni taakkartorneqareersuni nal. 15.00-imiit 17.00-ip tungaanut periarfissaqassapput.

Allattoq: Káte Hansen, khan@avannaata.gl
Asseq: Internetimit